«Առանց Եսայանների իմացության ընկերության բաժնետերերը կապի մեջ են եղել Անդրեյ Պյատախինի հետ»

«Յուքոմ» ընկերության ղեկավարության ազատման մասին լուրերը մինչ այժմ պաշտոնապես չեն հաստատվում:

Ըստ շրջանառվող լուրերի՝ ընկերության հիմնադիրներ Հայկ եւ Ալեքսանդր Եսայաններն ազատման դիմում են գրել, որոնց էլ հետեւել են մի քանի հարյուր աշխատակիցների նմանաբնույթ դիմումները։ Ըստ տեղեկությունների՝ «Յուքոմ» ընկերության բաժնետերերը ցանկանում են ընկերության գլխավոր տնօրենի պաշտոնում տեսնել «Բիլայն»-ի տնօրեն Անդրեյ Պյատախինին։ Մինչդեռ այսօր «Բիլայն»-ը հայտարարություն տարածեց՝ նշելով, թե Պյատախինը զբաղեցնում է «Բիլայն»-ի տնօրենի պաշտոնը եւ չի պատրաստվում լքել այն։ 

Ըստ էության՝ ընկերության բաժնետերերը ցանկանում են «Վեոն Արմենիա»-ի հետ միացումից հետո Եսայան եղբայրներին դուրս թողնել ընկերության ղեկավարման օղակներից։

Հիշեցնենք, որ 2019-ի դեկտեմբերի վերջին «Վեոն Արմենիա»-ն դիմել էր ՀԾԿՀ եւ ՏՄՊՊՀ՝ ցանկություն հայտնելով իր ապրանքանիշը վաճառել «Յուքոմ»-ին, սակայն ՏՄՊՊՀ-ում արտակարգ դրությամբ պայմանավորված՝ հարցի քննարկումը կասեցվել է։

Սիվիլնեթի հրապարակած տեղեկության համաձայն՝ ընկերության մեծ բաժնետերեր են ՊԵԿ նախկին նախագահի Գագիկ Խաչատրյանի հարազատները։

Ըստ կայքի՝ Գուրգեն եւ Արտյոմ Խաչատրյաններն ունեն յուրաքանչյուրը 11.9 տոկոս բաժնեմաս, իսկ նրանց հորեղբոր որդին՝ Արամ Խաչատրյանը, տնօրինում է բաժնեմասերի 24.34 տոկոսը։

«Յուքոմ»-ի ղեկավար պաշտոններ զբաղեցնող Հայկ եւ Ալեքսանդր Եսայաններից յուրաքանչյուրն ունի 2.97 տոկոս բաժնեմաս։

«Տաշիր գրուպ»-ի սեփականատեր Սամվել Կարապետյանին պատկանող ռուսաստանյան բաժնետիրական առեւտրային «Ֆորա բանկ»-ն ունի 10.5 տոկոս բաժնեմաս։

Օֆշորային «ԱյՅու Թելեքոմյունիքեյթ» ՍՊԸ-ն ունի 29.09 տոկոսի չափով բաժնեմաս, իսկ ԱԺ ՀՀԿ խմբակցության նախկին պատգամավոր Սուրիկ Պողոսյանը, որը նաեւ Սամվել Կարապետյանի քրոջ ամուսինն է, ունի 6.3 տոկոս բաժնեմաս։ 

Նշենք նաեւ, որ նույն հրապարակման մեջ Սիվիլնեթը հայտնել է, որ «Յուքոմ» ընկերության բաժնետոմսերի 89 տոկոսը 2018-ի մայիսից գրավադրված է երեք բանկերում՝ «Էյչ-Էս-Բի-Սի Բանկ Հայաստան»-ում (HSBC), «Արդշինբանկում» եւ «Ամերիաբանկում»։  Արտյոմ, Գուրգեն եւ Արամ Խաչատրյաններին պատկանող բոլոր բաժնեմասերը գրավադրված են։ Գրավադրված է նաեւ «Յուքոմի» մեկ այլ խոշոր մասնակից «Այյու թելեքոմյունիքեյթ» ընկերության 29 տոկոս բաժնեմասը։ Սուրիկ Պողոսյանն իր բաժնեմասերի 5․5 տոկոսն է գրավադրել։ «Յուքոմի» համահիմնադիրներ Հայկ և Ալեքսանդր Եսայանները ևս գրավադրել են իրենց պատկանող 3-ական տոկոս բաժնեմասերը։

Թեմայի վերաբերյալ «Հայկական ժամանակ»-ի հարցերին է պատասխանել «Յուքոմ» ընկերության ղեկավար կազմի ներկայացուցիչներից մեկը, որն այս փուլում նախընտրեց չհրապարկել իր անունը:

- Ի՞նչ է տեղի ունենում ընկերության շուրջ, ի՞նչ խնդիր է առաջացել։  

- Խնդիրը հետեւյալն է. վերջին մի քանի ամիսների ընթացքում ընկերության մյուս բաժնետերերն առանց Եսայանների իմացության կապի մեջ են եղել Անդրեյ Պյատախինի հետ եւ նրա հետ կոնկրետ զարգացումներ են քննարկել։ Դրա մասին «Յուքոմ»-ի ղեկավարությունը չի իմացել։ Դա առիթ է, որպեսզի Հայկ Եսայանը հարց բարձրացնի բաժնետերերի մոտ, թե արդյոք ճի՞շտ են այդ բանակցությունների մասին խոսակցությունները։ Պարզվել է, որ, այո՛, ճիշտ են։ Տրամադրվածություն է եղել Հայկ Եսայանին աշխատանքից հեռացնելու։ Նա էլ, տեղեկանալով այդ մասին, ինքն է որոշել ինքնակամ գնալ եւ իր որոշման մասին տեղյակ պահել մյուս բաժնետերերին եւ գործադիր տնօրենների կազմին։

Դրանից հետո գործադիր տնօրենները, անկախ Հայկից, յուրաքանչյուրը որոշել է, որ իրենք էլ են դուրս գալիս։ Նրանք էլ տեղյակ են պահել իրենց աշխատակիցներին։

- Ո՞րն է պատճառը, որ Հայկ Եսայանին ուզում են փոխել Պյատախինով։ Դժգո՞հ են նրա աշխատանքից։

- Ենթադրում եմ, որ ինչ-որ դժգոհություն կա։ Չնայած տարին տարվա վրա «Յուքոմ»-ն աճել է՝ ի տարբերություն մնացած ընկերությունների։ Գուցե ֆինանսական այլ ակնկալիքներ ունեն նրանք, միգուցե կառավարման մեթոդների տարբերություն կա։

- Քանի՞ աշխատակից ունի ընկերությունը եւ քանի՞ աշխատակից է ազատման դիմում գրել։

- Այս պահին մոտ 560 աշխատակից արդեն դիմում է գրել։ Ընդհանուր աշխատակիցների թիվը 1650 է։ Հիմնականում ղեկավար կազմն է դիմում գրել, եւ մեծ մասամբ՝ տեխնիկական աշխատակիցները։ Իրավիճակն այս պահին սա է։ Հիմա ե՛ւ Հայկ, ե՛ւ Ալեքսանդր Եսայանները պատրաստ են ինչ-որ առաջարկներ քննարկել։

- Այս պահին արդեն ստորագրվե՞լ է այդ աշխատակիցներին աշխատանքից ազատելու դիմումները։

- Իրականում արդեն որոշ մասի ազատման դիմումները հաստատված են։ Ամեն մեկի ղեկավարն ինքն է հաստատում իր ենթակաների ազատման դիմումները, այնպես չէ, որ մարդիկ դիմում են գրում, միանգամից հաստատում են։ Իրենց հետ խոսում են, հասկանում։ Ուզում եմ ասել, որ այս երեւույթը ոչ մի կազմակերպված, սաբոտաժային բնույթ չունի։ Այստեղ ուղղակի Հայկ Եսայանի նկատմամբ մեծ վստահությունն ու հարգանքն է, որն ունեն «Յուքոմ»-ի աշխատակիցները։

- Նշում եք, որ բաժնետերերն են խանգարում, խոսքը Խաչատրյանների եւ Սամվել Կարապետյանի մասի՞ն է։

- Այո՛։

- Եսայանների ազատման դիմումից հետո բաժնետերերն ինչպե՞ս են արձագանքել։

- Բաժնետերերը փորձում են համոզել աշխատակիցներին, որ դուրս չգան, բայց քանի որ այստեղ շատ անհատական հարց է, եւ ղեկավար անձինք են դիմումներ գրել, յուրաքանչյուր մարդ իր որոշումը լավ է պատկերացնում։ Մեզ համար կարեւոր է, որ Հայկի եւ բաժնետերերի միջեւ կոնսենսուս լինի։

- Շուրջ 6 տոկոս ընդհանուր բաժնեմասով Եսայանները ցանկանում են շարունակե՞լ ընկերության ղեկավարումը։

- Այո՛, ճիշտ եք, 6 տոկոս է նրանց բաժնեմասը, բայց, թե ինչ կարգավիճակով կշարունակեն նրանք, եւ ինչ առաջարկ կլինի Հայկ Եսայանին, դեռ չգիտենք։ Ինքն էլ է առաջարկել, որ պատրաստ է գնել այլ բաժնեմասեր եւ մեծ բաժնեմաս ունենալ։

- Ի՞նչ փուլում է «Վեոն Արմենիա»-ի հետ միաձուլումը։

- Պետությունը դեռ պաշտոնապես չի թույլատրել դա։ Մենք գիտենք միայն, որ Պյատախինին առաջարկվել է միաձուլումից հետո զբաղեցնել գլխավոր տնօրենի պաշտոնը։

Թեմայի վերաբերյալ ՏՏ ոլորտի փորձագետ Սամվել Մարտիրոսյանը ՀԺ-ի հետ զրույցում ասաց, որ տվյալների սղությունը թույլ է տալիս ենթադրություններ անել։

«Հիմնվելով առկա տվյալներից՝ կարող եմ ասել, որ վտանգավոր զարգացումներ են տեղի ունենում մեր տելեկոմի համար։ Մենք խիստ կախված ենք հիմա ինտերնետ կապից, ու այս իրավիճակում ունենալ հանկարծակի փլուզում կամ նույնիսկ որակի անկում, կենսական հարված կարող է լինել երկրի մակարդակով»,- ասաց փորձագետը։

Նրա խոսքով՝ եթե ճիշտ են այն լուրերը, որ կոնֆլիկտը կապ ունի «Յուքոմ»-ի՝ «Բիլայն»-ը կլանելու եւ դրա արդյունքում «Բիլայն»-ի տնօրինությանը ընդհանուր ղեկավարությունը տալու հետ, ապա այստեղ հարցեր են առաջանում։

«Օրինակ, թե որքանով է «Յուքոմ»-ը «Բիլայն»-ին կլանում եւ ոչ հակառակը, կամ արդյոք ռուսաստանյան մենաշնորհային դիրքեր են ստեղծվում տելեկոմի ոլորտում, ինչը թերեւս ամենաընդունելի տարբերակները չեն։ Եթե ճիշտ են լուրերը, որ հարյուրավոր աշխատակիցներ են դուրս գալիս, նշանակում է, որ աշխատանքի շուկայում եւս ցնցումներ կարող են լինել, հատկապես այս պահին, երբ սոցիալ-տնտեսական բարդ իրավիճակ է։ Այսինքն՝ սա ակնհայտ ազդեցություն է ունենալու երկրի մակարդակով»,- նշեց փորձագետը։

Մարտիրոսյանի կարծիքով՝ եթե պետությունը թույլ տա «Վեոն Արմենիա»-ի եւ «Յուքոմ»-ի միաձուլումը, ապա գուցե նաեւ պետք է տեր կանգնի այդ որոշմանը։

Տպել
10525 դիտում

Նորք-Մարաշ եւ Նուբարաշեն վարչական շրջաններում դիտարկված 36 տնտեսվարողից 21-ի մոտ ԱԱՏՄ-ն խախտումներ է արձանագրել

Երկրորդ զորամիավորումում հայտարարվել է ուսումնական տագնապ

Արտաքին տուրիզմի մասին խոսելը վաղ է, բայց ներքին տուրիզմի հնարավորությունների հետ պետք է հաշվի նստենք. Տիգրան Պետրոսյան

ՄԻԵԴ-ի վճիռը կարևոր նշանակություն կունենա էթնիկական ատելության հիմքով հանցագործությունների կանխման համար․ Արման Թաթոյան

Ճանապարհաշինություն, մշակույթի տան հիմնանորոգում ու ոչ միայն. Լոռիում եւս 10 սուբվենցիոն ծրագիր է հաստատվել

«Կացնով մարդասպանը», հունգարական անմեղությունն ու արդարությունը՝ 16 տարի անց. միջազգային անդրադարձը՝ ՄԻԵԴ վճռին

Ոստիկանները գրպանահատության հերթական դեպքն են բացահայտել. բերման է ենթարկվել 42-ամյա տղամարդ

Աշխարհը դարձավ անհոտ ու անհամ, աննկարագրելի թույլ էի․ պատմում է COVID-19-ը հաղթահարած լրագրողը

Հրազդանի ոստիկաններն ապօրինի թմրաշրջանառության դեպք են բացահայտել. բերման է ենթարկվել 58-ամյա տղամարդ (տեսանյութ)

Մեկնարկել է «Պատերազմի պայթյունավտանգ մնացորդների և Ականների ռիսկի կրթական ծրագիրը»

Գո՞հ չեք, մենք գոհ ենք․ վարչապետը՝ տրանսպորտի ոլորտում իրանացվելիք նոր ծրագրի մասին

Վախեցնում ես մեզ, որ ի՞նչ անես. մենք վաղուց ավարտել ենք. Սերգեյ Բագրատյանը՝ Նազելի Բաղդասարյանին

Գյումրու պոլիկլինիկաները ստացել են համապատասխան պարագաներ և ցուցումներ. կորոնավիրուսի դրական դեպքերը հսկվում են տանը

2 անչափահաս երեխա, ամուսինն էլ՝ սահմանին. բուժքույրը հերթափոխով աշխատել չի կարող, տնօրենն էլ ասում է՝ պայմանը միայն դա է

Սիրուշոն տեսակապով խոսել է «Թղթե տունը» սերիալի երգչուհու հետ. վերջինս խոստովանել է, որ նոր եթերաշրջան է լինելու

Խախտման մասին արձանագրությունը կներկայացվի պարետատուն. ՍԱՏՄ

«Սրանից հետո դուք եք հերքելու ամեն ինչ. դե, գնացեք հերքեք, տեսնեմ՝ ոնց եք հերքում». Նիկոլ Փաշինյանը՝ ԼՀԿ պատգամավորին

Ունենք կորոնավիրուսի 2 օջախ․ մեկը տուն-ինտերնատն է, մյուսը՝ մանկատունը․ Արսեն Թորոսյան

ԱՆ-ն ձեռք է բերել 500 մատնային պուլսօքսիմետր. դրանք արդեն իսկ բաշխվել են մարզերի եւ Երեւանի հիվանդանոցներին

Իսպանիայում ֆուտբոլասերները գուցե կարողանան մարզադաշտ գնալ հաջորդ մրցաշրջանում