Դուք անցաք թույլատրելիի շեմը. Էնֆիաջյանն ամբիոնին մոտեցավ «Չեք լռեցնելու» պաստառով (տեսանյութ)

ԱԺ փոխնախագահ Վահե Էնֆիաջյանը խորհրդարանում «Բարգավաճ Հայաստան» խմբակցության ղեկավար Գագիկ Ծառուկյանի նկատմամբ քրեական հետապնդում հարուցելուն համաձայնություն տալու վերաբերյալ ՀՀ գլխավոր դատախազի միջնորդության ներկայացումից հետո ԱԺ ամբիոնին մոտեցավ «Չեք լռեցնելու» պաստառով:

«Այլևս ՀՀ-ում դուք անցաք թույլատրելիի շեմը: Ձեզնից յուրաքանչյուրը պետք է հասկանա, որ կանգնած է լուրջ ընտրության առջև՝ իրոք ՀՀ-ում սահմանել նոր Հայաստանի խոստացած սկզբունքների կետե՞րը, թե՞ անցնել այն ճանապարհով, որը եղել է նախկինում: ԱԺ-ում եղել են նմանատիպ նախաձեռնություններ, եւ գիտեք՝ ինչպիսի ընթացք են ունեցել, երբ գլխավոր դատախազը սանկցիայով մտել է Ազգային ժողով՝ այս կամ այն անձին ձերբակալելու համար: Այսօր դուք ոտնձգություն եք իրականացնում Ազգային ժողովի պատգամավորի ինստիտուտի նկատմամբ:

Հունիսի 5-ին Գագիկ Ծառուկյանը խոսել է խնդիրներից, մատնանշել պրոբլեմներ, եւ որեւիցե քաղաքական մեկնաբանություն չի եղել, խոսել են օրենսգրքի որոշ տարրերի մեկնաբանություններով, սա ի՞նչ աշխատելաոճ է:

Փաստեր կան, որոնք պետք է բարձրացնենք: Գագիկ Ծառուկյանի անձի վերաբերյալ ցուցմունք չկա, որեւէ առերեսում տեղի չի ունեցել, սա սկզբից մինչեւ վերջ շինծու գործ է լինելու, դուք ուզում եք լռեցնել 2-րդ քաղաքական ուժին, ընդդիմությանը, չի՛ ստացվելու:

Հայաստանի հպարտ քաղաքացիներ են մահացել կորոնավիրուսից, ո՞վ է տալու այդ մարդկանց մահվան պատասխանը: Վստահաբար, «Իմ քայլը» խմբակցության պատգամավորներ կան, որոնց մեջ կա հայրենասիրություն, պատասխանատվության զգացում եւ տեսնելու ունակություն, նրանց մասին կարելի է հարգանքով խոսել: Հարգելի՛ գործընկերներ, սթափ մտածեք:

2017 թվականի խորհրդարանական ընտրությունների ժամանակահատվածում ԲՀԿ-ն՝ որպես կուսակցություն, չի մասնակցել ընտրություններին, եղել է «Ծառուկյան» դաշինքը, այդ փաստաթղթից սկսած՝ ապատեղեկատվություն է տեղի ունեցել:

Մենք հպարտ կեցվածքով որպես քաղգործիչներ՝ կագնել ենք Գագիկ Ծառուկյանի հետ միասին ժողովրդի կողքին:

Երբ նման գործընթաց էր նախաձեռնված ԱԺ-ում եւ Նիկոլ Փաշինյանին, Արարատ Միրզոյանին եւ մյուս պատգամավորներին ցանկանում էին շինծու գործով զրկել անձեռնմխելիությունից, եւ այդ ժամանակ անանուն նամակներ էի ես ստանում, որ ազգային դավաճանություն ես անում, որ ձեր թիմը սխալ բան է անում, ձերբակալել է պետք, Արցախի հարց կա, իմ պատասխանը կոշտ է եղել, եւ մեր քաղաքական թիմի, մեր որոշումը եղել է այդ գործընթացը տապալելը: Որքանով հնարավոր է եղել, քաղաքական առումով մենք ամեն ինչ արել ենք, ստորագրել ենք եւ ասել, որ պատգամավորի կարծիք ասելու համար ոչ ոք իրավունք չունի պատգամավորին լռեցնելու: Միշտ քաղաքակնության մեջ որքան էլ որ պիտակավորում են, կան բարձր բարոյական նորմեր, ընտրեք այդ բարձր բարոյական նորմերը: Ո՞նց եք պատկերացնում, որ նաեւ ձեր զավակին փորձեն քրեական հետապնդումների ենթարկել, բոլորդ էլ զավակներ ունեք:

ԱԺ պատգամավորին ՀՀ Սահմանադրությամբ տրված են բավարար լիազորություններ՝ գործողություններ իրականացնելու և չլռելու, խնդիրների մասին խոսելու: Հունիսի 5-ին ԲՀԿ առաջնորդը խոսել է խնդիրներից, մատնանշել է խնդիրներ, և ինչպիսին է եղել քաղաքական մեծամասնության արձագանքը, որևիցե քաղաքական մեկնաբանություն չի եղել:

Կյանքում գալիս է ժամանակ, երբ մարդ պետք է իր արածի կամ չարածի համար պատասխանատվության ենթարկվի: Ներկայացված բոլոր փաստաթղթերը իրականության հետ աղերս չունեն, ցանկանում են հասարակության մեջ Գագիկ Ծառուկյանի համբավն արատավորել ու պիտակավորել:

Մենք ավելի կոշտ գնահատականի ենք արժանացնելու մյուս բոլոր քննադատելի որոշումները»,- նշեց Էնֆիաջյանը՝ կրկնելով, որ Գագիկ Ծառուկյանի անձի վերաբերյալ որևէ ցուցմունք չկա, որևէ առերեսում չի եղել, գործն էլ շինծու է՝ խորհրդարանական թիվ 1 ընդդիմադիր ուժին լռեցնելու: 

Մանրամասները՝ տեսանյութում.