Yandex.Taxi-ն աջակցում է Հայաստանի քաղաքաշինության մասնագետներին՝ Երևանի հանրային վայրերը ձևավորելու գործում

Լուսանկար

Հին Երևան, Օղակաձև զբոսայգի

2020 թ. հուլիսի 3 – Yandex.Taxi-ն աջակցել է ՄԱԶԾ «Տարածքի ձևավորում․ քաղաքային համատեղ դիզայնը՝ փոփոխությունների կատալիզատոր» ծրագրին՝ տվյալներ տրամադրելով աշխարհագրական տեղեկատվական համակարգերի (ԱՏՀ) վերլուծության համար։

Yandex-ի վերլուծաբանները ուսումնասիրել են Երևանի Օղակաձև զբոսայգու տարածքի շրջակայքում գտնվող փողոցների ճանապարհային երթևեկությունը, ինչպես նաև հարևանությամբ գտնվող ամենասիրված վարորդական երթուղիները, և վերլուծել, թե ինչպես է փոխվում երթևեկության արագությունը կոնկրետ հատվածներում՝ աշխատանքային օրվա ընթացքում, հանգստյան օրերին, տարվա տարբեր եղանակներին։ Հետազոտությունը հիմնված է համախմբված և անանուն տվյալների վրա։ ՄԱԶԾ-ն դրանք կօգտագործի երթևեկության մոդել կառուցելու և առաջարկություններ կատարելու համար առ այն, թե ինչպես կարելի է զարգացնել Օղակաձև զբոսայգու շուրջ եղած ճանապարհային ենթակառուցվածքը՝ ապահովելու ավելի անվտանգ, խելացի և հարմար տրանսպորտային և հետիոտնային շարժ։

Ըստ հետազոտության արդյունքների՝ Ագաթանգեղոսի փողոցից դեպի Խանջյան փողոցի սկզբնամաս հատվածում միջին արագությունը սեզոնից կախված հասնում է 43-47 կմ/ժ արագության, մինչդեռ հակառակ ուղղությամբ շարժվելիս այն հազիվ թե երբևէ գերազանցի 20 կմ/ժ արագությունը։ Մոսկովյան փողոցի՝ Բաղրամյան պողոտայից մինչև Աբովյան փողոց ընկած հատվածում միջին արագությունը նույնիսկ ավելի փոքր է։ Տարվա բոլոր եղանակներին այն կազմում է մոտ 16 կմ/ժ՝ հուլիսին դառնալով 18 կմ/ժ, իսկ երեկոյան պիկ ժամին՝ 18:00-ից 19:00, այն ընդամենը 9-10 կմ/ժ է։  Իսահակյան փողոցի այն հատվածը, որը ձգվում է Աբովյան փողոցից մինչև Մաշտոցի պողոտա, ամենայն հավանականությամբ բոլոր երթուղիներից ամենադանդաղն է. այստեղ միջին արագությունը կազմում է մոտ 11 կմ/ժ, բայց կախված օրվանից և սեզոնից՝ կարող է նվազել նույնիսկ մինչև 4-5 կմ/ժ։

Տվյալների վերլուծությունը և հետագա առաջարկները կմշակվեն՝ հիմնվելով ռուսաստանյան քաղաքաշինական խորհրդատվության գործակալության՝ Strelka KB-ի և Spin Unit լաբորատորիայի կողմից մշակված մեթոդաբանության վրա։ Վերջնական վերլուծությունը կհրապարակվի ավելի ուշ օգոստոսին։

ՄԱԶԾ-ի երկարաժամկետ նպատակն է ներդրումներ կատարել քաղաքային կյանքի որակի մեջ և փոխել քաղաքացիների վերաբերմունքը հանրային տարածքների նկատմամբ։ Ծրագիրը նպատակ ունի նոր մոտեցումներ ներդնել հանրային տարածքի ձևավորման ոլորտում՝ օգտագործելով Օղակաձև զբոսայգու ընտրված տարածքների համատեղ ձևավորման գործում քաղաքացիների ներգրավման առցանց և անալոգային գործիքներ։

Օղակաձև զբոսայգին համալիր տարածք է (30 հա) և հանդիսանում է Երևանի ամենամեծ այգին, որտեղ հողերի 80 տոկոսը ներկայումս մասնավոր սեփականություն է։ Զբոսայգին ստեղծվել է որպես քաղաքի «թոքեր», և դրա շրջակայքում ապրում է շուրջ 200 000 մարդ։ Տարածքների ճարտարապետությունը կընտրվի մարդկանց տեղաշարժման երթուղիների և հասարակական տարածքի օգտագործման վերաբերյալ այլընտրանքային տվյալներով։ Հատկանշական է, որ հանրային հողերի սպասարկումը միշտ էլ պետության պարտականությունն է եղել, իսկ սեփականաշնորհումը հանգեցրեց անտարբերության և հանրային տարածքների նկատմամբ սեփականության զգացողության բացակայության։ ՄԱԶԾ-ի հիմնական նպատակն է տեղի բնակիչներին ներգրավել այգու ձևավորման գործընթացում՝ փոխելով նրանց վերաբերմունքը այս խոստումնալից հանրային տարածքի նկատմամբ։

Strelka KB-ի մասնակցությունը Հայաստանում ՄԱԿ-ի զարգացման ծրագրին հնարավոր դարձավ Ռուսաստանի Դաշնության կողմից ֆինանսավորման շնորհիվ՝ Ռուսաստան-ՄԱԶԾ թրասթային հիմնադրամի՝ գիտելիքների կառավարման վերաբերյալ ծրագրի միջոցով։

Yandex.Taxi-ի մասին

Yandex.Taxi-ն ուղևորությունների պատվերի առցանց ծառայություն է, որը հիմնադրվել է 2011 թվականին՝ Yandex (NASDAQ: YNDX) տեխնոլոգիական ընկերության կողմից։ Ընկերությունը ստեղծում է խելացի արտադրանքներ և ծառայություններ, որոնք հիմնված են մեքենայական ուսուցման մեթոդների վրա։ Այն օգտվում է քարտեզագրման, երթուղիների նախագծման և նավիգացիայի իր սեփական տեխնոլոգիաներից, ինչպես նաև մեքենայական ուսուցման վրա հիմնված պատվերների բաշխման համակարգից՝ մեքենայով երթևեկելու ինքնարժեքը նվազեցնելու համար։ Ծառայությունը ներկայումս գործում է աշխարհի 17 երկրներում։ Yandex.Taxi-ի գործունեությունը Հայաստանում մեկնարկել է 2016 թվականին։ Այն ներկայումս գործում է 16 քաղաքներում, որոնք ընդգրկում են երկրի մարզերի մեծ մասը։

Հայաստանում ՄԱԿ-ի զարգացման ծրագրի մասին

ՄԱԶԾ-ն օգնում է երկրներին մշակել քաղաքականություններ, զարգացնել առաջնորդության և գործընկերության հմտություններ, ինստիտուցիոնալ կարողություններ և ստեղծել կայունություն՝ զարգացման արդյունքների պահպանման համար։ ՄԱԶԾ-ն արդեն 25 տարի աջակցում է Հայաստանի զարգացմանը։ Այն աշխատում է քաղաքականության վերին մակարդակում՝ խորհրդատվություն տալով իրավանորմատիվային և քաղաքական դաշտի շուրջ, և ստորին մակարդակում իրականացնում է նախաձեռնություններ՝ նախագծերը վերածելով քաղաքականությունների և քաղաքականությունները՝ գործողությունների։ ՄԱԶԾ-ն նաև հսկայական ընդգրկում ունի ամբողջ երկրում՝ գյուղական և քաղաքային վայրերում, երիտասարդության, նորարարների և սոցիալական ձեռնարկատերերի աճող ցանցում։