Սիլիկոնյան հովտում 45 ձեռներեցների վերապատրաստման համար կառավարությունը մոտ 600 մլն դրամ կտրամադրի. նախարար

ՀՀ կառավարությունը 1 տարվա համար մոտ 600 միլիոն դրամ է ծախսելու Սիլիկոնյան հովտում ՀՀ 45 ձեռներեցների վերապատրաստման, ապրելու եւ աշխատելու նպատակով: Այս մասին ՀԺ-ի հետ զրույցում ասաց ՀՀ բարձր տեխնոլոգիական արդյունաբերության նախարար Հակոբ Արշակյանը:

Հիշեցնենք՝ օրերս նախարարությունը տեղեկացրել էր, որ կառավարությունն առաջին անգամ պետական կրթաթոշակ կտրամադրի հայ երիտասարդներին՝ ուսանելու Սիլիկոնյան հովտում: Կրթական բացառիկ ծրագիրը նախաձեռնել է նախարարությունը, որը եւ հոգալու է ընտրված հայ ձեռներեցների ուսման հետ կապված բոլոր ծախսերը։

7 շաբաթ տեւողությամբ դասընթացները տեղի են ունենալու Դրեյփերի համալսարանում, որն իր ընտրյալ ուսանողների ու համաշխարհային համբավ ունեցող ձեռնարկատեր-դասախոսների շնորհիվ անվանում են նաեւ «Հերոսների» համալսարան:

Ուսանելու համար հայտերն ընդունվում են մինչեւ հունվարի 27-ը: Կարող են դիմել 21 տարին լրացած այն անձինք, որոնք ունեն ձեռնարկատիրական փորձ, ՏՏ ոլորտը «բեկող» գաղափար, որը ցանկանում են իրագործել Հայաստանում, բացարձակ տիրապետում են անգլերեն լեզվին եւ պատրաստ են դասընթացներից հետո, երկու տարվա ընթացքում, իրենց գիտելիքով կիսվել մարզերի ուսանողների եւ ապագա ձեռնարկատերերի հետ։

Նշենք, որ Դրեյփերի համալսարանը Սիլիկոնյան հովտի ամենահայտնի գիտական կենտրոններից է։ Այն հիմնել է վենչուրային կապիտալիստ Թիմ Դրեյփերը, որը ձեռներեցության եւ բիզնեսի զարգացման յուրօրինակ դասընթացներ է անցկացնում: Այդ համալսարանում դասախոսները պրոֆեսորներ չեն, նրանք իրականում թրծված ձեռնարկատերեր են, որոնք ուսանողների հետ կիսվում են իրենց փորձով՝ նախապատրաստելով նրանց պոտենցիալ ներդրողի հետ հանդիպմանն ու սեփական նախագծի, բիզնես ծրագրի կամ ստարտափի ներկայացմանը։ Համալսարանն այժմ 77 երկրից ուսանող ունի։

Թեմայի վերաբերյալ Հակոբ Արշակյանի հետ մեր զրույցը՝ ստորեւ.

- Պարո՛ն Արշակյան, արդեն դիմողնե՞ր կան:

- Այո՛, հայտարարության օրը օգնականս ինձ տեղեկացրեց, որ հսկայական ակտիվություն է դիտարկվել թե՛ մեր կայքի, թե՛ Դրեյփերի համալսարանի կայքի հոսքերում:

- Քանի՞ տեղ է նախատեսված, քանի՞ մարդ պետք է ընտրվի:

- Տեղերի քանակը, եթե չեմ սխալվում, 3 մասի է բաշխված: Միայն Դրեյփերի համալսարանի համար 15 տեղ է նախատեսված: Առաջին ուսումնական շրջանում նախատեսված է 5 հոգի ուղարկել, դրանից հետո եւս 2 մրցույթ կլինի:

- Այդ ամբողջը կառավարությունը փոխհատուցելո՞ւ է:

- Այո՛:

- Ուսուցանման ընթացքում նախատեսվա՞ծ են այցելություններ խոշոր ընկերությունների գրասենյակներ՝ Գուգլ, Ամազոն:

- Այո՛: Հայկական բարեգործական ընդհանուր միության Սիլիկոնյան հովտի գրասենյակը կազմակերպում է նաեւ լրացուցիչ տուրեր եւ ծանոթություններ տարբեր մեծ ընկերությունների ղեկավարների հետ: Ինչպես նաեւ առանձին ծրագրեր ներդրումային ընկերություններում: Մենք օգնելու ենք, որպեսզի մեր ստարտափներն այնտեղ թե՛ գործընկերային հարաբերություններ ստեղծեն ընկերությունների հետ, թե՛ շուկա մտնեն եւ թե՛ ներդրումներ գրավեն: Ու նաեւ գիտելիք ստանան:

- Ի՞նչ սկզբունքով են ընտրվելու այն մարդիկ, ովքեր պետք է պետության հաշվին գնան ուսում ստանան եւ կարողանան գալ այստեղ իրենց փորձով փոխանակվեն:

- Հանձնաժողով կա, շուտով կհաստատվի դրա կազմը: Հանձնաժողովում ոլորտի պրոֆեսիոնալներ են, ովքեր դիտարկելու են թեկնածությունները: Լինելու են նաեւ Դրեյփերի համալսարանի փորձագետներ: Ամեն ոք չի, որ կարող է գումարը տալ եւ Դրեյփերում սովորել, այդ փորձագետները ֆիլտրում են: Հիմնականում կիրառվելու են այն սկզբունքները, որոնք Դրեյփերի համալսարանն ունի: Դրան գումարած նաեւ մեր առաջնահերթությունները:

- Կարեւո՞ր է, թե դիմորդն ինչ կրթություն կունենա:

- Լավ հարց եք տալիս, անկեղծ ասած՝ այդ հարցին հիմա չեմ կարող պատասխանել, որովհետեւ այդ հանձնաժողովը պետք է առաջնորդվի այդ սկզբունքներով, որոնց հիմա ես ծանոթ չեմ: Հանձնաժողովը կհայտարարի դրա մասին: Բայց չեմ կարծում, թե բարձրագույն կրթությունը կարեւոր չափանիշ լինի: Միանշանակ անգլերենի իմացությունը պետք է գերազանց լինի, տարիքային սահմանափակում կա դրված, որ 21-ից մեծ պետք է լինի: Իհարկե, դիտվելու է նաեւ այն գաղափարը, որով ձեռներեցը ցանկանում է ստարտափ ստեղծել կամ արդեն ստեղծել է:

- Կա՞ հստակ նպատակ, թե ինչ է ուզում կառավարությունն ստանալ այս ամենի արդյունքում:

- Այո՛, այս ամենի արդյունքում մենք ուզում ենք ստանալ այդ բիզնես գիտելիքները եւ ձեռներեցության գիտելիքները, որոնք մեզ մոտ շատ են պակասում: Մենք ուզում ենք, որ այդ մարդիկ այդ գիտելիքներն ստանան, հասկանան, թե ինչպես չափել շուկան կամ ծառայությունը մատուցել, մեծ ընկերություն կառուցել: Արդյունքում պետք է Հայաստանում ունենանք հաջողակ ընկերություններ, եւ 100-ավոր աշխատատեղեր ստեղծվեն:

«TheCrowdfundingFormula.com» կազմակերպության համահիմնադիր Գեւորգ Պողոսյանը մեր զրույցում պատմեց, որ իրենք եւս ժամանակին գնացել են Սիլիկոնյան հովիտ, տարբեր կազմակերպությունների հետ են շփվել, այդ կազմակերպությունների ղեկավար անձնակազմն իր փորձն է փոխանակել հանդիպման ժամանակ: «Հավանաբար Հակոբ Արշակյանի հայտարարածը հենց այդ փորձի փոխանակմանն է վերաբերվում: Եթե այդպիսի փորձի փոխանակում են անում, ապա դա շատ արդյունավետ է: Ես ինքս 2017-ին տուր եմ ունեցել, Ամազոնի, Ֆեյսբուքի ղեկավար մարմինների հետ ենք հանդիպել, ու մինչեւ այսօր այդ փորձը մեզ շատ է օգնում: Ես մինչեւ հիմա ում հետ շփվել եմ այնտեղ սովորածներից, բոլորն էլ ավելի շատ կապեր ձեռք բերելու հարց են լուծել»:

Պողոսյանի խոսքով՝ Դրեյփերի համալսարանը բավականին շատ բան է սովորեցնում ստարտափներին. «Դրեյփերի համալսարանի հիմնադիր Թիմ Դրեյփերը ներդրումների մասին պրակտիկորեն ամեն բան գիտի: Այդ համալսարանում ուսումնառություն անցնելուց հետո մարդը ներդրումներ ներգրավելու պրոցեսը շատ լավ պատկերացնելու է: Մենք ունենք մարդիկ, ովքեր անցել են այդ համալսարանով եւ բավականաչափ գիտելիք ունեն: Բայց գիտելիքն առանց պրակտիկայի քիչ բան կտա, հետեւաբար Սիլիկոնյան հովիտ գնալով՝ անպայման արժե բացի ուսումնառության շրջանն անցնելուց, նաեւ պրակտիկ աշխատող մարդկանց հետ շփվել»:

Հարցին՝ Դրեյփերի համալսարանում ուսանած մարդիկ կկարողանա՞ն այնպիսի փորձ հավաքել, որ Հայաստանում դրանցով փոխանակվեն, Պողոսյանը պատասխանեց. «Դա, իհարկե, կախված է ամեն մեկից: Խիստ կարեւոր է տուրի մասնակիցների ճիշտ ընտրությունը: Այսինքն՝ թե ում ես ուղարկում՝ այդ փորձը ձեռք բերելու: Մարդիկ կան՝ մի անգամ գնացել-եկել են ու քանի տարի է բոլորին պատմում են իրենց սովորածը, իրենց այդ փորձով բոլորի հետ կիսվում են: Մարդիկ կան՝ գնացել-եկել են, առանձնապես ոչ մի կարեւոր բան չեն հասկացել ու, բնականաբար, առանձնապես ոչ մի օգուտ չեն տալիս մնացածին»:

Տպել
1218 դիտում

Չարենցավանում սահմանափակումներ մտցնելու որոշում այս պահին չկա, պարետի որոշումը պատահաբար է հրապարակվել․ խոսնակ

Ստուգման արդյունքները մարտի 31-ի ժամը 9-ից 12-ի դրությամբ. 96 անձի նկատմամբ կազմվել է արձանագրություն

ԱԺ-ն չընդունեց զանգերի և տեղաշարժի մասին տեղեկությունները ֆիքսելու նախագիծը

Ոչ թե ճգնաժամ, այլ աղետ է սպասվում. Արայիկ Հարությունյանը ընտրատարածք է գնացել կնոջ եւ դստեր հետ (լուսանկար)

Մինչեւ ապրիլի 5-ը կարգելվի մարդկանց եւ տրանսպորտային միջոցների մուտքն ու ելքը Չարենցավան. պարետի նոր որոշումը

ՀԿԵ-ն շարունակում է ապահովել երկաթուղային բեռնափոխադրումների իրականացումը

Հայաստանում կորոնավիրուսով վարակվածների ընդհանուր թիվը հասել է 532-ի

Պարո՛ն նախարար, եթե ձեր սխալները դնեմ ֆեյսբուքյան քվեարկության, հետեւանքները ձեզ հաճույք չեն պարգեւի. Լուսինե Բադալյան

Պաշտոնական տվյալներով՝ մինչ այս Իտալիայում գտնվող մեկ հայ է վարակվել կորոնավիրուսով․ փոխնախարար

Հայաստան վերադառնալու համար կան 3 օբյեկտիվ դժվարություններ․ Ավետ Ադոնց

Ոստիկանները թույլ չեն տալիս, որ 3 հոգուց ավելի ընտրողներ մուտք գործեն Արցախի ընտրատեղամասեր. ՀՀ ԱԺ պատգամավորներ

Մնա տանը, վճարիր և փոխացիր անհպում. Idram-ի և IDBank-ի համատեղ թվային հարթակն արդեն իրականություն է

Սիրիայում հայ առաքելության բժիշկները բուժօգնություն են ցուցաբերել 1169 սիրիացու. ականազերծվել է 19697 քմ տարածք

Հայտնի է Հրայր Թովմասյանի եւ նրա սանիկ Նորայր Փանոսյանի գործով առաջին դատական նիստի օրը

Նա Հայաստանի լավ բարեկամն էր, մեր երկրի զարգացման բազմաթիվ նախաձեռնությունների հեղինակ. վարչապետը՝ Կաոլիի մասին

Կառավարության փաթեթը ոնց որ «ֆորդ բոյար»-ը լինի՝ 10 փուլ պետք է անցնես, որ հասնես բարիքի․ Էդմոն Մարուքյան

Իրավիճակի ամբողջ պատասխանատվությունը Բակո Սահակյանի եւ նրա նեղ շրջապատի վրա է. Հայկ Խանումյանը կատարեց իր ընտրությունը

Առողջապահության նախարարությունը համալրվելու է 100 շնչառական նոր սարքով, 60 հազար թեստերով

Սլովակիայի ամենահայտնի ֆուտբոլային թիմերից մեկը լուծարվում է. այնտեղ է խաղում Վահան Բիչախչյանը

Պետք է ջանքեր գործադրել՝ համոզելու քաղաքացիներին, թե ինչու է անհրաժեշտ իրավունքների որոշ սահմանափակում․ Ռուստամ Բադասյան