ՀՖՖ նախագահի չընտրված թեկնածու Գրիգորյանը վստահ է՝ Ռուբեն Հայրապետյանի աջակցության խոսքերը խանգարել են իրեն

Հայաստանի ֆուտբոլի ֆեդերացիայի նախագահի չընտրված թեկնածու Թովմաս Գրիգորյանը վստահ է, որ ՀՖՖ նախկին նախագահ Ռուբեն Հայրապետյանի խոսքերը, որ իրեն է աջակցում, ոչ թե օգնել են, այլ խանգարել։ Այս մասին նա նշեց այսօր՝ դեկտեմբերի 23-ին, ՀՖՖ արտահերթ ժողովից հետո, որի ընթացքում նախագահ ընտրվեց Արմեն Մելիքբեկյանը։

Լրագրողների հետ նրա զրույցը ներկայացնում ենք ստորեւ.

- Ինչպե՞ս եք գնահատում ընտրության արդյունքները։

- Այս պահին շատ էմոցիոնալ եմ, չեմ ուզենա գնահատել։ Ես պետք է այսօրվա կատարվածի հետ, այսպես ասած, քնեմ արթնանամ և որոշումս կայացնեմ։

- Հնարավո՞ր է, որ բողոքարկեք։

- Ես դա նկատի ունեի։ Պետք է առանց էմոցիաների որոշում կայացնեմ։ Այդ որոշումը կկայացնեմ վաղը։

- Ինչո՞ւ ձեզ չհաջողվեց ընտրվել։

- Երևի դուք ինձնից լավ գիտեք։ Նախ, սա աննախադեպ էր Հայաստանի պատմության մեջ։ Այսօր նշվեց, որ տեղի ունեցավ 2 թեկնածուների մրցապայքար։ Բայց, ինչպես գիտեք, անհավասար էր այդ մրցապայքարը։

- Ինչո՞ւ էր անհավասար։

- Օրինակ՝ այս շենքից, այս ռեսուրսից, ութսունքանի աշխատող, օգտվում էր իմ մրցակիցը: Չէ ասի՝ քաղաքական վերնախավը, բայց նաև դա...

- Իշխանության աջակցությունն ունե՞ր։

- Կարծում՝ նաև այդ աջակցությունը։

- Ի՞նչ մակարդակով։

- Դահլիճում ովքեր կային, այդ մակարդակով, ոչ ավելի։

- Կարո՞ղ են այս ընտրությունների արդյունքներն ազդել ձեր գործունեության վրա՝ կապված Լոռի ակումբի հետ։

- Իմ մրցակցի համար կարող էր ճակատագրական լինել, բայց ես հենց վաղն էլ զբաղվելու եմ Հայաստանի Հանրապետության, ինչո՞ւ չէ, նաև Լոռու մարզի ֆուտբոլի զարգացմամբ:

- Համաձա՞յն եք պրոֆեսիոնալ լիգա ստեղծելու գաղափարին։

- Բազմիցս անդրադարձել եմ այդ թեմային։ Եթե լինի կոնցեպտ, եթե լինեն դրանից օգտվելու պարագաներ, այսինքն՝ ակումբները կարողանան նաև եկամուտն ավելացնել, իհարկե, միանշանակ կաջակցեմ։

- Ձեր և Մելիքբեկյանի համագործակցությունը տեսնո՞ւմ եք։ Շնորավորեցի՞ք նրան։

- Այո՛, շնորհավորեցի։

- Ժողովին 9 հոգու անդամությունը կասեցվեց։ Դա ի վնա՞ս ձեզ էր։

- Այո՛, այսօր էլ իմ կարծիքն ասացի. այնտեղ կար խայտառակ 2 կասեցում։ Դա Արնարն էր և ֆուտբոլի զարգացման հիմնադրամը։

- Դրանք ձե՞ր ձայներն էին։

- 9-ից 7-ն իմ ձայներն էին։ Օրինակ՝ զարգացման հիմնադրամն այսօր էլ ֆուտբոլային գործունեություն է ծավալում։ Ամեն ամիս 1 մլն դրամ տրամադրում է մանկական ֆուտբոլին, դուք տեսաք երևի՝ քանի ֆուտբոլիստների վիրահատություններ է արել։ Չեմ ուզենա ցեխ շպրտել, բայց եթե հեռուստատեսությամբ ֆուտբոլային հաղորդում վարելը համարվում է ֆուտբոլային գործունեություն, մանկապատանեկան ֆուտբոլը հովանավորելը, 2000 խաղակոշիկ մարզերում բաժանելը, ազգային հավաքականի ֆուտբոլիստների վիրահատություններն ապահովելը, ինքներդ պատասխանեք, համարվո՞ւմ է ֆուտբոլային գործունեություն, թե ոչ։

- Դուք մի քանի անգամ բարկացած, բայց առանց բարձրախոսի էիք խոսում, չհասկացանք՝ ինչ էր պատճառը։

- Բարկացա նրանից, որ որոշվեց՝ քարտուղարի տեղակալը պետք է վարի նիստը:

- Դա ազդեցություն ունեցա՞վ ելքի վրա։

- Կարող եմ ասել՝ չնչին։

- Ռուբեն Հայրապետյանի հետ ձեր հարաբերություններից կխոսե՞ք։

- Դա կեղծ, շինծու օրակարգ էր, որ ես չկարողացա այս քարոզարշավի ընթացքում խոսել... առաջին 5 օրը խոսում էի, թե Արթուր Վանեցյանի հետ ինչ կապ ունեմ, վերջին 10 օրը, թե Հայրապետյանի հետ ինչ կապ ունեմ։ Այսօր ընտրվել է Մելիքբեկյանը, և նա չի կարող ինձ հետ կապ չունենալ։ Կարո՞ղ է 10 տարի հետո ասեք՝ ես Մելիքբեկյանի ընկերն եմ։

- Ըստ ձեզ՝ Հայրապետյանի հայտարարությունը, որ ձեզ է աջակցում, արդյոք չվնասե՞ց ձեզ։

- Միանշանակ վնասեց։ Անգամ 2 ՀԿ-ներ ինձ ասացին, որ այդ խոսքերից հետո այլևս ինձ չեն սատարում։

- Ռեպրեսիաների մասին էիք գրել։ Մի փոքր բացահայտեք։

-Այդ հարցից օգտվելով՝ ուզում եմ շնորհակալություն հայտնել այն մարդկանց, որ կատարում էին որոշակի ճնշումներ։ Ճնշումներ, որոնց մասին չեմ ցանկանա այսօր խոսել, քանի որ կապված է վաղվա իմ անելիքի հետ։ Շնորհակալություն եմ հայտնում իմ թիմին, շնորհակալություն եմ հայտնում այն ՀԿ-ներին, որոնց հետ ոչ ոք անգամ չփորձեց խոսել վախեցնել: