Երգեցին քիչ, պարեցին կարճատեւ. Գյումրու Վարդանանց հրապարակի շատրվանները կրկին կհիմնանորոգվեն, բայց եռապատիկ թանկ

Գյումրու Վարդանանց հրապարակի շատրվանները կրկին հայտնվել են քննարկումների դաշտում:  Քաղաքապետարանը հերթական վերանորոգման ծրագիրն է առաջարկում՝ նույն բովանդակությամբ եւ նկարագրությամբ, ինչն արվել է 2014-ին:

Խոսքը շատրվանների արդիականացման, ջրային պտույտների եւ լուսաձայնային հնարավորություններով շատրվան ունենալու մասին է: Բովանդակությունը մնացել է նույնը, փոխվել է սակայն ծախսվելիք գումարի չափը: Այն գրեթե եռապատկվել է:

2014  թվականին Վարդանանց հրապարակի վերանորոգման, արդիականացման, նրանց երգել-պարելու հնարավորության ընձեռման համար համայնքի բյուջեից հատկացվել էր 40 մլն դրամ, աշխատանքներն էլ կատարել էր Սամվել Բալասանյանի դասընկեր, անհատ ձեռներեց Մկրտիչ Նալչաջյանը: Հրապարակի շատրվանները, սակայն, չեղան այն, ինչին սպասում էին գյումրեցիները: Դրանք մնացին գունային տարբեր երանգավորումներով սովորական շատրվաններ: Երգեցին քիչ, պարեցին՝ կարճատեւ: Պտտվող սարքերը հիմնականում չգործեցին:

Չնայած գումարը քաղաքապետարանը հատկացրեց առանց ուշացումների, քաղաքապետ Սամվել Բալասանյանն այդ ժամանակ հայտարարեց, որ Նալչաջյանը Գյումրիին նվեր է արել, քանի որ այդ աշխատանքի համար 40 մլն դրամը շատ քիչ է:  Օրերն անցան, ժամանակի ընթացքում էլ շատերը մոռացան, որ Գյումրիին շատրվանային հրաշք էին խոստացել:

Նույն պատմությունը վերակենդանացավ նաեւ այսօր՝ փետրվարի 28-ին կայացած հանրային քննարկման ժամանակ: Սամվել Բալասանյանը հայտարարեց, որ կրկին Վարդանանց հրապարակի շատրվանները հիմնանորոգելու, երգել-պարելու հնարավորությամբ ներկայացնելու նպատակ ունեն: Այս անգամ սակայն, նախատեսվում է համայնքի բյուջեից հատկացնել 113 մլն դրամ: Աշխատանքները վստահվելու է չինական մի կազմակերպության: «Դա այն ընկերությունն է, որն իրականացրել է Վանաձորի շատրվանների արդիականացման աշխատանքները»,- հավելեց Բալասանյանը:

Այս շատրվանների հիմնանորոգումը հիմնավորող փաստաթղթում, որը ներկայացվել էր հանրային քննարկմանը, նշված էր, որ շատրվանը գտնվում է անմխիթար վիճակում, մետաղական խողովակներն ամբողջությամբ ժանգոտվել են, փտել են: Քննարկմանը ներկա ավագանու անդամները հարցրեցին՝ արդյո՞ք այդ մասով կա հստակ մասնագիտական ուսումնասիրության վրա հիմնված կարծիք:

Հարցը զեկուցող քաղաքապետի տեղակալ Կարապետ Մխչյանն ասաց՝ ուսումնասիրությունները եղել են վիզուալ: «Տեսել են, որ կա խողովակներից կաթոցներ, դրանք երբեք չեն փոխվել, կոսմետիկ ներկման ինչ-որ աշխատանքներ են արվել ընդամենը, կա ջրի որոշակի արտահոսք»,- բացատրեց Մխչյանը:

Ավագանու անդամ Լեւոն Բարսեղյանն էլ նկատեց, որ Գյումրիում շատ այլ շատրվաններ կան, ինչո՞ւ  կրկին հիմնանորոգել Վարդանանց հրապարակինը: Սա այն պարագայում, երբ, օրինակ, Սուրբ Ամենափրկիչ եկեղեցու ետնամասում գտնվող շատրվանը տարիներ շարունակ չի շահագործվում: «Ինձ թվում է, մենք մի կերպ յոլա կգնանք կաթացող խողովակներով, էս հրապարակի շատրվաններով կդիմանանք, կպայքարենք մեր դեմ, ջանքեր կներդնենք, ոչինչ, կասենք, ջհանդամ, թող կաթի, բայց էս փողն ափսոս է: Եթե շատրվան, ուրեմն շատրվան: Ես վստահ եմ, որ եթե Ամենափրկչի թիկունքի շատրվանները, կամ գոնե դրա ջրավազանը կարգի բերվի, ահագին հմայիչ ու հաճելի տեղ կդառնա տարածքը: Այլապես, էս կենտրոնացումը լավ բան չէ: Մենք փողը, մարդկանց կենտրոնացնում ենք էս կենտրոնում, փոխանակ քաղաքի այլ հատվածներ էլ ուղղորդենք: Սա առաջարկ է, վերանայեք»,-ասաց Լեւոն Բարսեղյանը:

Ավագանու մեկ այլ անդամ էլ նկատեց, որ 131 մլն հատկացվում է շատրվանների հիմնանորոգման համար, սակայն ընդամենը մեկ տարվա երաշխիք է ակնկալվում, ինչը սխալ մոտեցում է: «131 մլն դրամը դա մոտ 300.000 դոլարն է, եւ մենք ընդամենը 1 տարվա երաշխիք են տվել: Գոնե ժամկետը երկարացնենք»,- առաջարկեց նա:

Սամվել Բալասանյանն ասաց չի նկատել, որ մեկ տարվա երաշխիք է գրված, սակայն ժամկետի երկարացնելը նաեւ պետք է կազմակերպության համար ընդունելի լինի: «Դա քննարկման հարց է: Կարող ենք մեկ տարվա փոխարեն 2 տարի դարձնել, պետք է կազմակերպությունը համաձայնի ուղղակի»,- ասաց քաղաքապետը:

Թե ընտրությունը որ շատրվանի վրա կանգ կառնի այս քննարկումից հետո, դեռ հստակ չէ: Բալասանյանն ասաց հնարավոր է Համաշխարհային բանկի ֆինանսական միջոցներով էլ կարողանան Ամենափրկչի բակի շատրվանը հիմնանորոգել:

«Վարդանանց հրապարակի շատրվանների խողովակները, նասոսները, բոլորը կարող ենք օգտագործել, որովհետե մեզանից էդ կազմակերպությունը միայն ջրավազանն է ուզում, ասել են՝ խողովակները պետք չեն: Դե դրանք էլ մենք կտանենք, կպահեստավորենք, մյուս շատրվանի համար կօգտագործենք, որը որ նոր է, դրանք, էն սովետականները չէ»,- ասաց քաղաքապետը:

Ի դեպ, քանդելուց հետո այլ շատրվանների նորոգման համար օգտագործվելիք խողովակներն այն նույն խողովակներն են, որոնք, ըստ այսօր ներկայացված հիմնավորումների, կիրառելի չեն, քանի որ քայքայված են, մաշված են, եւ ժանգոտված: Նաեւ մեկ նկատառում. ստացվում է, որ 2014 թվականին, երբ 40 մլն դրամ է ծախսվել, ու իրականացվել է շատրվանի հիմնանորոգում, բոլոր խողովակները չէ, որ Նալչաջյանը թարմացրել, նորացրել է: Այլապես այսօր քաղաքապետը սովետական ծակ խողովակներից խոսելու առիթը չէր ունենա: