Հայ գործարարները կկարողանան իրանական միրգ-բանջարեղենը տեղափոխել ՌԴ. Վրաստանի կառավարությունը փոխեց որոշումը

Վրաստանի կառավարությունը փոփոխություններ է կատարել նախորդ շաբաթ կորոնավիրուսի տարածմամբ պայմանավորված իր որոշման մեջ, ինչի շնորհիվ հայ գործարարները կկարողանան տարանցիկ ճանապարհով ՌԴ արտահանել շուրջ 60 բեռնատար իրանական միրգ-բանջարեղենը:

Նշենք, որ նախորդ շաբաթվա որոշմամբ Վրաստանի կառավարությունը որոշել էր արգելել Իրանից Վրաստան արտահանվող ցանկացած բեռ: Բացի այդ, չէր թույլատրվում այն մեքենաների մուտքը, որի վարորդներն Իրանի քաղաքացիներ են: Ինչպես նաեւ արգելվել էր իրանական ապրանքն իրենց տարածքով տարանցիկ արտահանել Ռուսաստան:

Այս պատճառով նախօրեին Իրանից միրգ-բանջարեղեն ներմուծող եւ ՌԴ արտահանող հայ գործարարները խնդրի առաջ էին կանգնել եւ շուրջ 60 բեռնատար իրանական միրգ-բանջարեղեն չէին կարողանում ՌԴ արտահանել:

ՀՀ ԱԳՆ մամուլի խոսնակ Աննա Նաղդալյանը «Հայկական ժամանակ»-ի հետ զրույցում ասաց, որ Վրաստանում Հայաստանի դեսպանությունը հետեւողական է եղել խնդրին: Եվ մարտի 2-ին Վրաստանի կառավարությունը փոփոխություններ է կատարել համապատասխան հրամանագրում, ինչի մասին երեկ երեկոյան հրապարակում է եղել: Այս փոփոխություններով արդեն կթույլատրվի Վրաստանի տարածքով տարանցիկ բեռնափոխադրում կատարել այլ երկրներ, սակայն վարորդները չպետք է լինեն ռիսկային խմբերի: Այսինքն՝ այս դեպքում իրանցի վարորդի փոխարեն հայ վարորդը կարող է առանց խնդրի բեռնատարները տեղափոխել:

Արեւադարձային մրգեր ներկրող «Tropica» ընկերության համահիմնադիր Վահրամ Միրաքյանը ՀԺ-ի հետ զրույցում ասաց, որ hայկական շատ ընկերություններ ու անհատներ Իրանից միրգ ու բանջարեղեն են գնում, մաքսազերծում են Հայաստանում ու ապրանքը վաճառում են ռուսական շուկայում: Իրենց ընկերությունը նույնպես այդպես է անում. միջնորդ են լինում Իրանի ու ՌԴ ի միջեւ, գումար են աշխատում, հարկերն էլ մնում են Հայաստանում: Եվ ստեղծված խնդրի պատճառով շուրջ 60 բեռնատար չէր կարողանում Վրաստանի սահմանով գնալ ՌԴ, քանի որ արգելվում է:

Միրաքյանի խոսքով՝ բեռնատարների մեջ հիմնականում իրանական խնձոր եւ կիվի է, կա նաեւ ծաղկակաղամբ: Անդրադառնալով հարցին, թե ինչքա՞ն ծախս է արվել այդ ապրանքների համար՝ գործարարը պատասխանեց. «Օրինակ՝ կիվին մոտավորապես 1 ֆուռը 15 հազար դոլարի սահմաններում է: Ծաղկակաղամբը՝ ավելի քիչ: Խնձորը մենք չենք բերում, չեմ կարող ասել»:

Նա ասաց, որ Վրաստանի կողմից ի սկզբանե մտցված արգելքն անտրամաբանական էր. «Մրգերի վրա վիրուսների տեւողությունն ընդամենը 48 ժամ է լինում մոտավորապես, այդ ժամանակահատվածում ապրանքը հազիվ հասնում է Հայաստան: Իսկ Հայաստան գալուց իրանական բեռնատարները Երեւան չեն մտնում: Արարատի մարզում տերմինալ կա, իրանական բեռնատարները հավաքվում են այնտեղ, վերահսկողության տակ մաքսազերծում են, տեղափոխում ենք հայկական բեռնատարներ՝ հայ վարորդով ու հայկական բեռնատարներով տեղափոխում ենք Վրաստան: Այսինքն՝ այստեղ ռիսկայնություն չկա, 48 ժամից ավելի է գնում: Իտալիայում էլ կա կորոնավիրուս, երբ Իտալիայից Վրաստան ապրանք է գնում, ուղղակի սահմանի մոտ վարորդին ու մեքենան փոխում են եւ թույլատրում են, որ ապրանքը մտնի Վրաստան»:

Միրաքյանի կարծիքով՝ այստեղ կամայականություն կար Վրաստանի իշխանությունների կողմից Հայաստանի նկատմամբ: «Եթե մեզ նախապես՝ 5 օր առաջ զգուշացնեին, որ այսպիսի խնդիր է լինելու, այդ ապրանքը չէինք պատվիրի, հանգիստ կսպասեինք: Ճիշտ է, կորուստներ կկրեինք չստացած եկամտի տեսքով, բայց գոնե բեռը չէր մնա օդի մեջ»:

Գործարարը 2 տարբերակ էր առաջարկել խնդրի լուծման համար, որոնցից մեկն էլ ի վերջո կիրառվեց. «Քանի որ Վրաստանը չի զգուշացրել նախապես, ապա գոնե հիմա պետք է 3-4 օր հնարավորություն տան այդ ապրանքը Ռուսաստան արտահանելու: Դրանից հետո թող էլի փակեն: Կա եւս մի տարբերակ, որը լավ կլինի թե՛ մեզ, թե՛ ՀՀ-ի համար: Բեռնատարները կլինեն հայկական, հայ վարորդով, շարասյունով, հսկողության տակ կգնան Լարսով կանցնեն: Այդ դեպքում մենք չենք ունենա կորուստներ եւ կշարունակենք բեռնափոխադրումներն ու մատակարարումները դեպի Ռուսաստան: Արդյունքում կշահենք բոլորս»: