Շենքերի բակում եկեղեցի է կառուցվել. տնից Աստծո տուն մեկ քայլ է

Երեւանի Վերին Շենգավիթ 2-րդ փողոցում բնակվող մարդիկ, եկեղեցի գնալու համար պարզապես պետք է դուրս գան շենքից եւ այն իրենց դիմաց կլինի, իսկ առաջին հարկի բնակիչներին բավարար կլինի բացել պատուհանները՝ պատարագ լսելու համար:

Շենգավիթ վարչական շրջանի նորակառույց Սուրբ Առաքելոց եկեղեցին, որը շուրջ 3 ամիս առաջ է կառուցվել, գտնվում է բնակելի հատվածի ուղիղ կենտրոնում՝ շրջապատված շենքերով, իսկ կողքին՝ փոքրիկ խանութ:

Որպեսզի հեռուներից եկեղեցի գնացողները չխճճվեն ու բակերում չմոլորվեն, ճանապարհը հուշող պաստառներ կան, որոնց հետեւելով, շուտով կերեւա մատուռ հիշեցնող փոքրիկ եկեղեցին, որի շուրջ տեղադրված են մի շարք խաչքարեր:

Մի կողմից՝ բակային կյանք, բնակիչներ, մեքենաներ, մյուս կողմից՝ պատարագ, մկրտություն եւ հարսանիք: Տարածքի բնակիչները մեզ հետ զրույցում ասացին, որ եկեղեցին շենքերին այդքան մոտ գտնվելը խնդիր չի առաջացնում, հակառակը՝ իրենք շատ գոհ են: Բնակիչներից մեկը նշեց, որ սկզբում ինքն էլ է մտածել, թե կարող է մոտ գտնվելն ինչ-որ բանով խանգարել, սակայն սխալվել է: Այժմ ամեն ինչից գոհ է, զանգի ձայնն էլ բարձր չէ, չի խանգարում: Իր խոսքով. «Կարեւորն Աստծուն դառնալն է»:

Այդ վայրում երկար ժամանակ է անցկացնում մի փոքր հեռու ապրող Զավենը, որը տարածքի ծաղիկներն էր ջրում, երբ մոտեցանք: Նրա խոսքով՝ վայրը շատ է սիրում, հաճախ է գալիս: Մոտ գտնվելու առումով՝ այսքան ժամանակ ոչ ոքից դժգոհություն չի լսել: Նրա կարծիքով՝ կարեւորը, որ մարդիկ հավատում են եւ այդպես կարծես հավատքին ավելի մոտ են գտնվում: Աղմուկի դեպքերից միայն հիշեց, որ վերջերս բակի երեխաները պայթուցիկ նյութերով էին խաղացել, զգուշացրել են, այլեւս նման խնդիր չի եղել:

Բնակիչներից մեկն էլ նշեց, որ այն իրենց համար լուսավոր կետ է դարձել, իրենք շատ գոհ են:

Եկեղեցու մոմավաճառն էլ, իր հերթին, ընդգծեց, որ երկիրը կշենանա, եթե նման մարդիկ (խոսքը եկեղեցու բարերարի մասին է) շատ լինեն. «Ժողովուրդն օրհնում է, որ այսպիսի մեծ գործ են արել»:

Եկեղեցու հոգեւոր հովիվ Տեր Զարեհ քահանա Աշուրյանը մեզ հետ զրույցում տեղեկացրեց, որ փոքր եկեղեցին 3 ամսում են կառուցել, նրա բնորոշմամբ՝ «այն չափսերով փոքր է, առաքելությամբ՝ մեծ»: Նորակառույց եկեղեցու սրբապատկերները, չորս խաչքարերը, գմբեթի եւ զանգակատան խաչերը, զանգը, դուռը եւ Մկրտության ավազանը Արարատյան Հայրապետական թեմի առաջնորդական փոխանորդ Գերաշնորհ Տեր Նավասարդ Արքեպիսկոպոս Կճոյանի ձեռամբ օծվել են նոյեմբերի 21-ին: Արարողությանը ներկա են եղել Շենգավիթ վարչական շրջանի ղեկավար Ռազմիկ Մկրտչյանը եւ համայնքի բնակիչները:

Բուն օծման արարողակարգը տեղի է ունեցել նոյեմբերի 30-ին՝ Տեր Նավասարդ Արքեպիսկոպոս Կճոյանի ձեռամբ: Եկեղեցու հոգեւոր հովիվը նշեց, որ օծման օրը եկեղեցում 21 մկրտվող է եղել, նախապես տեղյակ են պահել, որ նման արարողակարգ է նախատեսվում, եւ բոլոր չմկրտվածները տեղում ստացել են: Եկեղեցին կառուցվել է գործարար Աղվան Ավագյանի բարերարությամբ, սակայն մասնակցել են նաեւ տեղի բնակիչները, քահանայի խոսքով՝ բնակիչները եկել, խնդրել են, որ ինչ-որ բանով օգնեն, այսպես ամեն մեկն ինչով կարողացել, օգնել է: Առաջին պսակն էլ եկեղեցում դեկտեմբերի 12-ին է եղել:

Ինչպես նշեց Տեր Զարեհ քահանա Աշուրյանը, այդտեղ եկեղեցու կարիքը զգացվում էր, այն տարածքով մեծ շրջան է, սակայն կենտրոնում եկեղեցի չկար, նրա խոսքով՝ այն կարծես բոլորին միավորում է:

Բակի կենտրոնում գտնվող փոքրիկ եկեղեցու վերաբերյալ փորձեցինք մեկնաբանություն ստանալ Երեւանի քաղաքապետարանից: Լրատվական ծառայությունից պատասխանեցին, որ քաղաքապետարանը կառույցի համար պաշտոնապես շինթույլտվություն չի տվել:

Անի Ավագյան