«Եթե պետք է հրապարակեք Ձեր միջնորդությունը, Ձեր ելույթը կսահմանափակվի». դատավորը՝ Սեյրան Օհանյանի պաշտպանին

Երեւանի ընդհանուր իրավասության դատարանում ընթացող դատական նիստին ամբաստանյալ Սեյրան Օհանյանի պաշտպան Կարեն Մեժլումյանը եւս առարկեց մեղադրող դատախազ Գեւորգ Բաղդասարյանի միջնորդության դեմ։

Բաղդասարյանը, հիշեցնենք, միջնորդել էր բոլոր ամբաստանյալների պաշտպանների գործողություններում ճանաչել իրավունքի չարաշահում, սահմանափակել դատական նիստի նախապատրաստական ենթափուլն ու հնարավորություն տալ անցնել դատաքննության: Միջնորդության քննությունը հետաձգվել էր՝ հաշվի առնելով, որ բացակայում էր ամբաստանյալ Յուրի Խաչատուրովի պաշտպան Միհրան Պողոսյանը։

Կարեն Մեժլումյանը հիշեցրեց, որ դեռեւս 2019 թվականի օգոստոսի 28-ին ներկայացրել է միջնորդություն՝ քրեական գործի վարույթը կասեցնելու եւ Սահմանադրական դատարան դիմելու մասին, որը, սակայն, չի քննվել, քանի որ եղել է առավել կարեւոր՝ անհապաղ քննության այլ միջնորդություն։ Նա կարծիք հայտնեց, որ իր այդ միջնորդության քննությունը ամենայն հավանականությամբ պետք է տեղի ունենար այսօրվա դատական նիստին, սակայն դատախազները դա թույլ չտալու համար ներկայացրին քննարկվող միջնորդությունը․ «Ընդ որում, մեղադրողները որպես իրավունքի չարաշահում են դիտարկում, օրինակ, խափանման միջոցը փոխելու վերաբերյալ պարոն Քոչարյանի պաշտպանների միջնորդությունը, որը, ի դեպ, բավարարվել է Վերաքննիչ դատարանի կողմից, եւ պարոն Քոչարյանն ազատ է արձակվել»։ Ըստ Մեժլումյանի՝ մեղադրող դատախազների տրամաբանությունն այն  է, որ եթե այդ միջնորդությունները չքննվեին, Քոչարյանը մինչեւ հիմա անազատության մեջ կլիներ։

Կարեն Մեժլումյանն ասաց, որ այժմ կներկայացնի իր միջնորդության տեքստը, որպեսզի դատարանն ինքը գնահատի՝ դրա ներկայացումը իրավունքի չարաշահում է, թե իր՝ որպես պաշտպանի պարտականություն։ Դատավոր Աննա Դանիբեկյանը, սակայն, դա թույլ չտվեց՝ ասելով, որ միջնորդության տեքստը կհրապարակի այն ժամանակ, երբ դատարանը կանցնի այդ միջնորդության քննությանը։ Պաշտպան Կարեն Մեժլումյանն ասաց, որ եթե դատարանը բավարարի դատախազների միջնորդությունը, դրանով գնահատական կտա նաեւ իր միջնորդությանը՝ չիմանալով դրա տեքստը։ Դատավոր Դանիբեկյանը կրկնեց, որ նախքան դատախազի կողմից ներկայացված միջնորդության լուծումը չի պատրաստվում այլ միջնորդությունների անդրադառնալ, ինչին արձագանքելով՝ պաշտպանն ասաց․ «Ես ընդամենը տեքստ եմ հրապարակում»։ Դատավորը դարձյալ կրկնեց, որ դա անել թույլ չի տալիս․ «Ես ցանկանում եմ դատարանին համոզել, որ դուք մերժեք մեղադրողների միջնորդությունը»,- ասաց պաշտպանը։ Դատավորն առաջարկեց հիմնավորումները ներկայացնել առանց միջնորդության տեքստը հրապարակելու, ինչին պաշտպանը դարձյալ չհամաձայնեց․ «Որպեսզի իմ առարկությունը հիմնավորված լինի, ես պետք  է ցույց տամ, որ միջնորդությունը, որը, ըստ դատախազների իրավունքի չարաշահմամբ է իրականացվում, ամենեւին էլ չարաշահում չէ, որ իմ միջնորդությունը չի կարող մերժվել»։ Դատավորը տեղեկացրեց, որ միջնորդության տեքստին ինքը ծանոթ է, սակայն պաշտպանը պնդեց, որ բանավորության սկզբունքից ելնելով՝ տեքստը պետք է հրապարակվի։ Նախագահող դատավոր Աննա Դանիբեկյանն ասաց, որ եթե պաշտպանը հրապարակի տեքստը, ստիպված է լինելու սահմանափակել նրա իրավունքները եւ նշեց, որ եւս մեկ անգամ հնարավորություն է տալիս ներկայացնել իր առարկությունները մեղադրող դատախազների միջնորդության վերաբերյալ․ «Եթե ունեք այդպիսիք, ներկայացրեք, եթե պետք է հրապարակեք ձեր միջնորդությունը, ձեր ելույթը կսահմանափակվի»,- ասաց նա։

Ի վերջո, Կարեն Մեժլումյանն սկսեց ներկայացնել իր հիմնավորումներն այն մասին, որ իր միջնորդությունը ոչ միայն իրավունքի չարաշահում չէ, ինչպես դատախազներն են պնդում, այլեւ իր՝ որպես պաշտպանի ուղիղ պարտականությունն է։