Գրոհում են. այ թե տուրուդմբոց է լինելու

Տպագրվել է «Հայկական Ժամանակ» օրաթերթի՝ 2006 թվականի նոյեմբերի 24-ի համարում

Ո՞վ իր շարքերում ավելի շատ ակադեմիկոսացու կունենա՝ «Բարգավաճ Հայաստան»+ ղարաբաղյան կլա՞նը, թե՞ Հանրապետականը. այս խնդիրն է այժմ որոշվում Գիտությունների ազգային ակադեմիայի թղթակից անդամների ընտրությունների նախաշեմին: Իհարկե` ոչ կարտոֆիլի տեսքով, ակադեմիայում արդեն սկսվել են նախընտրական «բարեգործությունները»: Աշխատում են յուրաքանչյուր ձայնի վրա, կիրառում նախընտրական բոլոր տեխնոլոգիաները, եւ այս կերպ ակադեմիան պատրաստվում է շնորհել գիտնականի իր` գրեթե ամենաբարձր տիտղոսը: Մի խոսքով, ԳԱԱ թղթակից անդամների սպասվող ընտրությունները խոստանում են լիովին քաղաքական բնույթ ստանալ` հետաքրքիր ինտրիգներով, ու հիմա յուրաքանչյուր տեղի վրա, բառիս բուն իմաստով, «բազար է գնում»: 129 թեկնածու պետք է պայքարեն 38 տեղի համար: Ընտրությունները տեղի են ունենալու 20 օրից, դեկտեմբերի 14-ին եւ 15-ին:

Եւ ուրեմն, ի՞նչ է կատարվում յուրաքանչյուր բլոկում. պատմություն` այստեղ դիմել է 6 թեկնածու: Ի սկզբանե սույն բլոկում հատկացված էր 1 տեղ: Սակայն, քանի որ ԵՊՀ հանրապետական ռեկտոր Արամ Սիմոնյանը եւս որոշել է ԳԱԱ թղթակից անդամ դառնալ, կատարվել է տեղերի վերաբաշխում: Խնդիրն այն է, որ սույն բլոկում ընտրվելու ամենամեծ շանսն ունի պատմաբան Բաբկեն Հարությունյանը ԵՊՀ-ից: Բայց հիմա այս բլոկում իջեցվել է եւս 1 տեղ` հատուկ Սերժ Սարգսյանի սիրելի ռեկտոր Արամ Սիմոնյանի համար: Այսինքն, այստեղ հարցերը, ըստ էության, կարելի է լուծված համարել: Մնացած թեկնածուները որեւէ շանս չունեն:

Իրավագիտություն. այս բլոկում դիմել են ԵՊՀ իրավագիտության ֆակուլտետի դեկան Գագիկ Ղազինյանը, որը ԵՊՀ ռեկտորի թեժ ընտրությունների ժամանակ 1 ձայնի տարբերությամբ տանուլ տվեց  Արամ Սիմոնյանին, եւ Գառնիկ Սաֆարյանը: Բայց այստեղ եւս լուրջ խնդիր կա լուծելու: Նախ, հիշեցնենք, որ Գագիկ Ղազինյանն ու ԳԱԱ նախագահ Ռադիկ Մարտիրոսյանը սանիկ-քավորական հարաբերությունների մեջ են, հետո` ԵՊՀ ռեկտորի ընտրությունների ժամանակ, ինչպես ժամանակին գրել ենք, ԵՊՀ նախկին ռեկտոր Ռադիկ Մարտիրոսյանին, որին ՀՀԿ-ն չթողեց ԵՊՀ խորհրդի նախագահ դառնալ, փոխարենը խոստացվել էր ԳԱԱ նախագահի աթոռը, եթե ԵՊՀ ռեկտորի ընտրությունների ժամանակ նա հանրապետական Արամ Սիմոնյանի համար մի քանի ձայն ապահովի, այսինքն, կոպիտ ասած, «քցի» Ղազինյանին: Ու հիմա եկել է Ղազինյանին պարտքերը վերադարձնելու ժամանակը:

Այսինքն, հիմա ամեն ինչ պետք է արվի, որ Ղազինյանը ստանա թղթակից անդամի տիտղոսը: Տնտեսագիտություն. սույն բլոկում երիտասարդներին հատկացված 1 տեղի համար դիմել է 3 հոգի` ՀՀ նախկին վարչապետ, Ռուս-սլավոնական համալսարանի ռեկտոր Արմեն Դարբինյանը, պետական գույքի կառավարման վարչության պետի տեղակալ Աշոտ Մարկոսյանը եւ նույն վարչության պետի նախկին տեղակալ Միքայել Մելքումյանը: Հիշեցնենք, որ վերջին երկուսը մի քանի ամիս առաջ փորձում էին Տնտեսագիտական համալսարանի ռեկտոր դառնալ: Սույն բլոկում խնդիրը բավական բարդ է: Իհարկե, ընտրվելու ամենամեծ շանսերը Աշոտ Մարկոսյանինն են, հետո` Արմեն Դարբինյանինը: Բայց մյուս կողմից էլ կա Միքայել Մելքումյանը, որը ԲՀԿ-ի անդամ է, եւ ակադեմիայում չեն բացառում, որ նրան հաջողվի կարտոֆիլատիպ ինչ-որ բանով ավելի շատ ձայներ հավաքել:

Նույն բլոկում, արդեն մեծերի 1 տեղի համար, պայքարելու են Տնտեսագիտական համալսարանի ռեկտոր Յուրի Սուվարյանը եւ ԵՊՀ տնտեսագիտության ֆակուլտետի դեկան Հայկ Սարգսյանը: Վերջինս, իհարկե, ուժեղ թեկնածու է, սակայն Յուրի Սուվարյանը, նախ, ղարաբաղցի է, բացի այդ, նրան սատարում են նաեւ կառավարությունից: Մի խոսքով, այստեղ, ըստ կանխատեսումների, անցնելու է Սուվարյանը: Լեզվաբանության բլոկում 1 տեղի համար պայքարելու է 6 թեկնածու, որոնց թվում են Բրյուսովի անվան համալսարանի ռեկտոր Սուրեն Զոլյանը, «Արմենիա» հեռուստաընկերության նախագահ Բագրատ Սարգսյանի հայրը` Արտեմ Սարգսյանը, ԵՊՀ-ից` Լեւոն Եզեկյանը, այնուհետեւ «Անանիա Շիրակացու» ռեկտոր Վաղարշակ Մադոյանը, Վազգեն Համբարձումյանը եւ Լավրենտի Հովհաննիսյանը:

Վերջին երկուսի շանսերը բարձր են գնահատվում, սակայն ԳԱԱ-ում վստահ են, որ կանցնի Արտեմ Սարգսյանը, որին հովանավորում է ղարաբաղյան կլանը: «Մեխանիկա» բլոկում 1 տեղի վրա պայքարում են 5-ը, որոնց թվում է Մանկավարժական համալսարանի ռեկտոր, ղարաբաղցի Արտուշ Ղուկասյանը, որն էլ, ըստ ամենայնի, կանցնի, թեեւ ոմանք կարծում են, որ կանցնի Մեխանիկայի ինստիտուտի աշխատակից Սուրեն Մխիթարյանը: Նույն բլոկում երիտասարդների 1 տեղի համար դիմած ԿԳ հանրապետական փոխնախարար Արա Ավետիսյանի հարցերը կարելի է համարել լուծված, քանի որ այստեղ նա միակ թեկնածուն է:

Լուծված կարելի է համարել նաեւ ԿԳՆ բարձրագույն որակավորման հանձնաժողովի նախագահ Արմեն Թռչունյանի հարցերը, քանի որ բացի այն, որ նա կենսաֆիզիկայի բլոկում երիտասարդների 1 տեղի միակ թեկնածուն է, նաեւ բարձր հովանավորություն է վայելում: Հետաքրքիր է, որ թղթակից անդամների թեկնածուների մեջ կան 7 ռեկտոր, մի քանի պրոռեկտոր, մեծ թվով ղարաբաղցիներ, մի քանի թեկնածու ԳԱԱ նախագահ Ռադիկ Մարտիրոսյանի բարեկամներն են: Բայց բոլոր նրանք, ում շանսերը սույն ընտրությունների ժամանակ ամենաբարձրն են գնահատվում, նախ հայտնի են ոչ որպես գիտնականներ:

Լուսինե Բարսեղյան