Գործազուրկների շուրջ 74%-ը կանայք են. Զարուհի Բաթոյան

«Գործ չկա» արտահայտությունն այսօր այնքան էլ արդիական չէր. «Երեւան Էքսպո» կենտրոնում 1000-ից ավելի թափուր աշխատատեղ էր ներկայացվում:

Մայրաքաղաքում կազմակերպվել էր աշխատանքի տոնավաճառ, որի գլխավոր նպատակը գործատուի եւ աշխատանք փնտրողի անմիջական հաղորդակցությունն էր: Այդպես գործազուրկները կայուն զբաղվածություն ունենալու հնարավորություն կստանան, իսկ գործատուն կարող է համալրել իր մոտ առկա թափուր աշխատատեղերը:

Նախաձեռնության հեղինակը ՀՀ Աշխատանքի եւ սոցիալական հարցերի նախարարության Զբաղվածության պետական գործակալությունն էր: Ծրագիրը Երեւանում իրականացվում է զբաղվածության ամենամյա պետական ծրագրով:

Երիտասարդները, միջին տարիքի անձինք եւ մեծահասակներն այսօր հնարավորություն ունեցան տեղում ուսումնասիրելու եւ իրենց համար գտնելու հարմար աշխատանք:

Տոնավաճառին մասնակցեցին տնտեսության տարբեր ոլորտները ներկայացնող շուրջ 70 գործատու, որոնք ներկայացրին իրենց կազմակերպություններում առկա թափուր աշխատատեղերը: Մասնակիցները տեղում ծանոթանում էին առաջարկություններին, անհրաժեշտ պահանջներին, հետաքրքրելու դեպքում՝ գրանցվում, թողնում իրենց ինքնակենսագրականները, որպեսզի գործատուն հետագայում կարողանա կապ հաստատել: Որոշ կազմակերպությունների ներկայացուցիչներ տեղում կարողացան անցկացնել հարցազրույցներ, որպեսզի համալրեն իրենց շարքերը:

«Մենք դեռեւս շատ անելիքներ ունենք աշխատանքի հնարավորությունների, պայմանների եւ ընդհանրապես աշխատատեղեր ստեղծելու ուղղությամբ, բայց դա պետք է անենք փոքր քայլերով»,- նշեց ՀՀ Աշխատանքի եւ սոցիալական հարցերի նախարար Զարուհի Բաթոյանը՝ ողջունելով տոնավաճառի մասնակիցներին՝ աշխատանք փնտրողներին եւ առաջարկողներին: Նախարարը հերթով մոտեցավ մի շարք տաղավարների ու ծանոթացավ կազմակերպությունների առաջարկած աշխատանքներին: Նա իր խոսքում նշեց, որ դեռեւս մի քանի տաղավարի է մոտեցել եւ հասցրել ծանոթանալ, սակայն ինչ էլ տեսել է, բավականին տպավորիչ է:

Տոնավաճառում հատկապես մեծ թվով աշխատատեղեր առաջարկվեցին սպասարկման, սննդի, տեքստիլ արդյունաբերության ոլորտները ներկայացնող գործատուների, ապահովագրական ընկերությունների կողմից:

«Որեւէ մեկի համար նորություն չէ, որ զբաղվածությունը, աշխատանքի հնարավորությունն այսօր լուրջ խնդիր է Հայաստանում, բայց նաեւ որեւէ մեկի համար նորություն չէ, որ աշխատանքն է միակ միջոցը՝ արժանապատիվ կյանքով ապրելու, զարգանալու, ինքնադրսեւորվելու եւ նոր հնարավորություններ ստեղծելու»,- միջոցառման ընթացքում նշեց Զարուհի Բաթոյանը՝ հավելելով, որ այսօր ցանկանում է խրախուսել հատկապես երիտասարդներին, հաշմանդամություն ունեցող անձանց, կանանց եւ միջին տարիքի մարդկանց:

«Եթե դուք հավատում եք ձեր ուժերին, եթե վստահ եք ձեր գիտելիքների ու հմտությունների վրա, ապա դժվարությունները շատ ավելի հեշտ կլինի հաղթահարել»,- շեշտեց Բաթոյանը՝ ավելացնելով, որ իրենց նախարարությունը միշտ մարդկանց կողքին է եւ անում է ամեն բան՝ աշխատանքի ընդունվելու հնարավորությունները մեծացնելու համար, սակայն իրենց մարդկանց աջակցությունն է պետք:

Նախարարը, սակայն, իր մտահոգությունը հայտնեց. աշխատանք չունեցող կանանց թիվը կազմում է գործազուրկների թվի 73.3%-ը կամ 5.9 հազ. մարդ: Նրա խոսքով՝ պետք է աշխատել այս ուղղությամբ:

Եթե համեմատենք երկրում այսօր տիրող իրավիճակը նախորդ տարիների հետ, կստանանք հետեւյալ պատկերը: Երեւան քաղաքում 2019 թ.-ի նոյեմբերի 1-ի դրությամբ Զբաղվածության պետական գործակալության տարածքային կենտրոններում հաշվառված աշխատանք փնտրողների թիվը կազմում է շուրջ 12.2 հազար, որը նախորդ տարվա նույն ժամանակահատվածի նկատմամբ նվազել է 1.4 %-ով: Գործազուրկների թվաքանակը կազմում է աշխատանք փնտրողների 65.6 %-ը կամ 8 հազար մարդ: Այս ցուցանիշը նախորդ տարվա նույն ժամանակահատվածի նկատմամբ նույնպես նվազել է 13.6 %-ով:

Նշենք, որ գործազուրկի կարգավիճակ ունեցողների 16.8%-ը երիտասարդ է, 6.2 %-ը՝ հաշմանդամություն ունեցող անձ:

Անի Ավագյան