Վենեսուելան Անգլիայի բանկից չի ստանա իր ոսկու պաշարը. Մեծ Բրիտանիան չի ճանաչում Մադուրոյին որպես նախագահ

Մեծ Բրիտանիայի բարձրագույն դատարանը վճռել է թույլ չտալ Վենեսուելայի  իշխանություններին հասանելիություն ունենալ եւ ստանալ վենեսուելական ոսկու պաշարների մի մասը, որոնք պահվում են «Անգլիայի բանկ»-ում: Դատարանի որոշման մեջ ասվում է, որ Բրիտանիան որպես Վենեսուելայի լեգիտիմ առաջնորդ է ճանաչում ընդդիմադիր Խուան Գույդոյին, այլ ոչ նախագահ Նիկոլաս Մադուրոյին: Այս մասին հայտնում է BBC-ն:

Խուան Գուայդոն առաջնորդում է Վենեսուելայի ընդդիմությունը եւ նախորդ տարի հռչակել է իրեն իբրեւ նախագահի պարտականությունների պաշտոնակատար:

Մադուրոյի կառավարությունը դեռ գարնանը հայտնել է, որ ուզում է վերցնել Անգլիայի բանկում պահվող իր ոսկե ձուլակտորները՝ 1 միլիարդ դոլար արժողությամբ: Պարզաբանվել է, որ այդ գումարներն անհրաժեշտ են՝ կորոնավիրուսի դեմ պայքարի համար: Մերժում ստանալով, Մադուրոն ու իշխանությունները դիմել են ՄԱԿ-ին՝  խնդրելով հանդես գալ որպես միջնորդ, իսկ մայիսին դիմել է դատարան՝ պահանջելով ձուլակտորները փոխանցել ՄԱԿ-ի ծրագրի միջոցով: Դատարանն էլ, ինչպես վերը նշվեց, վճիռ է կայացրել ի օգուտ Մեծ Բրիտանիայի:

Վենեսուելայի Կենտրոնական բանկի փաստաբանները հայտարարել են, որ բողոքարկելու են բարձրագույն դատարանի վճիռը: Նրանց փոխանցմամբ, Բրիտանիան  չի ճանաչում Նիկոլաս Մադուրոյին որպես Վենեսուելայի դե յուրե նախագահ, սակայն ճանաչում է դե ֆակտո: Ըստ փաստաբանների, Կարակասում աշխատում է բրիտանական դիվանագիտական առաքելությունը, իսկ Լոնդոնում Վենեսուելային է ներկայացնում Մադուրոյի նշանակած դեսպանը:

Ստեղծված իրավիճակը Մադուրոյի թիմի համար ծանր հարված է, քանի որ երկիրը ֆինանսական դժվարություններ ունի կորոնավիրուսի թողած հետեւանքների եւ Վենեսուելայի նկատմամբ սահմանված միջազգային պատժամիջոցների պատճառով:

Անգլիայի բանկից հայտնել են, որ իրենք միաժամանակ 2 հայտ են ստացել. մեկը եղել է Մադուրոյի կառավարությունից՝ ոսկե ձուլակտորների փոխանցման համար, մյուսը եղել է նրա հակառակորդ Խուան Գուայդոյի թիմից՝ Մադուրոյին մերժելու խնդրանքով: Վերջիններս հայտի մեջ նշել են, որ ոսկու պաշարներից ստացված գումարը չի ծախսվի համաճարակի հետեւանքների վերացման համար, այլ կծառայի կոռուպցիոն նպատակների միայն:

Երբ գործը հասել է դատարան, «Անգլիայի բանկ»-ը հորդորել է շարժվել այն սկզբունքով, թե ով է երկրի օրինական նախագահը: Դատական հայցում էլ նշված է եղել, որ Վենեսուելան այդ գումարի կարիքն ունի անհապաղ, քանի որ նժարին մարդկանց առողջության հարցն է դրված:

Երկրի բնակչության մեծ մասն իսկապես կարիքավոր է եւ սննդի ու դեղորայքի կարիք ունի: 2019 թվականին Վենեսուելան ռեկորդային, չլսված գնաճ է գրանցել՝ 800 հազար տոկոս: Այնուհետ երկրից հեռացել է 4,8 միլիոն մարդ:

Նիկոլաս Մադուրոյի կառավարությունը ճգնաժամի պատճառ է համարում  միջազգային պատժամիջոցները, իսկ Արեւմուտքը մեղադրում է Մադուրոյին կոռուպցիայի, անարդյունավետ կառավարման եւ անգամ թմրանյութի մաքսանենգության մեջ:

Իսկ ինչու՞ Վենեսուելան 2 նախագահ ունի.

Բանն այն է, որ 2018 թվականի մայիսին, Նիկոլաս Մադուրոն վերընտրվեց երկրի նախագահ՝ երկրորդ 6-ամյա ժամկետով ՝ խիստ հակասական ընտրությունների ընթացքում, որոնք բոյկոտեցին ընդդիմադիր կուսակցությունների մեծ մասը: Մադուրոյի վերընտրվելը չճանաչվեց երկրի Ազգային ժողովի կողմից, որի մեծ մասն այն ժամանակ ընդդիմադիր խորհրդարանականներն էին ներկայացնում: Խորհրդարանականները հայտարարել էին, որ Մադուրոն ինքնակոչ նախագահ է եւ այդ պաշտոնը մնում է թափուր:

Վենեսուելայի Սահմանադրության համաձայն ՝ իշխանական խառնաշփոթի ժամանակ նախագահության դերը ժամանակավորապես անցնում է Ազգային ժողովի ղեկավարին, որն այդ ժամանակ Խուան Գուայդոն էր: Նրա կառավարման լեգիտիմությունը ճանաչեց 50 երկիր՝ ներառյալ ԱՄՆ-ն ու Մեծ Բրիտանիան: Ռուսաստանն ու Չինաստանն աջակցեցին Մադուրոյին՝ հայտարարելով, որ նա է սահմանադրորեն մնում երկրի առաջնորդը:

Մադուրոն մնաց նախագահական պալատում, նրան են ենթարկվում բանակը, ոստիկանությունը, Գերագույն դատարանը, ընտրական հանձնաժողովը, մի շարք այլ պետական կարեւոր օղակներ:

Ինչպե՞ս է Վենեսուելայի ոսկին հայտնվել «Անգլիայի բանկ»-ում.

«Անգլիայի բանկ»-ն աշխարհում իր մեծությամբ երկրորդ պահեստարանն է աշխարհի տարբեր երկրների ոսկու պաշարների համար՝ Նյու-Յորքում գտնվող ԱՄՆ-ի Դաշնային պահեստարանից հետո: Անգլիայի բանկում ավելի քան 400 ոսկու ձուլակտոր կա: Բանկի 320-ամյա պատմության մեջ չի գրանցվել ոսկու գողության կամ հաստատության ներխուժման որեւէ փորձ: Բազմաթիվ երկրների կենտրոնական բանկերն են նախընտրում պահել իրենց ոսկու պաշարները չեզոք գոտիների վստահելի պահեստարաններում:

Սովորաբար ոսկու հետ փոխանցման գործընթացը պարզ է եւ առանց խնդիրներ, եթե ստանալու համար դիմող կողմը կասկածների տեղիք չի տալիս, կամ եթե չկան քաղաքական հակասություններ՝ ինչպես, օրինակ, Վենեսուելայի դեպքում: