Եթե ավագանին իմ «նեռվերն» ուտեր, ինչպես Հայկ Մարությանինը, «կպաստեի». Հայկ Պետրոսյանի նոր հումորային ներկայացումը

Ներքին քաղաքականություն, արտաքին քաղաքականություն, կին-տղամարդ հարաբերություններ. Հայկ Պետրոսյանը շարունակում է իր ներկայացումներում կատակել այս թեմաների շուրջ: Անդրադառնում է ամենաքննարկված իրադարձություններին, օրինակ՝ ՀՀ ֆուտբոլի հավաքականի՝ Իտալիայից կրած ցավալի պարտությանն ու ամենաքննարկվող անձանց, օրինակ՝ Նիկոլ Փաշինյանին, Աննա Հակոբյանին, Սերժ Սարգսյանին, Ռոբերտ Քոչարյանին: Նրա նոր մոնոներկայացումը կոչվում է «In Gold We Trust» (թարգմ. մենք վստահում ենք ոսկուն): Դրա պրեմիերան կայացել է դեկտեմբերի 16-ին, ու այն դեռ խաղացվում է:

Դերասանը, որը վերջին շրջանում հանդիսատեսի հետ ավելի հաճախ հանդիպում էր Պարոնյանի անվան երաժշտական կոմեդիայի պետական թատրոնում, այս անգամ ավելի փոքր դահլիճում՝ Պետական կամերային երաժշտական թատրոնում է արդիական թեմաների շուրջ իր մտորումներով կիսվում լսարանի հետ, ու, ինչպես երեւում է, նրա աչքից չեն վրիպել Երեւանի քաղաքապետարանի էմոցիաներով լի ավագանու նիստերը: Նա նշում է, որ ինքն էլ կարող էր մի պաշտոն զբաղեցնել, օրինակ՝ Երեւանի քաղաքապետի:

«Ինքն էլ ա Հայկ, ես էլ եմ Հայկ, բայց ինքը կարգին ա, ես՝ անկարգ: Ես խասյաթով շատ չարաճճի եմ: Էդ ավագանին, որ իմ «նեռվերն» ուտեր, ոնց իր «նեռվերն» ա ուտում, չէի դիմանա, մի կեղտոտ բան կանեի, օրինակ՝ կգնայի գիշերը ավագանուն «կպաստեի»»,- կատակում է նա:

Շարունակելով խոսել ՀՀ ներքին քաղաքականության առանձնահատկություններից՝ դերասանն ուշադրություն է գրավում նրա վրա, թե ինչպես են քաղաքական գործիչները փորձում իշխանություն ստանալ: Պետրոսյանը երկիրը համեմատում է բեռնատարի հետ՝ «Բեռնատար 2020», որի ղեկին այս պահին Նիկոլ Փաշինյանն է: Դրանում կան նաեւ ուղեւորներ, որոնց կարելի է բաժանել 2 մասի. մի մասը փորձում է օգնել, որ երկիրը ճիշտ ուղով գնա, մյուսն մասն էլ ցանկանում է խլել ղեկը:

«Մեր քաղաքական դաշտում «շոֆեռ» դառնալու ձգտումները շատ են»,- ասում է նա:

Ըստ Հայկ Պետրոսյանի՝ կարեւոր է հասկանալ, թե «Բեռնատար 2020»-ն ինչ դիրքորոշում ունի արտաքին քաղաքականության հարցում: Փորձում է վերլուծել՝ ինչ վառելիք կարելի է օգտագործել: Բերում է Ռուսաստանի, ԱՄՆ-ի կամ Իրանի հետ համագործակցության տարբերակները:  

«Եթե ուզում ենք գազով քշել, ուրեմն Ռուսաստանն է, չէ՞, եթե ուզում ենք՝ բենզինով՝ Պարսկաստանը կամ էլ պետք է Ադրբեջանը գրավենք, բենզինը մեզնով անենք (վատ գաղափար չէ, գրանցեք): Եթե ուզում ենք՝ էլեկտրականությամբ գնա, ուրեմն՝ Ամերիկա: Գազը թվում ա՝ էժան ա, բայց ինչ-որ դժվար ա տեղ հասնում: Բենզինը խառն ա, շատ մարդ աչք ունի վրան: Ռուսաստանն էլ իրեն խանդոտ ռուս աղջկա նման ա պահում, ասում ա. «Խայաստա՛ն ջան, եթե ինձանից գազ չվերցնես, Ադրբեջանին եմ տալու»: Մենք էլ վերցնենք-չվերցնենք, մեկ ա, տալու ա: Ամերիկան էլ ասում ա. «Եթե էլեկտրականություն ես ուզում, ուրեմն խոստացիր, որ ոչ բենզին ես վերցնելու, ոչ էլ՝ գազ: Just promise me baby (թարգմ. խոստացիր)»,- ասում է նա ու եզրակացության գալիս, որ մեր վառելիքը մեր միտքն է:

Ներքին ու արտաքին քաղաքական խնդիրներին զուգահեռ դերասանը չի մոռանում կին-տղամարդ հարաբերությունների յուրահատկությունների մասին, որոնք ներկայացնում է որպես ոչ պակաս բարդություններ ունեցող երեւույթ: Նա այն դիտարկում է տարբեր կողմերից ու կանգ առնում հիմնական մի քանի հավերժ թեմաների վրա, որոնցից մեկը խանդն է. երբ, օրինակ, տղան դժգոհություններ է ունենում ընկերուհու հագուստի վերաբերյալ:

««Հարցը խանդը չի, հարցն էն ա, որ չեմ ուզում, որ ինչ-որ փսլնքոտներ նայեն իմ ընկերուհու ոտքերին ու եսմինչեր մտածեն»: Նենց ա ասում՝ ինչ-որ փսլնքոտներ, մեկը ասեր՝ եթե ինչ-որ բարեկիրթ պրոֆեսոր լիներ, կասեր. «Հա՛, պարո՛ն պրոֆեսոր, աղջի՛, գնա մի հատ կարճ «յուբկա» հագի, չե՞ս տեսնում՝ գիտնական մարդ ա»»,- այսպիսի իրավիճակ է ներկայացնում դերասանը:

Վերջին շրջանի ակտիվ թեմաներից է ՀՀ ֆուտբոլի հավաքականը: Թեեւ Իտալիայից կրած 1:9 հաշվով պարտությունից հետո բավական ժամանակ է անցել, խոսակցությունները չեն դադարել: Մարդիկ շարունակում են քննադատել ու դժգոհել: Հայկ Պետրոսյանն էլ փորձում է հումորով մոտենալ:

«Իտալացիներից շատ եմ հիասթափվել. ինչ չտես ազգ դուրս էկան: 4-5 հատ խփել ես, հասկացանք, ի՞նչ ես «գյոռմամիշի» նման: Չելենտանոն ու Բելուչին չլինեին, չէի ներելու հաստատ»,- ասում է նա:

Սրանք մոտ 1.5 ժամ տեւող ներկայացման հիմնական թեմաներից մի քանիսն են: Հայկ Պետրոսյանը դրանք ներկայացնում է տարբեր օրինակներով ու իրավիճակներով, որոնք նկարագրում է առանց ծաղրի, իրեն հատուկ հումորով ու հանդիսատեսի հետ ինտերակտիվ շփմամբ: Դեկտեմբերին նախատեսված վերջին ներկայացումն այսօր է: Սկսվելու է 19:30-ին: