Առաջին անգամ իր պատմության մեջ ֆուտբոլի Եվրոպայի առաջնությունը հետաձգվեց. ինչպիսի՞ն այն կլինի նախատեսվածից 1 տարի անց

Եվրո 2020-ը պետք է աննախադեպ լիներ, քանի որ առաջին անգամ իր պատմության մեջ մրցաշարը պետք է անցկացվեր եվրոպական 12 քաղաքներում: Այդպիսով ՈՒԵՖԱ-ն նշելու էր Եվրոպայի առաջնության 60-ամյակը: «Մեծ հաճույք է Եվրո 2020-ն այդքան շատ երկրներ ու քաղաքներ տանելու հնարավորություն ունենալը»,- ավելի վաղ ասել էր ՈՒԵՖԱ-ի նախագահ Ալեքսանդր Չեֆերինը: Արդեն հայտնի է, որ նոր ի հայտ եկած անսպասելի հանգամանքը եւս մեկ պատճառ կդառնա, որպեսզի Եվրոպայի ֆուտբոլի 16-րդ առաջնությունն աննախադեպ համարվի. իր պատմության մեջ առաջին անգամ մրցաշարը հետաձգվել է: Տեղի կունենա 2021թ.՝ ոչ թե 4, այլ 5 տարի դադարից հետո:

Այս խաղի պատմության մեջ եղել է դեպք, որ հավաքականների մասնակցությամբ ավելի բարձր մակարդակի մրցաշար չկայանա: 1942 եւ 1946թթ. չեն կայացել ֆուտբոլի աշխարհի առաջնությունները: Դրանք ոչ թե հետաձգվել են, այլ՝ չեղարկվել: Պատճառը եղել է Երկրորդ համաշխարհային պատերազմը, որի ընթացքում եւ հետո Եվրոպան ավելի կարեւոր խնդիրներ ուներ: Ի տարբերություն այս մրցաշարի՝ Եվրոպայի առաջնությունը 1960թ. ի վեր, ինչ անցկացվում է, ո՛չ հետաձգվել է, ո՛չ էլ՝ չեղարկվել:  

Եվրո 2020-ը պետք է մեկնարկեր այս տարվա հունիսի 12-ին եւ ավարտվեր հուլիսի 12-ին, սակայն երեկ՝ մարտի 17-ին, ՈՒԵՖԱ-ն տեսակապի միջոցով ժողով անցակցրեց իր անդամ 55 ասոցիացիաների հետ եւ հայտարարվեց որոշումը, որը, հաշվի առնելով դեպքերի զարգացումը, կանխատեսելի էր: Աշխարհում ստեղծված իրավիճակն ստիպել է եվրոպական երկրներին դադարեցնել իրենց ֆուտբոլային մրցաշարերը, ֆուտբոլիստներն ինքնամեկուսացած են, դադարեցված են նաեւ ՈՒԵՖԱ-ի ակումբային 2 խոշոր մրցաշարերը՝ Չեմպիոնների լիգան եւ Եվրոպա լիգան: Այս պայմաններում տարբեր ելքեր էին առաջարկվում, օրինակ, չեղարկել արդյունքները, եւ մյուս մրցաշրջանն սկսել նույն թիմերով կամ արդյունքներն ամփոել՝ ըստ այս պահի ցուցանիշների եւ այլն:

Ալեքսանդր Չեֆերին

Այս ամենը հանգեցնելու էր ֆինանսական լուրջ կորուստների կամ էլ անարդար իրավիճակ էր ստեղծելու մի շարք ակումբների համար: Օրինակ, եթե առաջնություններն ավարտին չհասցվեն, ինչպես պլանավորված է, ապա Անգլիայի Պրեմիեր լիգան խախտած կլինի 3 միլիարդ ֆունտ ստերլինգ արժողությամբ հեռուստատեսային ցուցադրությունների պայմանագրի իր պարտավորությունները: Իսկ արդյունքների չեղարկման դեպքում «Լիվերպուլը», որը 30 տարի անց այնքան մոտ է Անգլիայի չեմպիոն դառնալուն, կզրկվեր այդ հնարավորությունից, ու դա ոչ թե հանդիպումներում միավորներ կորցնելու կամ մրցավարական որոշումների, այլ իրենից բոլորովին անկախ պատճառներով: Մյուս կողմից, եթե Եվրոպայում որոշեին արդյունքներն ամփոփել եղած ցուցանիշների հիման վրա, ապա, օրինակ, Իսպանիայում չեմպիոն կդառնար «Բարսելոնան», այն դեպքում, որ նրա ոխերիմ մրցակիցը՝ «Ռեալը», հետ է մնում ընդամնեը 2 միավորով ու 1 տուր առաջ էլ սեփական հարկի տակ վստահ հաղթանակ է տոնել կատալոնցիների նկատմամբ (2:0):

Բոլոր մանրուքները հաշվի առնելով՝ ՈՒԵՖԱ-ն կայացրել է որոշում, որը, ինչպես Չեֆերինն է նշել, շատ թանկ է նստելու իրենց վրա, սակայն լավագույն ելքն է: «Եկամտի փոխարեն նախընտրում ենք նպատակը»,- ժողովից հետո ասել է Չեֆերինը՝ ավելացնելով, որ նպատակն էլ այն է, որ իրենց 55 ասոցիացիաներում այս խաղի զարգացումը չտուժի: Ընդգծել է, որ իրենք զոհողության են գնացել, որպեսզի մյուս մրցաշարերը չխափանվեն եւ ազգային լիգաները, որոնք այս պահին դադարեցված են, կարողանան ավարտին հասցնել մրցաշրջանը:

Պորտուգալիայի հավաքականի անագ Կրիշտիանու Ռոնալդու

Այսպիսով 1960թ., 1694թ., 1968թ., 1972թ., 1976թ.,1980թ., 1984թ., 1988թ.,1992թ., 1996թ., 2000թ., 2004թ., 2008թ., 2012թ., 2016թ. եւ ոչ թե 2020, այլ 2021թ.: Սա նշանակում է, որ Պորտուգալիան, որը հաղթել է Ֆրանսիայում կայացած վերջին Եվրոյում, չեմպիոն կմնա 5 տարի: Կդառնա այդ կարգավիճակում ամենաերկարը մնացած հավաքականներից մեկը: Ամենաերկարը չեմպիոն է եղել Իսպանիան (8 տարի), բայց ոչ թե դեպքերի անկանխատեսելի զարգացման պատճառով, այլ պարզապես 2008 եւ 2012թթ. հաղթելու շնորհիվ:

Միջազգային մի շարք պարբերականներ 16-րդ Եվրոյին անդրադառնալիս երբեմն գրում են Եվրո 2021, սակայն ՈՒԵՖԱ-ն կարծես թե չի շտապում այդպես անել, կամ էլ անվանումը չի փոխելու: Հետաձգման որոշումից հետո պաշտոնական կայքում նոր հրապարակում է արվել, թե ինչ պետք է իմանալ Եվրոյի մասին, ու անկախ նրանից, որ մրցաշարը նախատեսված է անցկացնել 2021թ. հունիսի 11-ից հուլիսի 11-ը, ամբողջ տեքստում դրա մասին խոսելիս կայքն օգտագործել է Եվրո 2020 անվանումը:

Մրցաշարի անցկացման կարգում փոփոխություն չի լինելու: Այն կայանալու է նույն 12 քաղաքներում: Դրանք են Հռոմը, Լոնդոնը, Մյունխենը, Սանկտ Պետերբուրգը, Բաքուն, Ամստերդամը, Բիլբաոն, Բուխարեստը, Բուդապեշտը, Կոպենհագենը, Դուբլինը, Գլազգոն: Բացման խաղը լինելու է Հռոմում, ինչպես նախատեսված էր այս տարի: Ձեւաչափը նույնպես անփոփոխ է: 24 ընտրանիները բաժանվելու են 6 խմբի: 1/8 եզրափակիչ են անցնելու առաջին 2 տեղերը գրաված թիմերը, ինչպես նաեւ իրենց խմբերում 3-րդ տեղերը գրաված լավագույն ցուցանիշներն ունեցող 4 թիմերը:

Եվրո 2020-ի որակավորման փուլի 20 մասնակիցները հայտնի են դարձել որակավորման փուլում: 2019թ. նոյեմբերին վիճակահանությամբ ձեւավորվել են նաեւ եզրափակիչ փուլի 6 խմբերը: Մնացած 4 մասնակիցները որոշվելու են փլեյ-օֆի ընթացքում, որին մասնակցելու հնարավորություն են ստացել 16 թիմեր՝ Ազգերի լիգայի առաջին մրցաշրջանում գրանցած ցուցանիշների հիման վրա: Փլեյ-օֆը պետք է տեղի ունենար այս տարի մարտի վերջին, սակայն տեղափոխվել է հունիս, եւ, կախված իրավիճակից, կարող են նոր փոփոխություններ լինել:

Եվրո 2020-ի եզրափակիչ փուլի խմբերն այսպիսին են.

A – Թուրքիա, Իտալիա, Ուելս, Շվեյցարիա

B –  Դանիա, Ֆինլանդիա, Բելգիա, Ռուսաստան

C – Հոլանդիա, Ուկրաինա, Ավստրիա, Ազգերի լիգայի D կամ A դիվիզիոնի փլեյ-օֆի հաղթող

D – Անգլիա, Խորվաթիա, Ազգերի լիգայի C դիվիզիոնի փլեյ-օֆի հաղթող, Չեխիա

E – Իսպանիա, Շվեդիա, Լեհաստան, Ազգերի լիգայի B դիվիզիոնի փլեյ-օֆի հաղթող

F – Ազգերի լիգայի D կամ A դիվիզիոնի փլեյ-օֆի հաղթող, Պորտուգալիա, Ֆրանսիա, Գերմանիա

A լիգայի հաղթողը պետք է ընդգրկվի F խմբում, D լիգայի հաղթողը՝ C խմբում: Եթե A լիգայի հաղթողը լինի Ռումինիան, կխաղա C խմբում, իսկ D-ի խաղթողը կընդգրկվի F խմբում:

Տպել
524 դիտում

ՌԴ դեսպանատունն իր քաղաքացիներին խորհուրդ է տալիս օգտվել ապրիլի 3-ին Երեւան-Սոչի չվերթից

Մահացած երգչուհին պատրաստվում էր կորոնավիրուսի թեստավորում անցնել. քույրը վատառողջ է, նրանց շփման շրջանակը պարզվում է

IDBank-ը երկարաձգում է վարկային արձակուրդը մինչև մայիսի 17-ը և հայտարարում հաճախորդներին աջակցման երկրորդ փուլի մասին

Անցած 1 օրում Հայաստանում գրանցվել է 3 տրանսպորտային պատահար, կա 3 վիրավոր

«Վարդաշեն» ՔԿՀ-ի Պահպանության բաժնի աշխատակիցներից 5-ի մոտ ախտորոշվել է COVID-19

23:59-ից հետո անձանց տեղաշարժը ՀՀ ոստիկանությունը կսահմանափակի. հայտարարություն Արցախ մեկնելու մասին

Զինվորի ծնողը նրան բանակ ուղարկելուց հետո չպետք է ստիպված լինի հոգ տանել, որ որակյալ սնունդ ուղարկի նրան․ վարչապետ

Ցերեկային խնամքի կենտրոններում երեխայի ճանապարհածախսը կհոգա պետությունը

ՀՀ կառավարությունը հաստատեց Վանաձորի Հ․ Թումանյանի անվան պետական համալսարանի ռեկտորի ընտրության արդյունքները

Մինչեւ 18 տարեկան երեխաներ ունեցող ընտանիքներին աջակցություն կտրամադրվի․ կառավարությունը հաստատեց նախագիծը

Միանվագ աջակցություն կցուցաբերենք նաեւ օրավարձով աշխատող մեր հայրենակիցներին. վարչապետ

Արցախում բնակվող 440 միայնակ քաղաքացիներին պետությունը տրամադրում է մեկ ամսվա պարենամթերք և հիգիենիկ պարագաներ

Սիրելի՛ հայրենակիցներ, ես խնդրում եմ այդքան հանգիստ մի վերաբերվեք էս պրոբլեմին․ վարչապետ

Քաղաքացիներին վերահսկելու անհրաժեշտություն են ունենում այն կառավարությունները, որոնք չունեն լեգիտիմություն․ Փաշինյան

«Ֆլայ Արմենիա Էյրվեյզ» ՍՊԸ-ին օդանավի շահագործման վկայական չի տրամադրվել թերությունները չվերացնելու պատճառով

«Սուրբ Գրիգոր Լուսավորիչ» ԲԿ-ն ամբողջությամբ կդատարկվի եւ կծառայի որպես կորոնավիրուսի դեմ պայքարի հիվանդանոց․ Թորոսյան

Խաղաղությունը հնարավոր է այնտեղ, որտեղ դրան հավատում են. Աննա Հակոբյանը՝ ապրիլյան քառօրյայի մասին

2020 թվականի բյուջեի եկամուտները առաջին եռամսյակի տվյալներով գերակատարվել են 8.9 մլրդ դրամով․ վարչապետ

Ախտահանվում է Բագրատաշենի սահմանային կետը. ՍԱՏՄ աշխատակիցները կաշխատեն արտահագուստով

Կարծում եմ, որ Արցախում տեղի են ունեցել բարձր որակի ընտրություններ․ վարչապետ