Երեւանի Ն․ Աղբալյանի անվան դպրոցի տնօրենի մրցույթի արդյունքները չեղյալ են ճանաչվել. սպասվում է նոր ընտրություն

Երեւանի Նիկոլ Աղբալյանի անվան հ. 19 հիմնական դպրոցը կրկին տնօրեն չունի։ Թեեւ մրցույթի արդյունքներով հաղթող է ճանաչվել նախկին տնօրեն Լիանա Աշրաֆյանը, սակայն Երեւանի քաղաքապետ Հայկ Մարությանի որոշմամբ՝ այդ արդյունքները չեղյալ են ճանաչվել։ 

Տնօրենի թափուր պաշտոնի մրցույթը տեղի է ունեցել սույն թվականի մարտի 6-ին։ Մասնակիցները եղել են 5-ը, փակ քվեարկությամբ 5 կողմ ձայնով հաղթել է Աշրաֆյանը։

Նշենք, որ ամսիներ առաջ մամուլում շրջանառվում էին կառույցում տեղի ունեցող ներքին խմորումների մասին լուրեր։ Դպրոցի կառավարման խորհրդի ու «Կրթական քաղաքացիական նախաձեռնության» անդամ Վահրամ Սողոմոնյանն ավելի ուշ ներկայացրել էր հաստատությունում առկա խնդիրները։ Դրանք վերաբերում էին թե՛ դասասենյակներին, ֆիզկուլտուրայի մարզասարքերին, թե՛ կրթության մակարդակին։

Մրցույթի արդյունքները բողոքարկողը եւս Սողոմոնյանն է։ Նա ՀՀ կրթության, գիտության, մշակույթի եւ սպորտի նախարարին բողոք է ներկայացրել՝ հայտնելով, որ կատարվել են խախտումներ։

Նշվել է ժողովրդավարություն եւ թափանցիկություն չապահովելու, հավակնորդներին անհրաժեշտ տեղեկատվական նյութեր չտրամադրելու, քվեարկության ժամանակ կողմնակալ վերաբերմունքի, մրցույթի հայտարարման հետ կապված խախտումների մասին եւ այլն։

Արդյունքներն ուսումնասիրելու համար ստեղծված հանձնաժողովը եկել է հետեւյալ եզրահանգման․ 2020 թվականի հունվարի 23-ին «Հայաստանի Հանրապետություն» թերթում հրապարակվել է մրցույթ հայտարարելու մասին 1-ին հրապարակումը, իսկ 2-րդը նույն թերթում պետք է լիներ հունվարի 28-ին, սակայն 2020 թվականի հունվարի 27-ի աշխատանքային օրը տեղափոխվել է 2020 թվականի փետրվարի 1-ը՝ շաբաթ օրը (ՀՀ կառավարության 2020 թվականի հունվարի 23-ի «Աշխատանքային օրը տեղափոխելու մասին» որոշման 1-ին կետի համաձայն)։ Անհնարին է դարձել հունվարի 28-ին 2-րդ հրապարակումն այդ թերթում։ Այն հրապարակվել է հունվարի 29-ին`«Հայկական ժամանակ» օրաթերթում, իսկ «Հայաստանի Հանրապետություն»-ում՝ հունվարի 30-ին: «Նորմատիվ իրավական ակտերի մասին» ՀՀ օրենքի 31-րդ հոդվածի 8-րդ մասի համաձայն՝ եթե ժամկետի ավարտը պայմանավորված է վրա հասած իրադարձությամբ, ապա այն ավարտված է համարվում վրա հասած իրադարձության օրվան հաջորդ օրվանից, որով որոշված է ժամկետի ավարտը, իսկ 32-րդ հոդվածի 4-րդ մասի համաձայն՝ եթե ժամկետի վերջին օրը ոչ աշխատանքային օր է, ապա ժամկետի ավարտի օր է համարվում դրան հաջորդող աշխատանքային օրը: Չի պահպանվել կարգի 7-րդ կետի հետեւյալ պահանջը՝ «մրցույթին մասնակցելու մասին հայտերն ընդունվում են հայտարարության երկրորդ հրապարակման օրվանից՝ 30 օրվա ընթացքում»:

«Այսինքն՝ հիմք ընդունելով, որ «Նորմատիվ իրավական ակտերի մասին» ՀՀ օրենքի 31-րդ հոդվածի 7-րդ մասի համաձայն՝ օրերով հաշվարկվող ժամկետը լրանում է այդ ժամկետի վերջին օրը, ապա հայտարարության երկրորդ հրապարակման օրվանից (29.01.2020 թ.) հաշված հայտերի ընդունման 30-րդ օրը փետրվարի 27-ն է եւ ոչ թե հայտարարության մեջ նշված փետրվարի 26-ը: Հետևաբար պետք է տեղափոխվեր նաեւ մրցույթի անցկացման օրը, եւ կարգի 7-րդ կետի համաձայն այն նշանակվեր փաստաթղթերի ընդունման ավարտից հետո յոթերորդ աշխատանքային օրը, որը նույնպես չի կատարվել: Դրանով իսկ վատթարացվել են հավակնորդների իրավունքները»,- գրված է եզրակացության մեջ։

Նշենք, որ ուսումնասիրության արդյունքներից ելնելով՝ հանձնաժողովն առաջարկել է դիմել Երեւանի քաղաքապետին՝ հիմք ընդունելով կարգի 29-րդ կետի 2-րդ ենթակետի պահանջը՝ չեղյալ ճանաչել մրցույթի արդյունքները, ինչպես նաեւ՝ պատասխանել դպրոցի կառավարման խորհրդի անդամ Վահրամ Սողոմոնյանի բողոքին:

Պահանջն ընդունվել է, եւ ավելի ուշ մեզ հետ զրույցում Երեւանի քաղաքապետի մամուլի քարտուղար Հակոբ Կարապետյանը տեղեկացրեց, որ Հայկ Մարությանի ապրիլի 16-ի որոշմամբ՝ այդ արդյունքները չեղյալ են ճանաչվել։ 

Դպրոցի կառավարման խորհրդի անդամ Վահրամ Սողոմոնյանից տեղեկացանք, որ դեռեւս նոր մրցույթ հայտարարված չէ, քանի որ քաղաքապետի որոշումը նոր է հրապարակվել։ Նրա կարծիքով՝ հնարավոր է՝ մրցույթ հայտարարվի մի փոքր ուշ՝ հաշվի առնելով COVID-19-ի պատճառով ստեղծված իրավիճակը։