Ճշմարտությունը մի երես ունի, եւ գործի հատորներում առկա է այդ ճշմարտությունը. Սեդա Սաֆարյան

Երեւանի ընդհանուր իրավասության դատարանում Ռոբերտ Քոչարյանի եւ մյուսների գործով այսօրվա դատական նիստին տուժողների ներկայացուցիչ Սեդա Սաֆարյանը առարկեց նախագահող դատավոր Աննա Դանիբեկյանին ներկայացված ինքնաբացարկի միջնորդությունների դեմ:

Նա նախ նշեց, որ նախորդ դատական նիստերի ընթացքում նույն դատավորին արդեն երկու անգամ նման միջնորդություն է ներկայացվել, եւ երկու անգամ էլ դրանց բովանդակությունը բխել է Քոչարյանի խափանման միջոցի քննարկման ժամանակ դատավորի իրականացրած գործառույթներից. «Համենայն դեպս, իրենք այդպես են գնահատել, հիմա էլ ինչ որ դրսում հնչել է, դիտում են որպես Ձեր կողմնակալության ապացույցներ»:

Նշենք, որ ինքնաբացարկի միջնորդություն ներկայացնելիս Ռոբերտ Քոչարյանի պաշտպան Հայկ Ալումյանը, հղում կատարելով ԱԱԾ նախկին տնօրեն Արթուր Վանեցյանի եւ ՀՔԾ պետ Սասուն Խաչատրյանի գաղտալսված հեռախոսազրույցին, ընթերցել էր Վանեցյանի մի շարք արտահայտություններ, ինչպես, օրինակ, «ուզես-չուզես՝ Քոչարյանի կալանքը պիտի տաս», «չնայած վարչապետն ասում ա՝ փակեք, բայց խնդրում եմ՝ ուշադիր. ռուսները համը կհանեն» (խոսքը ՀԱՊԿ նախկին քարտուղար Յուրի Խաչատուրովի մասին է,- խմբ.) եւ այլն: Անդրադառնալով այս հանգամանքին՝ Սեդա Սաֆարյանն ընդգծեց, որ մինչ օրս մեզ հայտնի չդարձան այդ հեռախոսազանգի աղբյուրները, ինչպես նաեւ այն, թե երեք պաշտոնյաների, առավել եւս ԱԱԾ տնօրենին ինչպես ձայնագրեցին. «Թե՞ ինքն էլ էր ուզում, որ իրեն ձայնագրեին, նման տպավորություն է, քանի որ այդ զրույցի աղբյուրը մեզ հայտնի չէ»: Սաֆարյանն ընդունեց, որ բոլորն էլ այդ հեռախոսազրույցի վերաբերյալ հայտարարություններ են արել, բայց նշեց՝ իր համար հասկանալի չէ, թե Վանեցյանի հեռախոսահամարը որտեղից է եղել դատավորների ձեռքին, եթե նա այդպիսի ցանկություն չի ունեցել. «Ինձ համար հասկանալի չէ, թե ինչու է Վանեցյանի խոսքը, որ իբր մեղադրանքը ջուր է, համընկնում պաշտպանության կողմի հետ, հասկանալի չէ Վանեցյանի միտքը, թե ռուսներին դուր չի գա, եթե Խաչատուրովին ձերբակալեն, ի՞նչ կապ ունեն ռուսները մեր համակարգերի հետ, հասկանալի չէ, թե ինչու է այդ կարգի հարցապնդումների նախաձեռնողը եղել հենց Վանեցյանը, երբ հենց ինքն է ասում՝ դատավորին ինչ ասեն, ինչ չասեն, որպեսզի հասկանալի լիներ, պետք է նախ այդ հարցերը նրան հղեինք, նոր գային այստեղ, Ձեզ ինքնաբացարկի միջնորդություն ներկայացնեինք՝ չիմանալով անգամ, թե դա ինչ կապ ունի ձեզ հետ»:

Ըստ Սաֆարյանի՝ դրանք այլ նպատակ հետապնդող հայտարարություն են եւ բացարձակապես դատարանի համար չեն. «Դրաք հանրության համար են, ՄԻԵԴ դիմելու համար. ուզում են ասել, որ մեր դատական համակարգում Ռոբերտ Քոչարյանի կողմից 2008 թվականին ստեղծած իրավիճակի պես, դեռ մի բան էլ՝ ավելի վատ իրավիճակ է, ինչը, կարծում եմ, չի հաջողվի իմ գործընկերներին, որովհետեւ ճշմարտությունը մի երես ունի, եւ գործի հատորներում առկա է այդ ճշմարտությունը»:

Սաֆարյանն ընդգծեց՝ եթե պաշտպանության կողմը չի ուզում, որ գործի բուն քննությունը սկսվի, նշանակում է՝ խուսափում է այդ գործի փաստերից. «Ամբողջ միջնորդությունը կառուցված էր դրսում տեղի ունեցած, իրական եւ անիրական փաստերի հիման վրա, բայց Ձեր՝ որպես դատավորի կողմնակալության մասին որեւէ փաստարկ չներկայացվեց, հետեւապես, գտնում եմ, որ կանխակալության վերաբերյալ պատկերացումները փաստարկված չեն»: Ըստ Սեդա Սաֆարյանի՝ ինքնաբացարկը նախկին հանգամանքների կրկնություն էր ներառում, ինչը անթույլատրելի է. «Այսպիսի միջնորդություններն առանց քննության են թողնվում, բայց ես կողմ եմ փոքր-ինչ տարբերվող այդ դիրքորոշումները մերժելուն»,- ասաց նա:

Հիշեցնենք՝ Ռոբերտ Քոչարյանի եւ մյուսների գործը նախագահող դատավոր Աննա Դանիբեկյանն այսօրվա նիստի ավարտից հետո հեռացավ խորհրդակցական սենյակ՝ հերթական անգամ իրեն ներկայացված ինքնաբացարկի միջնորդության վերաբերյալ որոշում կայացնելու: