«Խառը զգացմունքներ». պրեմիերա Երեւանի Կ. Ստանիսլավսկու անվան ռուսական թատրոնում

Երեւանի Կ. Ստանիսլավսկու անվան ռուսական դրամատիկական թատրոնի խաղացանկը համալրվեց եւս մեկ ներկայացմամաբ: Նոյեմբերի 23-ին  հանդիսատեսին ներկայացվեց ամերիկացի հայտնի դրամատուրգ Ռիչարդ Բայերի «Խառը զգացմունքներ» պիեսի հիման վրա բեմադրված համանուն կատակերգությունը: Բեմադրությունն իրականցրել է ՀՀ վաստակավոր արտիստ Իրինա Հարությունյանը:

Բայերի պիեսները բեմադրվել են Բրոդվեյում, դրանց սցենարների հիման վրա նկարահանվել են ֆիլմեր: «Խառը զգացմունքներ» պիեսը երկու միայնակ մարդկանց մասին է. կինը կորցրել է ամուսնուն, տղամարդը` կնոջը: «Խառը զգացմունքներ» պիեսը մարդկային պատմություն է, փոքր-ինչ սենտիմենտալ: Այն սիրո մասին է, եւ այն մասին, որ ցանկացած տարիքում յուրաքանչյուր մարդ կարիք ունի զգալու, որ ինքն ինչ-որ մեկին պետք է, որ միայնակ չէ:

Ներկայացման մեջ ներգրավված են ՀՀ վաստակավոր արտիստներ Աննա Բալանդինան եւ Արման Ղազարյանը, Գրիգորի Կիրակոսյանն ու Անտոն Աղաջանյանը:

Ներկայացման բեմանկարիչը Արթուր Հարությունյանն է, զգեստների նկարիչը` Ինեսա Սևունցը,  կոմպոզիտորը՝ Մարինա Բրուտյանը, խորեոգրաֆը` Նունե Կիրակոսյանը: 

Իրինա Հարությունյանը ՀԺ- ի հետ զրույցում հայտնեց, որ չնայած թեման ավելի շատ մեծահասակներին է վերաբերվում, բայց հույս ունի, որ դերասանական խաղն ու յուրօրինակ խոսքը շատերի ուշադրությունը կգրավեն եւ կհիշվեն: Ներկայացումը հանդիսատեսին դուր եկավ, չնայած դահլիճը լեփ-լեցուն չէր: Հանդիսատեսից որոշները մեկ նախասաությամբ բնութագրելիս նկատցեին` դերասանական անկաշկանդ խաղը շատ համոզիչ էր, ամեն թատրոնում չէ, որ սա կարելի է տեսնել:

Ծիծաղաշարժ դրվագներով համեմված կատակերգությունում քիչ չէին տարիքից կաշկանդվելու, միայնությունից վախենալու ու հարազատ երեխայից օտարանալու դրամատիկ դրվագները: Մեծահասակ մի կին հանդիսատես էլ ասաց. «Բեմում այն էր, ինչը կարող է մեզ` մեծահասակներիս հետ պատահել, անգամ, եթե մեր ամուսինները մահացած չեն, ինչպես այս ներկայացման մեջ էր»: