Քաղաքական հայտարարությունները չեն սահմանափակվում, չեն կարող սահմանափակվել նաև պատասխան քաղաքական հայտարարությունները

Համավարակի ավարտից հետո «Իմ քայլը» խմբակցությունը կորոնավիրուսի հետևանքները մանրամասն վերլուծելու անհրաժեշտություն է տեսնում:  Ընդ որում վերլուծելով տնտեսական, քաղաքական, սոցիալական, առողջապահական, հումանիտար և այլ բաղադրիչները՝ դրանք համեմատվելու են միջազգային ցուցանիշների հետ:

Նպատակը  ճիշտ եզրակացություններ անելն ու հետագայում նման դեպքերում առավել արդյունավետ գործելն է: Այս մասին ԱԺ-ում արտակարգ դրությունը երկարաձգելու մասին քննարկման ժամանակ ասաց «Իմ քայլը» խմբակցության ղեկավար Լիլիթ Մակունցը:  

«Անհրաժեշտ է լինելու նաև, որ բոլորս միասին  հետադարձ հայացք գցենք, և գնահատականներ հնչեցնենք պատասխանելով հարցին, թե բոլոր քաղաքական միավորները և գործիչներն իրենց գործողություններով միացե՞լ են հումանիտար համախմբման մոբիլիզացիային, և արդյո՞ք ձեռնարկել են այնպիսի գործողություններ, որոնցով ստորադասելով քաղաքացիների առողջությունն ու նրանց կյանքի իրավունքը, պատեհ են համարել այս իրավիճակը ծառայեցնել իրենց նեղ անձնական և քաղաքական շահերին: Այդ ամենն առավել ցայտուն է լինելու միջազգային գործընկերների աջակցության և նրանց կողմից մարդասիրական օգնության ձեռք մեկնելու ֆոնին»,-նկատեց Մակունցը:

Հայաստանը բարեհաջող հաթահարելու է համավարակի դժվարությունները: Ըստ Մակունցի, մենք այս ամենից դուրս ենք գալու համախմբված՝ նոր աշխարհում ներկայանալով մեր պետության համար առավել շահեկան դիրքերից:

Նոր կորոնավիրուսի համավարակը մարտահրավեր է համայն մարդկության համար և այն հաղթահարելու ճանապարհին բարդ խնդիրների առաջ են կանգնել անխտիր բոլոր պետություններն, անկախ այն հանգամանքից, թե այդ պետություններն են ինչ հզոր ռազմական ու տնտեսական պոտենցիալ, և կայացած ու հագեցած առողջապահական համակարգ ունեն:

Հիվանդությունը դեռ վատ է ուսումնասիրված, և տարբեր պետություններ հընթացս փոխում են իրենց մարտավարությունը: Սա, ըստ Մակունցի, վերաբերում է թե ԱՀԿ-ին, թե պետություններին: Այս առումով Հայաստանը բացառություն չէ և ՀՀ կառավարությունը չի խորշում ընթացքում շտկումներ մտցնել իր գործողություններում:

Ակնհայտ է սակայն, որ խնդիրների հաղթահարման  համար անհրաժեշտ է համընդհանուր մոբիլիզացիա, ջանքերի համատեղում: Այդ թվում միջազգային ապարեզում:

«Օգտվելով առիթից ԱԺ «Իմ քայլը» խմբակցության անունից իմ երախտագիտության խոսքն եմ ուղղում Վրաստանի, ՌԴ, ԵՄ, ԱՄՆ-ի, Լիտվայի, Չինաստանի  և միջազհային մեր մյուս գործընկերներին՝ Հայաստանին հումանիտար, բժշկական, ֆինանսական աջակցություն ցուցաբերելու համար»,-ասաց Մակունցը:

«Իմ քայլը» խմբակցության ղեկավարն անդևադարձավ նաև, ըստ իրեն՝ առանձին գործընկերների հնչեցրած տեսակետներին և նշեց, որ  բողոքի ձայն հնչեցնելու իրավունքը երաշխավորված է ՀՀ սահմանադրությամբ և օրենքներով, միևնույն ժամանակ նույն սահմանադրությունը ենթադրում է հատուկ իրավիճակներում արտակարգ դրության սահմանում, որն իր հերթին ենթադրում է հատուկ իրավական ռեժիմ:

ՀՀ բոլոր քաղաքացիները, ՀՀ-ում գտնվող բոլոր անձինք պարտադիր ենթարկվելու են այդ իրավական ռեժիմով սահմանված կարգավորումներին՝ անկախ մասնագիտությունից, զբաղեցրած դիրքից, քաղաքակն կուսակցության պատկանելիությունից և այլ առանձնահատկություններից:

«Քաղաքական հայտարարությունները ոչ մեկը չի կարող սահմանափակել, ինչպես չեն կարող սահմանափակվել պատասխան քաղաքական հայտարարությունները:  Ինչ վերաբերում է քաղաքական օրակարգ ձևավորելուն, ապա քաղաքական, ոչ այնքան քաղաքական միավորներն, իհարկե ազատ են քաղաքական օրակարգ ձևավորելում, բայց եթե այդ արտահայտությունը հնչեցնելով նկատի է առնվում վերջին շրջանում շատ ակտիվ շրջանառվող, առնվազն ինձ համար միակ քաղաքական օրակարգը, այն է՝ կառավարության և վարչապետի հրաժարականի պահանջը, ապա վերահստատում եմ արտակարգ դրության պայմաններում «Իմ քայլը» խմբակցության դիրքորոշումը»,-շեշտեց Լիլիթ Մակունցը: