Կրկին խոսում են օլիպիական խաղերը չեղարկելու մասին. ՄՕԿ նախագահը չի բացառում

Հերթական անգամ մամուլում խոսակցություն է տարածվել արդեն իսկ 1 տարով հետաձգված օլիմպիական խաղերը չեղարկելու վերաբերյալ: Նման հավանականության մասին հարցրել են Միջազգային օլիմպիական կոմիտեի նախագահ Թոմաս Բախին, ու նա չի բացառել: Բրիտաական BBC-ն ներկայացրել է վերջինիս մեկնաբանությունն այս թեմայով:

«Անկեղծ ասած՝ ես հասկանում եմ, դու չես կարող անընդհատ 3-5 հազար աշխատակից վարձել կազմկոմիտեի համար: Դու չես կարող ամեն տարի փոփոխել միջազգային մարզական մեծ ֆեդերացիաների օրացուցային պլանները: Դու չես կարող անընդհատ անորոշության մեջ պահել մարզիկներին: Հնարավոր չէ այդքան ծանրաբեռնել օրացույցը օլիմպիական մյուս խաղերի միջոցառումների հետ միասին, հետեւաբար այս առումով ես հասկանում եմ ճապոնացի մեր գործընկերներին»,- ասել է նա:

Հարցին, թե որքանո՞վ է վստահ, որ խաղերը կկայանան, Բախն ուղիղ չի պատասխանել: Նա ընդգծել է, որ դա կախված է հանգամանքներից: Նշել է, որ պետք է սպասեն իրադարձությունների զարգացմանը, որպեսզի տեսնեն՝ ինչ տեսք է աշխարհն ունենալու, ու համապատասխան որոշումներ կայացնեն:

«Մենք պետք է պատրաստ լինենք տարբեր սցենարների: Հստակ նպատակ կա խաղերն սկսել հաջորդ տարի հուլիսին: Սցենարները դիտարկելիս կարող են հարցեր առաջանալ առողջապահական թեմաների վերաբերյալ, գուցե մարզիկների, նրանց որոշ մասի կամ այլ մասնակիցերի կարանտինի անհրաժեշտություն լինի: Ինչպիսի՞ն է լինելու կյանքն օլիմպիական ավանում: Բոլոր սցենարները քննարկման ենթական են, եւ դրա համար եմ ասում, որ սա ահռելի աշխատանք է, քանի որ շատ տարբերակներ կան, ու դրանց մասին հիմա խոսելը հեշտ չէ: Երբ հստակ պատկերացում ունենանք՝ ինչպիսի տեսք կունենա աշխարհը 2021թ. հուլիսին, այդ ժամանակ համապատասպան որոշում կկայացնենք»,- ասել է Բախը:

Նա անդրադարձել է նաեւ կարծիքներին, ըստ որոնց, խաղերը կարող են անցկացվել փակ դռների հետեւում՝ առանց հանդիսականների: Ըստ նրա՝ նման խոսակցությունները ենթադրություններ են: Նա շեշտել է, որ նման տեսարանը չի համապատասխանում օլիմպիական ոգուն:

«Դրանք ենթադրություններ են: Դա այն չէ, ինչ մենք ուզում ենք, քանի որ օլիմպիական ոգու իմաստներից է նաեւ երկրպագուների միավորումը, եւ հենց դա է այդքան յուրահատուկ դարձնում խաղերը, որ աշխահի բոլոր երկրներից երկրպագուները հավաքվում են օլիմպիական մարզադաշում եւ միավորվում են»,- նշել է Բախը:

Ամառային 32-րդ օլիմպիական խաղերը, որոնք պետք է կայանային այս տարի հուլիսի 24-ից օգոսստոսի 9, տեղափոխվել են 2021թ. հուլիսի 23-ից օգոստոսի 8-ը: Ավելի վաղ խաղերի հնարավոր չեղարկան մասին խոսել էր Տոկիո 2020-ի կազմկոմիտեի ղեկավար Յոշիրո Մորին: Նրան հարցրել էին՝ արդյոք հնարավո՞ր է, որ արդեն 1 տարով հետաձգված խաղերը կրկին հետաձգվեն, եթե կորոնավիրուսի վտանգը մնա, նա պատասխանել էր, որ այդ պարագայում ոչ թե կհետաձգվեն, այլ կչեղարկվեն:

Հայաստանն այս պահին Տոկիո 2020-ի 4 ուղեգիր ունի: Անվանական ուղեգրեր ունեն մարմնամարզիկ Արթուր Դավթյանը (բազմամարտ) եւ բռնցքամարտիկ Կորյուն Սողոմոնյանը (52կգ): Եվս 2 ուղեգրեր կան հունահռոմեական ոճի ըմբշամարտում՝ 97 եւ 77 կգ քաշային կարգերում: Դրանք անվանական չեն, սակայն մարզիչները հայտարարել են, որ գնալու են օլիմպիական չեմպիոն, աշխարհի եռակի, Եվորապայի հնգակի չեմպիոն Արթուր Ալեքսանյանը (97կգ) եւ Եվրոպայի առաջնության 3-րդ մրցանակակիր Կարապետ Չալյանը (77կգ):