ԲԴԽ-ն քննում է դատավոր Ալեքսանդր Ազարյանին կարգապահական պատասխանատվության ենթարկելու հարցը

Բարձրագույն դատական խորհրդում այսօր սկսվեց ՀՀ արդարադատության նախարարի միջնորդության քննությունը Վերաքննիչ քրեական դատարանի դատավոր Ալեքսանդր Ազարյանին կարգապահական պատասխաանտվության ենթարկելու վերաբերյալ:

Նիստին ներկայացել է դատավոր Ալեքսանդր Ազարյանը, նրա փաստաբան Տիգրան Աթանեսյանը, արդարադատության նախարար Ռուստամ Բադասյանը եւ նախարարի ներկայացուցիչ Գասպարյանը:

Նիստի մեկնարկին, սակայն, մինչ բուն միջնորդության քննությունը, ԲԴԽ անդամ, Երեւանի ընդհանուր իրավասության դատարանի դատավոր Մեսրոպ Մակյանը ինքնաբացարկ հայտնեց՝ հիմքում դնելով այն հանգամանքը, որ դատավոր Ալեքսանդր Ազարյանի՝ սույն գործով ներկայացուցիչը՝ փաստաբան Տիգրան Աթանեսյանը, իր ընկերն է.

«Հարկ եմ համարում տեղեկացնել, որ Տիգրան Աթանեսյանը հանդիսանում է իմ ընկերը, որի հետ դեռեւս 1992 թվականից գտնվում եմ մտերիմ հարաբերությունների մեջ, երբ սովորել ենք ԵՊՀ իրավագիտության ֆակուլտետի նույն կուրսում, ավելին՝ այժմ հանդիսանում եմ նրա կրտսեր որդու՝ Աշոտ Աթանեսյանի կնքահայրը: Բացի այդ, նա հանդիսանում է ավագ եղբորս որդու՝ Վահե Մակյանի հարսանիքի քավորը, որը, նույնպես հանդիսանալով փաստաբան, Տիգրան Աթանեսյանի հետ աշխատում է նույն փաստաբանական գրասենյակում: Վերոգրյալ փաստերը հայտնի են իրավաբանական հանրության լայն շրջանակին»,- ասաց Մակյանը՝ նշելով, որ սա հաշվի առնելով՝ նախկինում իրեն մակագրված որոշ գործերով, որոնցում ներգրավված է եղել Աթանեսյանը, ինքը հայտնել է ինքնաբացարկ, եւ այժմ էլ գտնում եմ, որ անկողմնակալ դիտորդմի մոտ կարող են կասկածի տակ դրվել իր՝ որպես ԲԴԽ անդամի անաչառությունը դատավոր Ազարյանի գործի քննությունն իրականացնելիս:

ԲԴԽ նախագահ Ռուբեն Վարդազարյանը հետաքրքրվեց, թե կողմերն ինչ դիրքորոշում ունեն դրա վերաբերյալ: Արդարադատության նախարար Ռուստամ Բադասյանն ասաց, որ ինքնաբացարկի հիմքերն առկա են, իսկ Տիգրան Աթանեսյանը նշեց, որ առկա չեն. «Պարոն Մակյանն իմ մանսակցությամբ գործերով ինքնաբացարկ էր հայտնում, բայց դա վերաբերում էր Առաջին ատյանի գործերի քննությանը, չեմ կարծում՝ խորհրդի կազմում քննությանը դա լուրջ դերակատարություն ունենա, եւ բացի այդ, այս քննությունը չի վերաբերում իմ անձին, ես այստեղ ներկայացուցիչ եմ»:

ԲԴԽ անդամները հարցեր չհղեցին Մեսրոպ Մակյանին եւ հեռացան խորհրդակցական սենյակ՝ որոշում կայացնելու: Կարճ ժամանակ անց վերադառնալով՝ Խորհուրդը որոշեց այն մերժել:

Ալեքսանդր Ազարյանը, հիշեցնենք, այն դատավորն է, որը քննել է «5»-րդ ալիքի սեփականատեր Արմեն Թավադյանի խափանման միջոցի հարցը. վերջինս մեղադրվում է Մարտի 1-ի գործով կազմակերպված խմբի կողմից վկային կամ տուժողին սուտ ցուցմունք տալու նպատակով կաշառելու մեջ: Մեղադրանքի առաջադրումից հետո՝ 2019 թվականի դեկտեմբերին, Արմեն Թավադյանը կալանավորվել էր, ինչի դեմ հետագայում պաշտպանները վերաքննիչ բողոք էին ներկայացրել: Բողոքի քննության փուլում դատախազն ինքնաբացարկի միջնորդություն էր ներկայացրել Ալեքսանդր Ազարյանին՝ հիմքում դնելով դատավորի կանխակալ վերաբերմունքի հանգամանքը. «Բողոքի քննության ընթացքում դատավորի կողմից թույլ են տրվել քրեադատավարական օրենքի պահանջների խախտումներ. ինքնաբացարկի վերաբերյալ քննիչի միջնորդության մերժման որոշումն ընդունել է գործնականում վայրկյանների ընթացքում, այդ որոշումը հրապարակել, ապա դրանից հետո բողոքի քննությունը շարունակել է դատախազի և քննիչի բացակայության պայմաններում՝ միայն բողոքաբերների մասնակցությամբ և այլն»,- տեղեկացրել էին մեզ դատախազությունից՝ հավելելով, որ բողոքը քննող դատարանը՝ Ալեքսանդր Ազարյանի նախագահությամբ, իր գործողություններով, արած արտահայտություններով ողջամիտ կասկած է հարուցում դատարանի նախատրամադրվածության վերաբերյալ: Ալեքսանդր Ազարյանը բավարարել էր պաշտպանական կողմի բողոքը, եւ Արմեն Թավադյանն ազատ էր արձակվել հիմնավոր կասկածի բացակայության հիմքով: Դրանից հետո պարզ էր դարձել, որ արդարադատության նախարարությունը միջնորդություն է ներկայացրել ԲԴԽ-ին՝ դատավորին կարգապահական պատասխանատվության ենթարկելու համար. ըստ տեղեկությունների՝ պատճառը դատավորի կողմից ՀՔԾ պետ Սասուն Խաչատրյանի հասցեին արված արտահայտություններն են: