Կորոնավիրուսի համաճարակի հետեւանքով աշխարհում կարող է աղքատանալ 500 միլիոն մարդ

Կորոնավիրուսի համաճարակի տնտեսական հետեւանքները կարող են աղքատության շեմին հասցնել աշխարհի բնակչության մի մասին: Մասնավորապես, աշխարհում կարող է սովի եւ աղքատության շեմին հայտնվել գրեթե 500 միլիոն մարդ: Այս մասին հայտնում է Associated press գործակալությունը՝ հղում անելով աշխարհում աղքատության դեմ պայքարի միջազգային միավորված կազմակերպության՝ Oxfam-ի տվյալներին:

«Տնտեսական ջախջախիչ հետեւանքներից խուսափել դժվար թե հաջողվի որեւէ երկրի, համաճարակի այդ ավերիչ հետեւանքներն արդեն իսկ նշմարվում են ամբողջ մոլորակով մեկ: Սակայն աղքատ երկրների աղքատ բնակիչները, որոնք ամեն օր պայքար են մղում գոյության համար, գրեթե չունեն երաշխիքներ, որոնք կարող են նրանց ապահովագրել ծայրահեղ աղքատության գրկում հայտնվելուց»,-ասել է Oxfam-ի գործադիր տնօրենի պարտականությունները կատարող Խոսե Մարիա Վերան:

Հիմնվելով Լոնդոնի Արքայական քոլեջի եւ Ավստրալիայի ազգային համալսարանի կողմից անցկացված հետազոտությունների վրա, կազմակերպությունը զեկույց է հրապարակել, որտեղ նշվոմ է, որ պարզվում է՝ աշխարհի բնակչության 6-ից 8 տոկոսը կարող է հայտնվել աղքատության մեջ, քանի որ կորոնավիրուսի համաճարակի տարածման դեմ պայքարող բոլոր կառավարությունների ջանքերի արդյունքում անխուսափելի է տնտեսությունների մի հատվածի կաթվածահար լինելը: Աշխարհում դադարեցվել են արդյունաբերական հարյուրավոր կազմակերպությունների, գործարանների, ձեռնարկությունների աշխատանքները՝ կորոնավիրուսի տարածումը կանխելու նպատակով:

Որպես օրինակ Oxfam-ը նշում է Բանգլադեշը: Այնտեղ ավելի քան 1 միլիոն մարդ է աշխատել տեքստիլ արդյունաբերության ոլորտում, նրանց աշխատանքից ազատել են կամ պարզապես ուղարկել  են տուն՝ անորոշ արձակուրդի՝ պատվերների չեղարկման ու բացակայության պատճառով:

Կազմակերպության զեկույցում նաեւ նշվում է, որ կորոնավիրուսի հետեւանքով ստեղծված իրավիճակն աշխարհում, ի թիվս այլ վնասների, կարող է ոչնչացնել բոլոր այն արդյունքները, որոնք վերջին տասնամյակներում գրանցվել են աղքատության դեմ համաշխարհային պայքարում, իսկ աշխարհի որոշ անկյուններում՝ Մերձավոր Արեւելքում եւ Աֆրիկայում, վիճակը կարող է ավելի լուրջ լինել, քան եղել է 30 տարի առաջ:

Oxfam-ն աշխարհի առաջնորդներին կոչ է անում համաձայնության գալ աղքատ երկրների եւ համայնքների համար տնտեսական օգնության փաթեթ կազմելու շուրջ:

Ընդ որում, AP- ն հիշեցնում է, որ հաջորդ շաբաթ սպասվում է G20- ի պետությունների ֆինանսների նախարարների հանդիպում, ինչպես նաեւ բանակցություններ Արժույթի միջազգային հիմնադրամի եւ Համաշխարհային բանկի շրջանակներում:

Առաջարկվում է նաեւ 500 միլիոն դոլարով ավելացնել միջազգային օգնությունը պետություններին եւ անհապաղ չեղյալ համարել զարգացող երկրների պարտքերի վճարումները 2020 թվականի համար ՝ 1 տրիլիոն դոլարի չափով: Այսպիսով, ինչպես պարզաբանում է Oxfam-ը, վճարների չեղարկումը, օրինակ, Գանայի համար, թույլ կտա այս երկրի կառավարությանը տրամադրել ամեն ամիս 20-ական դոլար 16 միլիոն երեխաների, հաշմանդամների եւ թոշակառուների համար՝ կես տարի շարունակ: Սա փոքր, բայց կարեւոր օգնություն կարող է լինել:

Հիշեցնեցնենք, ապրիլի սկզբին նաեւ ՄԱԿ-ի Արեւմտյան Ասիայի տնտեսական եւ սոցիալական հանձնաժողովը (ESCWA) նախազգուշացրեց, որ արաբական երկրներում մոտ 8,3 միլիոն մարդ աղքատության առջեւ է կանգնած ՝ համաճարակի սոցիալ-տնտեսական հետեւանքների պատճառով:

 Bloomberg-ն էլ գրում է, որ ՄԱԿ-ի համալսարանի Համաշխարհային տնտեսական հետազոտությունների ինստիտուտի զեկույցում նշվում է, որ համաշխարհային տնտեսության զարգացման համար հետազոտողները վերցրել են 3 սցենար, որոնք նախատեսում էին եկամուտի կրճատում 5, 10 կամ 20% -ով:  Մշակվել է նաեւ եկամտի 3 մակարդակ, որոնցից ներքեւ ցուցանիշի գտնվելու դեպքում ենթադրվում է, որ մարդ աղքատության ցածր մակարդակում է գտնվում: Օրինակ, երբ օրական 1.90 դոլար եկամուտ է գրանցվում, մարդը համարվում է աղքատ:

Նշենք, որ է Oxfam-ը բրիտանական ոչ կառավարական կազմակերպություն է, որը զբաղվում է աշխարհում աղքատության դեմ պայքարով եւ աղքատության թվերի հետազոտությամբ: