Գյումրիում նախատեսվում է թանկացնել աղբահանության վարձավճարը. ըստ փոխքաղաքապետի դա ստիպված քայլ է

Գյումրու քաղաքապետարանում այսօր կայացել է քննարկում քաղաքի վարչական տարածքում տեղական տուրքերի և վճարների 2020 թվականի դրույքաչափերը սահմանելու և Գյումրի համայնքի ավագանու 2018 թվականի դեկտեմբերի 11-ի N 201-Ն որոշումն ուժը կորցրած ճանաչելու մասին: Խոսքը հիմնականում վերաբերել է աղբահանության դիմաց գանձվող վարձավճարին: Ավագանու առաջիկա նիստում հաստատման կներկայացվի նախագիծ, որով կառաջարկվի այս պահին գործող 100 դրամը սահմանել 150 դրամ: «Ստիպված ենք անում, սա ստիպված քայլ է»,- քննարկման ընթացքում ներկաներին պարբերաբար տեղեկացնում էր Գյումրու համայնքապետի առաջին տեղակալ Ռուբեն Սանոյանը:

Աղբահանության եւ սանմաքրման ծախսը գերազանցում է դրա դիմաց մուտքագրվող վարձավճարներին: Մշտապես խնդիրը կարգավորվել է համայնքի բյուջեի հաշվին, ինչն, ըստ Ռուբեն Սանոյանի, գնալով անհնար է դառնում: «2018 թվականի մեր հետազոտությունների արդյունքում 143 մլն 432 հազար 989 դրամ տարբերություն է տվել, այսինքն՝ մուտքերից ավելի ենք ծախսել: Այս 50 դրամը, որ ուզում ենք բարձրացնել, դա էլ է քիչ: Ելնելով սոցիալական վիճակից՝ հիմա այսքանն ենք ավելացնում, որ շատ դժգոհություններ չլինեն, երեւի եկող տարի կամ 2021-ին նորից կվերանայվի: Տարիներ շարունակ էս հարցը մեր կողմից չէր բարձրացվում՝ հաշվի առնելով մեր բնակչության սոցիալական վիճակը: Բայց այսօր մեծ թափով շինարարական աշխատանքներ են կատարում, փողոցների քանակն է ավելացել, եւ կապված զբոսաշրջության հետ նաեւ պետք է բարձրացնել արդյունավետությունն ու սպասարկման որակը: Էդ առումով մեր  հաշվարկների մեջ մենք բյուջեից մեծ գումար ենք ծախսում լրացուցիչ, այսինքն՝ պետք է մեկը մյուսին ծածկեր, բայց էս ներկա վիճակում չի փակում»,- խնդիրը ներկայացրեց Ռուբեն Սանոյանը:

Գումարի չափի ավելացումը քաղաքապետարանը պայմանավորում է փողոցաշինությամբ: «Սրանով էլ մեր ծախսերը չի փակվելու, բայց մասամբ գոնե կփարատվի էս վիճակը, կարծեմ Վանաձորում արդեն 200 դրամ է: Մենք, ելնելով Գյումրու առանձնահատկություններից, սոցիալական ծանր վիճակից, միշտ հետաձգել ենք հարցը: Բյուջեի մեջ սեղմվելով՝ տեղավորվել ենք: 100 դրամի մեջ էլ չէինք տեղավորվում, բայց էս աննախադեպ փողոցաշինության արդյունքում մենք կիլոմետրերով նոր փողոցներ ունեցանք, դե, պատկերացրեք՝ սանմաքրում, աղբահանություն: Էն քանդուքարափ փողոցները ավլելու, մաքրելու գործ էլ չկար առաջ, հմի ասֆալտապատել են, բդի մաքրվի, ջրվի, բարեկարգվի, հազար ու մի խնդիր կա, նորից եմ ասում՝ ստիպողական քայլ է սա, լավ օրից չէ, որ անում ենք, մենք մեր բնակչության վիճակի մեջ մտնում ենք, բայց ուրիշ տարբերակ չունենք»,- ասաց  Սանոյանը:

Գյումրիում հաշվառված 157.000 քաղաքացուց փաստացի բնակչության թիվը 78.000 է: Աղբահանության վարձավճարների գանձումների հետ կապված լուրջ դժվարություններ կան Գյումրիում: Հասցեավորումներ են սխալ, մարդիկ կան, ովքեր վաղուց փլված, անհետացած շենքերի հասցեների գրանցումներով են դեռ ապրում, փակ դռներ եւ այլ հանգամանքներ են առկա:  

Անկախ այդ ամենից, Գյումրին այսօր հանրապետության ամենամաքուր քաղաքների թվում է: Հազվադեպ կարելի է հանդիպել աղբի կուտակումների: Եթե լինում էլ է, ապա, ըստ Ռուբեն Սանոյանի, արագ վերացվում է: Հարցի լուծումն էլ նոր ձեռք բերված տեխնիկան է:

«Առաջ ունեինք 2 հատ ջարդած գրեյդեր, հմի ճապոնական Կամացու ունենք, որ առաջ երազներումս էլ չէինք տեսնում: Փողոցում տեսնում, ասում էինք՝ երանի տիրոջդ, հիմա ունենք, հմի էլ մեզ են էռնակ տալիս շատերը փաստորեն»,- նկատեց Գյումրու համայնքապետի առաջին տեղակալը:

Արմենուհի Մինասյան