Պուտինը փորձում է լուծել երկու խնդիր, բայց հնարավոր է, նա կանգնած է Սերժ Սարգսյանի ճակատագրին արժանանալու վտանգի առջեւ

 

ՌԴ նախագահ Վլադիմիր Պուտինի ուղերձից հետո, որում նա խոսել էր սահմանադրական բարեփոխումներ անցկացնելու անհրաժեշտության մասին, Ռուսաստանի կառավարությունը՝ վարչապետ Դմիտրի Մեդվեդեւի գլխավորությամբ, անսպասելիորեն հայտարարեց հրաժարականի մասին։ 

Պուտինը վարչապետի պաշտոնում առաջարկեց Դաշնային հարկային ծառայության ղեկավար Միխայիլ Միշուստինի թեկնածությունը։  Ռուսաստանի խորհրդարանի ներքին պալատը հավանություն տվեց Միշուստինի թեկնածությանը, ինչից հետո ՌԴ նախագահը ստորագրեց նրան Ռուսաստանի վարչապետի պաշտոնում նշանակելու մասին որոշումը։ ՌԴ արդեն նախկին վարչապետ Դմիտրի Մեդվեդեւին առաջարկվեց Անվտանգության խորհրդի քարտուղարի տեղակալի պաշտոնը։

Կստանձնի՞ Մեդվեդեւն այդ պաշտոնը, թե՞ ոչ, ի՞նչ զարգացում կունենա Ռուսաստանում ստեղծված այս իրավիճակը, ինչպե՞ս դա կազդի Հայաստան-Ռուսաստան հարաբերությունների վրա, ի՞նչ է պատրաստվում անել ՌԴ նախագահը իր պաշտոնավարման ժամկետի ավարտից հետո. այս եւ այլ հարցերի վերաբերյալ զրուցել ենք արտակարգ եւ լիազոր դեսպան Արման Նավասարդյանի հետ:

- Պարոն Նավասարդյան, ՌԴ կառավարությունը  հրաժարական տվեց: Եթե շատ ընդհանրական փորձենք գնահատել՝ ի՞նչ է տեղի ունենում Ռուսաստանում: Ի՞նչ խնդիր է փորձում լուծել ՌԴ նախագահ Վլադիմիր Պուտինը:

- Եթե գնահատելու լինենք շատ ընդհանրական, Ռուսաստանում տեղի են  ունենում կարեւոր իրադարձություններ, որոնք նախ՝ ունեն ներքաղաքական բնույթ, սակայն տարածվում են նաեւ աշխարհաքաղաքական ոլորտների եւ միջազգային հարաբերությունների, հետեւաբար նաեւ Հայաստանի արտաքին ու ներքին քաղաքականության վրա, քանի որ Ռուսաստանի հետ մենք ռազմավարական դաշնակից ենք, նույն ռազմաքաղաքական ալյանսի  մասնակիցներ։ Ձեր հարցի երկրորդ մասին պատասխանելով ասեմ, որ Պուտինը, մեծ հաշվով, փորձում է լուծել երկու խնդիր. առաջին՝ հնարավորինս հավասարակշռել ներքաղաքական, հատկապես տնտեսական իրավիճակը, որն այսօր չի խոսում իր իշխանության օգտին, հետեւաբար վնասում է նրա ռեյտինգին՝ (վերջին տվյալներով այն իջել է մինչեւ 47%), մյուս կողմից՝ 2024-ից հետո պահել այն բարձր նշաձողը, որը Ռուսաստանը ձեռք է բերել իր շնորհիվ, անկախ այն հանգամանքից՝ կլինի նա իշխանության գլխին, թե՝ ոչ։

-  Պուտինը հայտարարել է, որ անհրաժեշտ է ոչ թե նոր Սահմանադրություն ընդունել, այլ փոփոխություններ իրականացնել մայր օրենքում: Առաջարկվող փոփոխությունները  վերաբերում են Պետդումայի, Պետական խորհրդի, նահանգապետերի, Սահմանադրական դատարանի դերի մեծացմանը: Քննարկվում է նաեւ ամրագրել, որ նախագահի թեկնածուն պետք է առնվազն վերջին 25 տարիներին ՌԴ-ում բնակված լինի, այլ պետության քաղաքացի չհանդիսանա: Ըստ Ձեզ՝ ի՞նչ նպատակ ունեն այս փոփոխությունները: Պուտինն, ըստ Ձեզ, իր համար ի՞նչ դեր է նախապատրաստել 2024-ից՝ իր նախագահության ժամկետի ավարտից հետո: Նա կմնա՞ որպես ստվերային ղեկավար:

- Առաջարկվող փոփոխություններն, անշուշտ, ունեն բարեկարգման եւ ռեֆորմատիվ միտումներ։ Իսկ ասել՝ Պուտինը կմնա ղեկավար չորս տարի հետո, թե՝ ոչ, իր մեջ պարունակում է գուշակության մեծ դոզա, սակայն, ամենայն հավանականությամբ, Պետխորհուրդը (Գոսսովետ), ներառում է իր մեջ այդ հնարավորությունը։

- Այսինքն՝ կարծում եք, որ հնարավոր է՝ նա դառնա Պետխորհրդի ղեկավար՝ այդպիսով վերահսկելով իշխանության ճյուղե՞րը։

- Բացառված չէ։ Սակայն նման ընտրությունն իր մեջ պարունակում է որոշակի վտանգներ, որոնց մենք ականատես եղանք Սերժ Սարգսյանի կատարած քաղաքական ընտրության դեպքում։ 

- ՌԴ գործող նախագահը, վստահաբար, նախագահի պաշտոնում պատրաստում է նաեւ իրեն փոխարինող: Կարո՞ղ է արդյոք այդ «ժառանգորդը» լինել Միշուստինը: Թե՞ դա կարող է լինել այնպիսի մեկը, որի մասին ոչ ոք պատկերացում անգամ չունի:

- Հավանաբար կլինի Միշուստինը, որն, ըստ լրատվական աղբյուրների, վերջերս առանցքային դեր է խաղացել ՌԴ բյուջետային եւ սոցիալ-տնտեսական քաղաքականության մեջ։  Օգտվելով առիթից՝ կցանկանայի ասել. հայկական մենթալիտետը եւ փիլիսոփայության կառուցվածքը հակված է ամեն ինչում փնտրել ու փնտրում է հայկականը եւ ազգայինը, ինչը հասկանալի է տարբեր պատմական եւ էթնոհոգեբանական մոտիվներով։ Հիմա, երբ ակտիվորեն  շրջանառվում է Միշուստինի «հայ լինելու» ինֆորմացիան, իմ բարի խորհուրդը, հեռու մնալ նրա ծագման մասին ռեալ կամ մտացածին լուրերով ոգեւորվելուց, հետո չհիասթափվելու եւ ֆրուստրացվելու համար։

- Փոփոխություններ են պատրաստվում իրականացնել նաեւ սոցիալական ոլորտներում: Մասնավորապես, Պուտինը խոստացել է մեկ տրիլիոն ռուբլի հատկացնել ծնելիության խթանմանը, սոցիալ-առողջապահական ծրագրերին: Սրանք ի՞նչ նպատակ ունեն:

- Այս փոփոխությունները եւս կարելի է դիտարկել իշխանությունների վարկանիշը բարձրացնելու նպատակի շրջանակներում։

- ՌԴ նախկին վարչապետ Դմիտրի Մեդվեդեւին առաջարկվել է Անվտանգության խորհրդի քարտուղարի տեղակալի պաշտոնը։ Ըստ Ձեզ՝ Մեդվեդեւը կհամաձայնի՞ այդ պաշտոնը ստանձնել:

- Կարծում եմ՝ կհամաձայնի, որովհետեւ չհամաձայնվելու դեպքում լրիվ կհայտնվի պատվավոր թոշակառուի կարգավիճակում եւ քաղաքականության լուսանցքում։

- Պարոն Նավասարդյան, խնդրում եմ գնահատել՝ ՌԴ-ում սկսված գործընթացները որեւէ ազդեցություն կունենա՞ն Հայաստանի վրա՝ որպես ռազմավարական դաշնակցի, որպես հարեւանի, որպես ԵԱՏՄ անդամ պետության…

- Կարծում եմ Հայաստանը կմնա որպես ՌԴ-ի ռազմավարական դաշնակից, քանի որ նոր իշխանությունները նման հարաբերություններ  հաստատել են  Մոսկվայի հետ՝ ի հեճուկս հանրապետության ռեւանշիստական ուժերի, որոնց ես  անվանում  եմ 5-րդ շարասյուն։ Պարզապես, մենք պետք է կարողանանք ճիշտ, խելացի եւ հավասարակշռված արտաքին քաղաքականության կառուցել Ռուսաստանի հետ։ Դրա  համար բոլոր նախադրյալները կան։

Տպել
9584 դիտում

Այսօր մեր գործընկերներին հյուրասիրել ենք ադրբեջանցի զինվորներից առգրավված քաղցրավենիք. Վահրամ Պողոսյան

Բնակավայրերի հրետակոծության հետևանքով լրջորեն վիրավորված հղի կինն էլ, երեխան էլ, փրկվել են. ԱՀ ՄԻՊ

Միջազգային հանրության արձագանքը բավարար չեմ համարում․ Արայիկ Հարությունյան

Արցախում այս պահին կա կապի խնդիր. չեն գործում կանխավճարային համակարգը, SMS-ը

Արցախի ՊՆ–ն հրապարակեց զոհված զինծառայողների անունները

Գարիկ Մարտիրոսյանն ու Միշա Գալուստյանը կոչ են անում Ադրբեջանին դադարեցնել ագրեսիան խաղաղ բնակչության դեմ

Երևանը Ստեփանակերտի կողքին է՝ միշտ և ամեն ինչով. Հայկ Մարությանը հեռախոսազրույց է ունեցել Ստեփանակերտի քաղաքապետի հետ

Հակառակորդին պատճառվել է կենդանի ուժի և զինտեխնիկայի մեծաթիվ կորուստներ. ԱՀ ՊՆ-ն տեսանյութ է հրապարակել

Քարդաշյանը խնդրել է իր հետեւորդներին կոչ անել Սպիտակ Տանը դադարեցնել Ադրբեջանին տրվող ռազմական օժանդակությունը

Առգրավվել է հակառակորդի 11 միավոր զրահատեխնիկա իրենց մարտական լրակազմով, այդ թվում ՀՄՄ-3. ՊՆ

ԱՄՆ կոնգրեսականը կոչ է արել պարզել՝ ով է ռազմական բախումների նախաձեռնողը՝ Ադրբեջանին պատասխանատվության ենթարկելու համար

Արցախի դեմ կռվում է ոչ միայն Ադրբեջանը, այլև Թուրքիան․ ԱՀ նախագահ

Սիրիայից մոտ 4000 գրոհային է մասնակցում Ադրբեջանի սանձազերծած ռազմական գործողություններին

Գյումրու զինվորական կոմիսարիատի բակում հերթեր են գոյացել

Արցախի բնակիչներին ապաստարան տալու անհրաժեշտություն չկա այս պահին․ Զարուհի Բաթոյան

Նիկոլ Փաշինյանը ՊՆ-ում հանդիպել է Զինված ուժերի ղեկավար կազմի հետ

125 հազար դոլարից ավելի գումար է հավաքվել «Մենք ենք, մեր սահմանները. բոլորս Արցախի համար» դրամահավաք-արշավի շրջանակում

Ամբողջ Հայաստանի տարածքում հերթեր են՝ կապված զորակոչին մասնակցողների քանակի հետ․ ՀՀ ՊՆ մամուլի խոսնակ (տեսանյութ)

Սա կանխամտածված պատերազմական հանցագործություն է, որն իրականացվում է խաղաղ բնակիչների դեմ. Սերժ Թանկյան

Նիկոլ Փաշինյանը հեռախոսազրույց է ունեցել Էմանուել Մակրոնի հետ