ՌԴ-ից Ադրբեջան ռազմական արտադրանք է մատակարարվել կաշառքի միջոցով. ձերբակալվել են պաշտոնյաներ

Ռուսաստանի Դաշնությունից դեպի Ադրբեջան կատարվող ռազմական արտադրանքի նախորդ տարվա որոշ փոխանցումները եղել են կաշառքների միջոցով, քրեական գործ է հարուցվել: Ռուսական լրատվամիջոցներին գործի մասին հայտնի է դարձել, նշվում են հստակ անուններ, կան բերման ենթարկված պաշտոնյաներ, իսկ գործարքներին ադրբեջանական կողմի մասնակցության մասին տվյալներ առհասարակ չեն հաղորդվում: Հայտնի չէ նաեւ, թե ռազմական ինչ նշանակության ու ինչ  ծավալի  արտադրանքի մասին է խոսքը, ինչ ժամկետներում այն պետք է մատակարարվեր Ադրբեջանին եւ ում հետ են ռազմատեխնիկական ոլորտի ռուս պաշտոնյաները գործարք կնքել:

Մոսկվայի Խամովնիչեսկի շրջանային դատարանը երեկ 3 մարդու է ձերբակալելու որոշում է կայացրել, որոնք ՌԴ արդյունաբերության եւ առեւտրի նախարարության աշխատակիցների կողմից խոշոր կաշառք ստանալու դեպքի առթիվ հարուցված քրեական գործով առանցքային դերակատարում ունեն:

 Ըստ քննության տվյալների, խոսքը 4,5 միլիոն ռուբլու մասին է, որը արդյունաբերության եւ առեւտրի նախարարության ռազմատեխնիկական համագործակցության վարչության գործող ղեկավար Ռիզվան Գայիրբեկովը Նիժնի Նովգորոդի ավիացիոն ընկերության գլխավոր տնօրեն Վասիլի Կլեպալովից ստացել է կրկնակի նշանակության արտադրանք Ադրբեջան մատակարարելու թույլտվություն տալու համար, հայտնում է Коммерсант-ը:

Ռուսաստանի Դաշնության քննչական կոմիտեի տվյալներով՝ կաշառքի միջնորդը նրանց ընդհանուր ծանոթն է եղել ՝ օտարերկրյա պետությունների հետ ռազմատեխնիկական համագործակցության դաշնային ծառայության վարչության պետ Սերգեյ Գարմաշը:

Չնայած այն հանգամանքին, որ կոռուպցիոն սխեմայով հայտնի այս գործի քննությամբ ՌԴ քննչական կոմիտեի Մոսկվայի կենտրոնական բաժինը դեռ մարտից թր զբաղվում, գործով անցնող առանցքային դեմքերը Ազգային անվտանգության ծառայության կողմից ձերբակալվել են դատական նիստից մի քանի ժամ առաջ ընդամենը: Ձերբակալվածների տներում ու գրասենյակներում օպերատիվ աշխատակիցների անցկացրած խուզարկություններից ու հարցաքննություններից հետո քննչական մարմինը նրանց մեղադրանք է ներկայացրել ու կալանավորման մասին միջնորդագրեր ուղարկել Խամովնիչեսկի դատարան։ Այդ միջնորդագրերի ուսումնասիրությունը  դատարանն ավարտել է ուշ երեկոյան միայն:

Առաջինը երկու ամսով կալանավորել են Նիժնի Նովգորոդի ավիացիոն ընկերության գլխավոր տնօրեն Վասիլի Կլեպանովին, նա մեղադրվում է ՌԴ Քրեական օրենսգրքի 291 հոդվածով (կաշառք տալ)։

Համաձայն քննության տվյալների, Վասիլի Կլեպանովը 4,5 միլիոն ռուբլի է փոխանցել նախարարության աշխատակից Ռիզվան Գայիրբեկովին՝ իրենց ընդհանուր ծանոթի՝ Սերգեյ Գարմաշի միջնորդությամբ։

Ռիզվան Գայիրբեկովը մեղադրվում է առանձնապես խոշոր չափով կաշառք ստանալու մեջ։ Դատարանը նրան մինչ օգոստոսի 4-ը կալանքի տակ առնելու որոշում է կայացրել՝ ենթադրյալ կաշառք տվողի ձերբակալությունից մոտ կես ժամ անց։

Ռուսաստանի Քննչական ծառայության Մոսկվայի գլխավոր քննչական վարչությունում նշել են, որ բոլոր գերատեսչությունները, որոնց աշխատակից են համարվում գործի մասնակիցները, աջակցում են քննությանը։ Գայիրբեկովը ղեկավարում էր Արդյունաբերության ու առեւտրի նախարարության պաշտպանական արդյունաբերական համալիրի դեպարտամենտի ռազմատեխնիկական համագործակցության բաժինը։

Միջնորդ Գարմաշը Ռազմատեխնիկական համագործակցության դաշնային ծառայության պաշտոնյա է։ Ձերբակալումից անմիջապես հետո միջնորդը խոստովանական ցուցմունք է տվել, նա գործի մասնակիցներից միակն է, որը խոստովանել է մեղքը եւ ցուցմունք տվել:

Ինքնախոստովանական ցուցմունքի դիմաց ՌԴ ՔԾ-ն խնդրել է դատարանին նրա հանդեպ տնային կալանք կիրառել։ Խամովնիչեսկի դատարանը բավարարել է այդ միջնորդությունը՝ այն ներկայացնելով դատական նիստի վերջում:

Թե ովքեր են գործի հետ կապ ունեցող ադրբեջանական կողմի մասնակիցները եւ ինչ ղեկավար պաշտոններ են զբաղեցնում, դեռեւս հայտնի չէ:

 Քննության վարկածի համաձայն, 2019 թվականի գարնանը Նիժնի Նովգորոդի ռազմատեխնիկական արտադրանք թողարկող ձեռնարկության գլխավոր տնօրենը խնդրել է իր ծանոթին՝ Սերգեյ Գարմաշին, օգնել ընկերության գործունեության որոշ տեսակների համար լիցենզիա ստանալու հարցում։ Դրանք անհրաժեշտ են եղել՝ օրինական փաստաթղթերով կրկնակի նշանակության արտադրանքն Ադրբեջան մատակարարելու համար։ Կլեպանովը գործը գլուխ է բերել՝ սկզբում 2 միլիոն, իսկ հետո՝ եւս 2,5 միլիոն ռուբլի փոխանցելով Գարմաշին:

Գումարը փոխանցվել է Օվչիննիկովսկայա կառույցի սպասարկման շենքի մուտքի մոտ: Այնուհետ իր աշխատասենյակում գտնվող միջնորդը դրանք հանձնել է արդյունաբերության եւ առեւտրի նախարարության բաժնի պետին: