«Միսս տիեզերք 2019»-ում Հայաստանի ներկայացուցիչն ընկճված է ներկայացրել ազգային հագուստը. զարդերը տրամադրել էր Սիրուշոն

Արդեն երկու օր է՝ բուռն քննադատության առիթ է դարձել «Միսս տիեզերք 2019» մրցույթում Հայաստանը ներկայացնող Դայանա Դավթյանի «ազգային հագուստ» ցուցադրության ժամանակ կրած զգեստն ու գլխի հարդարանքը:

«Միսս տիեզերք 2019» մրցույցը կայացել է դեկտեմբերի 8-ին՝ ԱՄՆ-ում: 21-ամյա Դայանա Դավթյանը լավագույն 20-յակում տեղ չի զբաղեցրել: Ֆեյսբուքյան օգտատերերից շատերը դժգոհում են, որ մրցույթի պաշտոնական էջում եւս ծաղրել են աղջկա հագուստը: Որոշներ մարդիկ էլ գրում են, որ եթե իրենց դիմեին, ապա հայկական տարազի համադրությամբ շատ գեղեցիկ հագուստ կարող էին տրամադրել:

«Միսս Արմենիա» համայհայկական մշակութային հիմնադրամի ղեկավար, «Միսս Հայաստան 1998», «Միսս ԱՊՀ 1999», «Միսիս գլոբ 2010» տիտղոսակիր գեղեցկուհի Գոհար Հարությունյանը «Հայկական ժամանակ»-ի հետ զրույցում հայտնեց, որ Հայաստանի ներկայացուցիչն ընկճված է ներկայացրել մեր ազգային տարազը: Նա չի կարողացել հաղթահարել մրցակցությունը:

Լուսանկարում՝ Գոհար Հարությունյան

«Ես դժգոհ եմ մեր մասնակցի մոտեցման ձեւից: Այստեղ այլ խնդիր է եղել. տեսնելով այլ երկրների գունավոր եւ պսպղուն զգսետները՝ մեր մասնակիցը իր հագուստը չի հավանել, որը նախապես բոլոր դետալներով համաձայնեցված է եղել իր հետ: Եթե նա պրոֆեսիոնալ մոդել լիներ, պետք է իրեն այսպես դրսեւորեր՝ սա է մեր տարազը եւ այն ամենալավն է: Մենք ավելի շատ իր մատուցման ձեւի ու ժպիտի պատճառով ունեցանք վատ ելույթ, քան հագուստի»,- ասաց Գոհար Հարությունյանը:

Նա նկատեց, որ «Միսս տիեզերք»-ում հստակ ազգային տարազներ չեն ցուցադրվում: Մրցույթի մասնակից երկրներն արդեն 68 տարուց ավելի է՝ ներկայանում են եւ չեն կարող ամեն տարի նույն տարազները ցուցադրել: Ընտրում են ինչ-որ սիմվոլիկա եւ ժամանակակից լուծումներով մատուցում:

«Միսս տիեզերք 2019»-ում այլ երկրների ցուցադրած ազգային հագուստներից մեկը

Գոհար Հարությունյանը նկատեց, որ մյուս երկրներում մրցույթի մասնակից մոդելի հագուստի դիզայները լինելու համար մրցակցություն ու թեժ պայքար է գնում, իսկ Հայաստանում այդպիսի մասնագետ գտնելը մեծ բարդություն է: Նա միաժամանակ կարծիք հայտնեց, որ նման մրցույթները պետական մակարդակով պետք է աջակցություն ստանան: Նշեց, որ ինքը միայնակ է ամեն ինչ կազմակերպել եւ բավականին մեծ դժվարությունների միջով անցել:

«Մի քանի մերժում ստանալուց հետո ես հազիվ եմ դիզայներ գտել: Այստեղ մենք խորքային խնդիրներ ունենք, կուզենայի, որ մեր հանրությունը նախքան քննադատելը մի բանով աջակցեր: Կյանքում այդքան մերժում չէի ստացել, որքան այս վերջին երեք տարում: Մենք հիմնադրամ ենք, շահույթ չենք հետապնդում, բայց ամեն կերպ ձգտում ենք մրցույթներին մասնակցել: Սա բիզնես չէ, սա երկրի շահերից բխող մրցույթ է: Ես տեսա, որ մարդիկ կային, որոնք բորբոքել են, թե էլի խայտառակ եղանք աշխարհով մեկ եւ այլն: Մենք հարձակումների համար չենք անում, եթե ժողովուրդը դժգոհ է, թող մի բանով աջակցի»,- ասաց նա:

Գոհար Հարությունյանը կոչ արեց, որ եթե երկիր ենք ներկայացնում եւ կան տարազագետներ ու հասկացողներ, թող աջակցեն, այլ ոչ թե սպասեն անհաջող ելույթի կամ վրիպակի, որպեսզի հարձակում գործեն:

Քննադատության առիթ դարձած ազգային հագուստի եւ Դայանա Դավթյանի կրած գլխի հարդարանքի մասին նաեւ մեկնաբանեց Հայաստանը ներկայացրած մոդելի եւ հենց այդ հագուստի դիզայներ Վերա Մխիթարյանը:

Նա նշեց, որ Ազգային գրադարանից է օգտվել եւ հին ավանդական հագուստի հետ է համադրել Դայանայի զգեստը: Արարատյան հովտի Երեւան տարազախմբի տարբերակներից է ընտրել մոդելի հագուստի դիզայնը: «Երեւանցի կնոջ» տարազատեսակում օգտագործվում են կարմիր, կապույտ եւ կանաչ գույները: Դիզայները նկատեց, որ ընտրել են կապույտը, քանի որ դա աղջկա դիմագծերին ավելի է սազել: «Միայն Երեւանի տարազախումբն է թույլ տալիս, որ զգեստը բազմաշերտ լինի, մնացած տարազատեսակում մենք ունենք մի քանի շերտ: Հագուստը պետք է լիներ եւ բեմական, եւ ժամանակակից, դրա համար օգտագործվել է բազմաշերտությունը, իսկ ժամանակակից լինելու առումով օգտագործվելը է շորի բացվածքը»,- ասաց նա:

Ինչ վերաբերվում է մոդելի գոտուն, ապա հնում զգեստի վրայից կապած գոտին օգտագործվել է կնոջ կարգավիճակը որոշելու համար՝ ամուսնացած է, թե չէ, եւ ինչ սոցիալական խավից է, իսկ թեւնոցը որպես պաշտպանություն եւ ուժ: Մոդելի գլխի հարդարանքը՝ կոպին ընտրվել է, քանի որ նախկինում հարսները կրել են դա: Կոպին քայլելու ժամանակ ձայներ է արձակում, որն էլ չար ուժերից վանելու խորհրդանիշ ունի: «Հագուստի վրա պետք է նաեւ դաշույն կախված լիներ, որով ցույց կտայինք, որ այսօր զենքը մենք ի նշան խաղաղության ենք օգտագործում, բայց քանի որ երկրից երկիր տեղափոխվելու խնդիր ունեինք՝ սառը զենք կընկալվեր, ուստի հանեցինք»,- ասաց դիզայները:

Դայանա Դավթյանի կրած արծաթյա զարդերն ու գլխի կոպին տրամադրել է երգչուհի Սիրուշոն իր «Պռեգոմեշ» հավաքածուից: «Նրանց հավաքածուն ազգայինին շատ մոտիկ էր, իսկ նորը պատրաստելու կամ գտնելու ժամանակ չկար: Սիրուշոն մեծ սիրով աջակցեց մեզ»,- ասաց Վերա Մխիթարյանը:

Նշենք, որ «Միսս տիեզերք 2019»-ում հաղթել է Հարավաֆրիկյան Հանրապետության ներկայացուցիչ սեւամորթ Զոզիբինի Թունզին: 26-ամյա գեղեցկուհին ընդգծել է, որ ժամանակն է դադարել իր նման մաշկի գույն ունեցող աղջիկներին գեղեցիկ չհամարել:

«Միսս տիեզերք 2019» մրցույթին Հայաստանը մասնակցում էր երկրոդ անգամ:Մեր երկիրը ներկայացնող Դայանան ավելի վաղ հայտնել էր, որ «Միսս Տիեզերք»-ին մասնակցելը մանկության երազաք է եղել իր համար: