Կենսաչափական ապարանջանները, երեխաների նկատմամբ ամենախիստ կարանտինային միջոցն ու իրավիճակն աշխարհում

Մեծ Բրիտանիան երկարացրել է կարանտինը

Մեծ Բրիտանիայի իշխանություններն այսօր 3 շաբաթով երկարացրել են կորոնավիրուսի հետեւանքով երկրում սահմանված կարանտինային նորմերը: Այս մասին ասուլիսի ժամանակ հայտարարել է երկրի ԱԳ ղեկավար Դոմինիկ Ռաաբը:

Մարտի 26-ից Բրիտանիայում գործող կարանտինը թեեւ երկարացվել է կարճ ժամկետով, սակայն իշխանությունները վստահեցրել են՝ բոլոր գործողությունները կդադարեցվեն,  երբ իրենք վստահ կլինեն՝ կորոնավիրուսի տարածման տեմպերը բավարար չափով թուլացել են:

Վերջին 1 օրում բրիտանական հիվանդանոցներում կորոնավիրուսից մահացել է 861 մարդ՝ ընդհանուր մահերի թիվը հասցնելով 13.728-ի:

Ռաաբը նշել է, որ իրենց չի հաջողվել հասնել վիրուսի տարածման նվազմանը եւ չնայած բազմաթիվ քննադատությունների, իրենց այլ ելք չի մնացել՝ քան երկարացնել կարանտինը:

Մարտի վերջից մինչ այսօր Միացյալ Թագավորության բնակչության մեծ մասին  արգելված է հավաքվել առանձին խմբերով: Բացառություններ են արվել աշխատողների առանձին խմբերի համար միայն: Փողոց դուրս գալ թույլատրվում է բոլորին, սակայն միայն հարգելի պատճառներով, իսկ հարգելի պատճառների երկար ցանկ կա, օրինակ՝ առավոտյան վազքը, ֆիզիկական վարժությունները մաքուր օդում անցկացնելու անհրաժեշտությունը, մթերքների գնումը, թաղման մասնակցելը, դատարան գնալը, արյուն հանձնելը եւ այլն:

Իրավիճակը Եվրոպայում

Ֆրանսիան այսօր հայտնել է 1438 նոր մահվան դեպքի մասին: Համաճարակի բռնկումից ի վեր Ֆրանսիայում սա երբեւէ գրանցված մահերի ամենամեծ ցուցանիշն է: Իրավիճակը ֆրանսիայում մնում է բավական լարված: Ֆրանսիական ավիակիր «Շառլ դե Գոլ»-ի տախտակամածում եւս Covid-19-ի բռնկում է եղել, վիրուս է հայտնաբերվել մոտ 700 նավաստու մոտ, 20-ին հիվանդանոց են տեղափոխել հիվանդության ծանր փուլում:

Ֆրանսիայում եւս խիստ կարանտինային նորմերը երկարաձգվել են մինչեւ մայիսի 11-ը, եւ, ամենայն հավանականությամբ, կրկին կերկարացվեն:

Այսօր կարանտին է հայտարարվել Սերբիայում: Նախնական տվյալներով, այն երկրում կտեւի ընդամենը 84 ժամ:  Այս քայլով երկրի իշխանություններն ուզում են մարդկանց հեռու պահել Զատկի տոնակատարություններին մասնակցելուց, քանի որ հենց այդ օրը հազարավոր քաղաքացիներ են այցելում եկեղեցիներ եւ իրար հյուրընկալում:

Ռուսաստանի Դաշնությունում վերջին 1 օրում կորոնավիրուսի 3448 նոր դեպք է հաստատվել՝ երկրի 78 շրջաններում: Այսօր առավոտյան հրապարակված պաշտոնական տվյալներով, երկրում ընդհանուր առմամբ 27.938 հաստատված դեպք կա՝ 84 շրջաններում, մահացել է 34 մարդ:

Լիխտենշտեյնի իշանություններն անցնում են կենսաչափական ապարանջանների համակարգին: Մարդկանց ձեռքերին հագցված հատուկ ապարանջանները տեղելկացնելու են այն կրողի մոտ կորոնավիրուսի ախտանիշների առկայության մասին՝ եթե ջերմությունը բարձրանա, լինի մարմնի թուլություն, դժվարացած շնչառություն, հաճախացած սրտխփոց:  Ապարանջանների փոխանցած տեղեկատվությունը վերամշակվելու է Շվեյցարիայի լաբորատորիաներից մեկում, ինչից հետո այն կրողն ու անձինք, որոնց հետ վերջինս շփվել է, Covid-19-ի թեստավորում կանցնեն:

Այսօրվանից սկսած Լիխտենշտեյնի Թագավորության ամեն 20-րդ բնակչի ձեռքին հարմարեցվելու է հատուկ ապարանջանը, իսկ մինչեւ ամառվա վերջ՝ երկրի ամբողջ բնակչությունն է ունենանալու կենսաչափական ապարանջան:

Թուլացում Եվրոպայի մյուս հատվածներում

Միաժամանակ, Եվրոպայի այլ բնակավայրերում իրավիճակի թուլացում է նկատվում: Շաբաթվա սկզբից Իսպանիայում սկսել են աշխատել մի շարք գործարաններ ու մասնավոր բիզնեսներ, միլիոնավոր մարդիկ են վերադարձել իրենց աշխատատեղեր: Ճիշտ է, Եվրամիությունը քննադատում է իսպանական իշխանությունների այս որոշումը՝ մտավախություն ունենալով համաճարակի երկրորդ ալիքի բռնկման համար:

Իսպանիայում երեխաներին նախկինի նման դեռեւս արգելված է դպրոց գնալ եւ առհասարակ տնից դուրս գալ՝ ոչ մի պայմանով: Նման խիստ միջոցառում չի կիրառվում եվրոպական ոչ մի այլ երկրում, մինչդեռ երկրի ներսում անգամ պաշտոնյաներից շատերն են դեմ այս որոշմանը՝ վախենալով երեխաների հոգեկան առողջության համար:

Եվրամիության ղեկավարությունը ներողություն է խնդրել Իտալիայից՝ երկրում համաճարակային իրավիճակի հենց սկզբից նրանց բավարար չափով օգնության ձեռք չմեկնելու համար: Իտալիան Եվրոպայում ամենից շատ է տուժել կորոնավիրուսի հետեւանքով, այնտեղ 21.500 մարդ է մահացել: Վիրուսակիրների թվով (165.155) Իտալիային գերազանցել է Իսպանիան (182.816) :

Գերմանիայի կանցլեր Անգելա Մերկելը հայտարարել է, որ հաջորդ շաբաթվանից երկրում կսկսեն աշխատել բոլոր այն խանութները, որոնք կառավարության հրապարակած չափանիշներին կհամապատասխանեն: Մերկելի խոսքով, Գերմանիային հաջողվել է միայն ժամանակավոր եւ փխրուն հաջողություն գրանցել, թեպետ մահացածության ցածր ցուցանիշներով Գերմանիան ամենաբարենպաստ դիրքերում է: Շուրջ 135 000 հիվանդներից այստեղ մահացել է 3804 մարդ:

Առողջապահության համաշխարհային կազմակերպության եվրոպական ստորաբաժանումն այսօր  հայտնել է, որ չնայած որոշ երկրներում գրանցված դրական ցուցանիշներին, մահերի եւ վարակվածության ընդհանուր թվերը մայրցամաքում շարունակում են աճել եւ դեռ շատ վաղ է համաճարակի դեմ պայքարի տեմպերը թուլացնելու համար:

ԱՄՆ-ի պատմության ամենամեծ գործազրկությունը

ԱՄՆ-ի նախագահ Դոնալդ Թրամփն այսօր հայտնել է, որ կհայտարարի նահանգների մի մասում կարանտինի փուլային  չեղարկման ծրագրի մանրամասների մասին: Թրամփը կողմ է հանդես եկել խիստ կարանտինային միջոցառումները հանելու գաղափարին՝ տնտեսությունը փրկելու տեսանկյունից:

Երկրում համաճարակի բռնկումից ի վեր արդեն 21 միլիոն մարդ է դիմել՝ գործազրկության նպաստ ստանալու համար: ԱՄՆ-ի ամբողջ պատմության ընթացքում սա գործազրկության երբեւէ գրանցված ամենամեծ ցուցանիշն է: Ընդ որում, ԱՄՆ-ը առաջատար է դարձել ամբողջ աշխարհում կորոնավիրուսից մահացածության եւ վարակման ցուցանիշներով միաժամանակ:

Ջոն Հոփքինսի անվան հետազոտական համալսարանի տվյալներով, Միացյալ Նահանգներում վիրուսով վարակվածների թիվը գերազանցում է 650 հազարը, մահերի թիվը՝ գերազանցում է 30 հազարը: