Հուսով եմ՝ ստիպված չենք լինի երկար հանդուրժել երկրպագուների բացակայութունը. ՈՒԵՖԱ-ի նախագահը՝ մրցաշարերի մասին

ՈՒԵՖԱ-ի նախագահ Ալեքսանդր Չեֆերինն անհաբեր սպասում է այն օրվան, երբ ֆուտբոլասերները կրկին մարզադաշտեր այցելելու հնարավորություն կունենան: Այս մասին նա նշել է երեկ՝ հունիսի 17-ին, տեղի է ունեցած կազմակերպության գործկոմի նիստի ընթացքում, որի ժամանակ որոշումներ են կայացվել մրցաշարերի անցկացման վայրերի ու ժամկետների վերաբերյալ: Չեֆերինը վստահություն ունի, որ այդ օրը երկար սպասեցնել չի տա:

«Հիացած եմ, որ հնարավորություն ունենք վերսկսելու մեր գրեթե բոլոր մրցաշարերը: Վստահ եմ, որ ստիպված չենք լինի երկար հանդուրժել երկրպագուների բացակայությունը, եւ նրանց մոտ ապագայում թույլ կտան մարզադաշտեր վերադառնալ»,- ասել է նա:

Երեկ տեղի ունեցած ժողովի ընթացքում ՈՒԵՖԱ-ի կայացծրած կարեւոր որոշումներից մեկը վերաբերում է Եվրո 2020-ին, որն այս տարվա մարտին կորոնավիրուսի պանդեմիայի պատճառով 1 տարով հետաձգվեց: ՈՒԵՖԱ-ն տեղեկացնում է, որ եվրոպական 12 քաղաքները, որոնք այս տարի հունիսի 12-ից հուլիսի 12-ը պետք է ընդունեին խաղերը, հաստատել են, որ մյուս տարի էլ կկարողանան անել դա, թեեւ ավելի վաղ տեղեկություններ կային, ըստ որոնց, որոշ մարզադաշտեր պատրաստ չեն հաջորդ տարի հյուրընկալել խաղերը, քանի որ այլ միջոցառումներ, օրինակ՝ համերգներ ունեն:

Այսպիսով՝ բացման խաղը՝ Թուրքիա-Իտալիա հանդիպումը, տեղի կունենա 2021թ. հունիսի 11-ին Հռոմի «Օլիմպիկոյում»: Խմբային փուլը կավարտվի հունիսի 23-ին: 1/8 եզրափակչի հանդիպումները կկայանան հունիսի 26-29-ը, քարորդ եզրափակչինը՝ հուլիսի 2-ին եւ 3-ին, կիսաեզրափակիչները՝ հուլիսի 6-ին եւ 7-ին, իսկ եզրափակիչը՝ հուլիսի 11-ին:

Եվրո 2020-ի որակավորման փուլի փյել-օֆ հանդիպումները տեղի կունենան այս տարի սեպտեմբերի 3-ին մեկնարկող Ազգերի լիգայի 2020-21 մրցաշրջանի խաղերի հետ մեկտեղ: Դրանք նախատեսված են խմբային փուլի հոկտեմբերին ու նոյեմբերին նշանակված տուրերին զուգահեռ:

Մինչեւ այս տարվա սեպտեմբեր ավարտին կհասցվեն Չեմպիոնների եւ Եվրոպա լիգայի ընթացիկ՝ 2019-20 մրցաշրջանի հանդիպումները: Չեմպիոնների լիգան կանցկացվի եզրափակիչ մրցաշարի ձեւաչափով: Քառորդ եզրափակչի, կիսաեզրափակչի հանդիպումները, ինչպես նաեւ եզրափակիչը կկայանան օգոստոսի 12-23-ը Լիսաբոնի «Էշտադիու դու Բենֆիկա» եւ «Ժոզե Ալվալադե» մարզադաշտերում: Օգոստոսի 23-ին Լիսաբոնում կկայանա եզրափակիչը: Ամեն փուլում թիմերը միմյանց կհանդիպեն ոչ թե 2-ական, այլ 1-ական խաղով:

Մինչեւ այդ՝ օգոստոսի 7-ին ու 8-ին, տեղի կունենան 1/8 եզրափակչից մնացած պատասխան 4 հանդիպումները, որոնք չէին կայացել կորոնավիրուսի պանդեմիայի պատճառով: Առաջիկայում կորոշվի՝ արդյոք դրանք կկայանան նոմինալ դաշտի տերերի մարզադաշտերում, թե Պորտուգալիայում: Անհրաժեշտության դեպքում 1/8 եզրափակչի խաղերն անցկացնելու համար կօգտագործվեն Պորտուի «Դրագաու» եւ Գիմարաեշի «Աֆոնսու Էնրիկեշ» մարզադաշտերը: Քառորդ եզրափակչի եւ կիսաեզրափակչի վիճակահանությունը կկայանա հուլիսի 10-ին:

Եվրոպա լիգայի քառորդ եզրափակչի, կիսաեզրափակչի հանդիպումները, ինչպես նաեւ եզրափակիչը տեղի կունենան նույն ձեւաչաով, ինչ Չեմպիոնների լիգայի պարագայում: Կանցկացվեն Քյոլնում, Դույսբուրգում, Դյուսելդորֆում ու Գելզենկիրխենում օգոստոսի 10-21-ը: 21-ին եզրափակիչն է Քյոլնում:

Այս մրցաշարի 1/8 եզրափակչից մնացած պատասխան հանդիպումները նշանակված են օգոստոսի 5-6-ը: Ավելի ուշ կորոշվի՝ դրանք տեղի կունենան նոմինալ դաշտի տերերի մարզադաշտերում, թե ոչ: «Ինտեր»-«Խետաֆե» եւ «Սեւիլիա»-«Ռոմա» զույգերի դեպքում այլ որոշում է կայացվել: Քանի որ դրանց դեպքում առաջին հանդիպումները նույնպես հետաձգվել էին, դիմակայության հաղթողը կվճռվի 1 խաղով, իսկ մրցավայրերը կհայտարարվեն առաջիկայում: Եվրոպա լիգայի քառորդ եզրափակչի եւ կիսաեզրափակչի վիճակահանությունը նույնպես հուլիսի 10-ին է:

Ընթացիկ մրցաշրջանի մնացած ժամանակահատվածում թիմերին կթույլատրվի խաղի ընթացքում 5-ական փոփոխություն անել: Հաջորդ մրցաշրջանում այդ թիվը կրկին կդառնա 3:

Չեմպիոնների լիգայի հաջորդ՝ 2020-21 մրցաշրջանը կսկսվի օգոստոսի 8-ին, Եվրոպա լիգայինը՝ 20-ին: 2 մրցաշարերի նախնական ու որակավորման փուլերը կանցկացվեն ոչ թե 2-ական, այլ 1-ական խաղով: Բացառություն կլինի Չեմպիոնների լիգայի փլեյ-օֆը, որտեղ հաղթողները կորոշվեն 2-ական հանդիպումով: 1-ական խաղով նախատեսված փուլերի դեպքում տանտերը կորոշվի վիճակահանության արդյունում: