Փոխհատուցե՞լ չեղարկված ու չկայացած ուղեւորությունների համար. ԵՄ-ն սպառողների կողմից է

Կորոնավիրուսի համաճարակը սեպ խրեց հազարավոր ճամփորդությունների, նախապես ամրագրված տասնյակ հազարավոր ավիատոմսերի վաճառքի եւ ուղեւորությունների վրա:

Ավիաուղեւորներն ու զբոսաշրջիկներն իրավունք ունեն հնարավորինս սեղմ ժամկետներում պահանջել չեղարկված ուղեւորությունների համար նախապես վճարված գումարները: Սակայն, ավիափոխադրումների գրեթե իսպառ բացակայության պայմաններում գումարների ամբողջական վերադարձ տուրօպերատորները երաշխավորել չեն կարող, իսկ ավիաընկերությունների համար դա ուժերից վեր է պարզապես, նրանք կարող են սնանկանալ: Իսկ ի՞նչ անել այս դեպքում: Որոշ երկրներում գտել են ելքը՝ առաջարկելով հաճախորդներին գումարի փոխարեն սերտիֆիկատներ, որոնք իրավունք են տալիս հետագայում կատարել ճամփորդություններ՝ տվյալ գումարի չափով տրվող ուղեւորատոմսով: Նման ճանապարհով է ցանկանում գնալ նաեւ Ռուսաստանի Դաշնությունը, որտեղ, ԶԼՄ-ների փոխանցմամբ, Պետական դումայի քննարկմանն է ներկայացվելու համապատասխան օրենքի նախագիծ:

Եվրամիությունն ասում է՝ ոչ այս ամենին.

Նմանատիպ մտադրություն է ունեցել Գերմանիան: Ընդ որում, ԳԴՀ-ն մտադիր էր սերտիֆիկատային քաղաքականություն մտցնել բոլոր այն օղակներում, որոնք COVID-19-ի թողած հետեւանքներից առավել շատ են տուժել: Այլ կերպ ասած՝ Գերմանիան մտադիր էր ավիաընկերություններին եւ տուրօպերատորներին իրավունք վերապահել չվճարել իրենց հաճախորդներին առձեռն գումարներ՝ անգամ եթե վերջիններս չեն համաձայնում առաջարկվող սերտիֆիկատային տարբերակին: 

Այս նպատակով պաշտոնական Բեռլինը ապրիլին Բրյուսելից պահանջեց COVID-19-ի համաճարակի պատճառով հրաժարվել  սպառողների իրավունքներին վերաբերող մի շարք դրույթներից: Սակայն Եվրահանձնաժողովը՝ Եվրամիության կատարող օրգանը, պատասխանել է վճռական հրաժարումով:

Այսպես, Եվրամիության տրանսպորտի հարցերով հանձնակատար Ադինա Վալեանը Եվրախորհրդարանի տրանսպորտի հանձնաժողովի հետ անցկացվող տեսակոնֆերանսի ժամանակ ասել է. «Անհրաժեշտ է պահպանել ուղեւորների իրավունքը՝ կապված չվերթի չիրականացման դեպքում ուղեւորատոմսի ամբողջական կամ մասնակի փոխհատուցման հետ: Անթույլատրելի է ստիպել մարդկանց հարմարվել սերտիֆիկատային  տարբերակի հետ, այն հնարավոր է միայն կամավոր սկզբունքով, իսկ դրա համար՝ սերտիֆիկատները պետք է լինեն չափազանց գրավիչ եւ շահագրգռեն մարդկանց»:

Միևնույն ժամանակ, Եվրահանձնակատարը հիշեցրել է, որ ԵՀ-ն արդեն շատ բան է արել ավիաընկերություններին աջակցելու համար, մասնավորապես, նպաստել է նրանց պետական օգնություն տրամադրելու պայմանների հաստատմանը: Մեկ այլ օրինակ. Բրյուսելն ակտիվորեն աշխատում է Եվրամիության տարածքում օդային երթեւեկության արագ վերականգնման ռազմավարության մշակման ուղղությամբ:

Բրյուսելը վետո է դրել. Բեռլինը մտադիր է ֆոնդային տարբերակը կիրառել.

Եվրահանձնաժողովի սկզբունքային դիրքորոշումը Ադինա Վալեանը շարադրել է քիչ ուշ նաեւ՝ ԳԴՀ-ին ուղարկված պաշտոնական նամակում:  ՙՄիաժամանակ, մի քանի գերմանացի նախարարների գրավոր դիմել է բելգիացիների արդարադատության հարցերով հանձնաժողովի  հանձնակատար Դիդյե Ռայդերսը:

DPA գործակալության տվյալներով, Ռայդերսը նշել է, որ գիտակցում է տուրիստական ոլորտին անհապաղ աջակցության անհրաժեշտությունը, սակայն միեւնույն ժամանակ հարկավոր է պահպանել սպառողների իրավունքները, մանավանդ, որ համաճարակը վնասել է նաեւ բազմաթիվ մարդկանց, որոնք պարբերաբար ուղեւորափոխադրումներից օգտվելու անհրաժեշտություն են ունեցել:

Դիդյե Ռայդերսը նույնպես կողմ է սերտիֆիկատների տրամադրմանը հաճախորդներին՝ կամավոր սկզբունքով եւ որոշակի պայմանների պահպանմամբ:

Բրյուսելից ուղարկված վետոյին Բեռլինում չցանկացան ուղիղ դեմ գնալ, իսկ մայիսի 5-ին նրանք հրաժարվեցին հարկադիր սերտիֆիկատների գաղափարից: Գերմանիայի Դաշնային Հանրապետության տուրիզմի հարցերով կառավարական հանձնակատար Թոմաս Բարեիչն ասաց, որ այժմ քննարկում է հիմնադրամի տարբերակ, որը սպառողներին կվերադարձնի գնված տոմսերի եւ շրջագայությունների համար վճարված գումարները: Նախնական փուլում պետությունը կարող է միջոցներ նվիրաբերել հիմնադրամին, իսկ ավիաընկերությունները եւ տուրօպերատորները, ժամանակի ընթացքում կփոխհատուցեն հիմնադրամի ծախսերը, քանի որ իրենց բիզնեսը վերակենդանանալու շանսեր ունի:

Ահազանգ սպառողների  իրավունքների խախտումների մասին.

Մինչ այժմ, ըստ Ռուսաստանի ԶԼՄ-ների հրապարակումների, ամբողջովին պարզ չէ, թե օրինագիծը, որը կքննարկվի Պետդումայում, ենթադրու՞մ է Ռուսաստանում հարկադիր սերտիֆիկատների ներդրում: Интерфакс գործակալությունը վկայակոչում է մի մասնագետի, որը կարծում է, որ այս փաստաթուղթը միայն տալիս է իրավական ձեւակերպում եւ հնարավորություն է տալիս օրինականացնել այն գործընթացը, որն արդեն իսկ ընթանում է մարտի վերջից սկսած, երբ տուրօպերատորները հաճախորդներին առաջարկում են տեղափոխել տուրերը այլ ժամկետներ՝ առանց հավելավճարների:

Коммерсант-ը փաստում է, որ տուրօպերատորները կարող են եւ իրավունք ունեն չվերադարձնել զբոսաշրջիկներին արդեն պատվիրված ուղեւորությունների գումարները, այլ դրա փոխարեն առաջարկել նույն գնային սանդղակում այլ ուղեւորության հնարավորություն հետագայում, անգամ եթե հիշյալ ուղեւորության գինը մինչ նշված ժամանակատվածը բարձրանա:

Պարբերականը  մեջբերում է այն մասնագետներին, որոնք կարծում են, որ նման միջոցը «հակասում է սպառողների իրավունքների պաշտպանության գործող օրենքին եւ չի երաշխավորում զբոսաշրջիկների իրավունքները»:

Ամեն դեպքում,  խոսքը  Ռուսաստանի տուրօպերատորների մասին է: Ինչ վերաբերում է ռուսական ավիաընկերություններին, ապա նրանք պարտավոր են պահպանել Եվրամիության տարածքում գործող օդային ուղեւորափոխադրումների կանոնները: Հետեւաբար, ԵՄ երկրներից մեկում Ռուսաստանի Դաշնություն օդանավակայանից թռիչքը չեղարկելուց հետո հաճախորդն իրավունք ունի փոխհատուցում պահանջել եւ պարտավոր չէ համաձայնել սերտիֆիկատների մասին առաջարկների հետ: Եվրահանձնաժողովը պարզապես համոզիչ կերպով հաստատեց դա գերմանական կառավարության հետ վեճի մեջ: