Բիթքոինի բիզնես, խուզարկություններ, լարված հարաբերություններ. միջազգային մամուլը՝ Ծառուկյանի գործի մասին

Արդեն 3 օր է համացանցային բոլոր տիրույթները, հայական ողջ մեդիադաշտն ուշի ուշով հետեւում են «Բարգավաճ Հայաստան» կուսակցության առաջնորդ, միլիարդատեր եւ խոշոր սեփականատեր Գագիկ Ծառուկյանի շուրջ ծավալվող իրադարձություններին:

Կիրակի օրը կատարված խուզարկություններին, երեկ ու այսօր խորհրդարանում ծավալված իրադարձություններին, ցույցերին ու ձերբակալություններին, ԱԱԾ հաղորդագրություններին ու իշխող քաղաքական ուժի հետ տարաձայնություններին անդրադարձել են միջազգային շատ լրատվամիջոցներ եւս:

Associated Press գործակալությունը գրում է, որ Հայաստանի անվտանգության ծառայությունները Ծառուկյանին մեղադրում են խաղային ոչ լիցենզավորված բիզնեսներ վարելու մեջ, որոնք զրկում էին կառավարությանը եկամուտներից: Նշվում է նաեւ, որ խորհրդարանը թույլատրել է նրա ձերբակալությունը՝ հարկերից խուսափելու մեղադրանքով: Անդրադառնալով ավելի վաղ կատարված իրադարձություններին, գործակալությունը հայտնում է, որ ոստիկանությունը  ձերբակալել էր Ծառուկյանի մի քանի տասնյակ կողմնակիցների, որոնք հավաքվել էին խորհրդարանի մոտ գտնվող այգում ՝ բողոքելու վերջինիս անձեռնմխելիությունից զրկելու քայլի դեմ:

USnews-ը, հղում անելով  Associated Press-ին մեջբերել է, որ խորհրդարանական մեծամասնություն կազմող վարչապետ Փաշինյանի կուսակցության անդամները միաձայն քվեարկել են Ծառուկյանի անձեռնմխելիության վերացման, այնուհետ՝ նրա ձերբակալության համար:

Daily Independet-ը նշում է, որ Գագիկ Ծառուկյանի ղեկավարած քաղաքական ուժի խորհրդարանական 25 հոգանոց խմբակցությունը բոյկոտել է քվեարակությունը, արդյունքում՝ 1 ժամ տեւողությամբ քվեարկել են միայն իշխող ուժի ներկայացուցիչները: Նշվում է, որ Ծառուկյանը պնդում է՝ բոլոր քայլերը քաղաքական են: Նրա կուսակցությունը զբաղեցնում է Հայաստանի խորհրդարանի 132 տեղերից 25-ը: 

Daily journal-ը կիրակի օրն էր անդրադարձել Հայաստանում կատարվող  իրադարձություններին՝ նշելով, որ 90-ից ավելի մարդ է ձերբակալվել երկրում հայտնի մեծահարուստ, ընդդիմադիր կուսակցության առաջնորդ Գագիկ Ծառուկյանի տան խուզարկությունից հետո ակտիվացած բողոքի ակցիաների ժամանակ: Անդրադառնալով մեղադրանքներին, Daily journal-ը գրում է, որ նա կասկածվում է խաղային գործունեության չթույլատրված գործողությունների իրականացման մեջ, որոնք զրկել են կառավարությանը եկամուտներից:

Հայաստանում ծավալվող եւ Գագիկ Ծառուկյանի շուրջ կատարվող իրադարձություններին ծավալուն վերլուծական հոդվածով անդրադարձել է EvnReport-ը: Հոդվածում նշվում է, նախորդ 2 ռեժիմների ժամանակ ակտիվ գործունեություն ծավալած օլիգարխը եւ երկրի ամենահարուստ անհատներից մեկը ՝ Ծառուկյանը, առավելապես հայտնի է նրանով, որ իր հսկայական հարստությունը նա կուտակել է «ապօրինի հարստացման ու կոռուպցիայի միջոցով»: Բավական սուր պնդումներով հոդվածում ասվում է, որ իր ահռելի ֆինանսական կայսրությունը հնարավոր իրավական պատասխանատվությունից պաշտպանելու համար Գագիկ Ծառուկյանը 2004-ին ստեղծել է իր քաղաքական կուսակցությունը ՝ «Բարգավաճ Հայաստան»-ը:

Մեջբերելով հոդվածները, որոնք մեղսագրվում են Գագիկ Ծառուկյանին, Evnreport-ը հավելում է՝ այն, որ Ծառուկյանը մարմնավորում է օլիգարխիան, անհերքելի է: Ու հիմա, ըստ հոդվածի, կուսակցությունը գործի օրինականությունը սահուն կերպով կապում է քաղաքական հետապնդման հետ: Կուսակցությունը փորձում է քաղաքականացնել կառավարության եւ իրավապահ համակարգի մեղադրանքները, նրանք փորձում են անտեսել ապացույցները եւ կառուցել մեկ այլ պատմություն, որտեղ ԲՀԿ առաջնորդը հաղթածի դիրքերում է եւ անմեղ:

National post-ն էլ, անդրադառնալով խորհրդարանում այսօր տեղի ունեցած 2 քվեարկություններին, հայտնում է, որ ըստ Ծառուկյանի առաջնորդած կուսակցության անդամների, իրենց նկատմամբ քաղաքական հետապնդում է իրականացվում՝ հունիսի 5-ին իրենց առաջնորդի ունեցած ելույթից հետո, որում վերջինս մեղադրել էր ՀՀ իշխանություններին՝ կորոնավիրուսի դեմ պայքարը տապալելու մեջ: Նշվում է, որ Ծառուկյանը կասկածվում է քվե գնելու, խարդախության ու հողերի ապօրինի յուրացման մեջ:

Ծառուկյանին առնչվող քրեական գործերին, խուզարկություններին ու ցույցերին անդրադարձել է նաեւ BBC-ն, իսկ այս օրերին ծավալվող իրադարձություններին եւ այդ բոլորի նախապատմությանն առավել մանրամասն ու ծավալուն անդրադարձ է կատարել BBC-ի ռուսական ծառայությունը: Հոդվածում բացահայտվում են վաղուց մոռացված մանրամասներ, ներկայացվում տարիների վաղեմություն ունեցող տեղեկություններ:

Օրինակ, հոդվածում խոսվում է Նիկոլ Փաշինյան-Գագիկ Ծառուկյան հարաբերությունների մասին, որոնք, ըստ հոդվածագրի, երկարամյա պատմություն ունեն:

«Նրանց առաջին բախումը եղել է 2004-ին, երբ պայթեցվել էր այն տարիներին որպես լրագրող-խմբագիր աշխատող Նիկոլ Փաշինյանի Նիվա մակնիշի մեքենան ու  վերջինս դրանում մեղադրում էր Ծառուկյանին, որը, ըստ նրա, դժգոհ էր եղել իր հոդվածներից մեկից: Հաջորդիվ տեղի ունեցող իրադարձությունների ժամանակ Ծառուկյանն ու Փաշինյանը բարիկադների տարբեր կողմերում էին, Փաշինյանն ակտիվ ընդդիմադիր գործունեություն էր ծավալում, Ծառուկյանը՝ հարմարվում իշխանական բոլոր փոփոխություններին ու զարգացնում իր բիզնես-կայսրությունը:

Նրանք կրկին բախվեցին 2018-ին խաղաղ հեղափոխության ժամանակ, երբ Ծառուկյանի խորհրդարանական կուսակիցները աջակցություն հայտնեցին Փաշինյանի պայքարին եւ խորհրդարանում օգնեցին նրան՝ գալ իշխանության»,-ասվում է BBC-ի հոդվածում:

Հոդվածագիրը նաեւ մի քանի տվյալներ է ներկայացրել ՝ նշելով, որ Ծառուկյանը վառ դեմք է հետխորհրդային քաղաքականության մեջ: Նախկին պրոֆեսիոնալ մարզիկը, որն իրեն նախկինում համեմատել է Դոնալդ Թրամփի հետ, պահում է արջեր, առյուծներ ու այլ էկզոտիկ կենդանիներ, ղեկավարում է կուսակցություն ու կապեր ստեղծում Մոսկվայում ու Լոնդոնում: Այս ամենով հանդերձ, ըստ հոդվածագրի, նա մշտապես չի մոռանում իր ավտոսրահների, հեռուստաընկերության, գարեջրագործարանի, կոնյակի գործարանի, կազինոների ու մյուս բիզնեսների զարգացումը, որոնց վերջերս ավելացրել է ժամանակակից բիզնես-տեսակը՝ բիթքոինների գիգանտ-ընկերությունը:

Ի հավելումն ասվում է, որ Ծառուկյանի կուսակցությունը ՌԴ իշխող «Եդինայա Ռոսիա»-ի վաղեմի գործընկերն է: