Շատերը պատրաստակամ են օգնել տավուշցի երեխաներին, նրանց համար ճամբար կազմակերպել, հյուրընկալել. նախարարության արձագանքը

Այս օրերին սոցցանցերում բազմաթիվ են առաջարկները՝ տավուշցի երեխաների համար կազմակերպել ճամբարներ, ամառային հանգիստ ու դասընթացներ. կամավորներ են հավաքագրվում որպես դաստիարակ կամ դայակ երեխաների հետ աշխատելու համար: Հարյուրավոր մարդիկ էլ գրառումներ են անում, որ պատրաստ են հյուրընկալել երեխաներին իրենց տներում:

Պաշտոնապես նման առաջարկներ ուղարկվո՞ւմ են պետական մարմիններին, հենց իրենք՝ պետական մարմինները, նախատեսո՞ւմ են երեխաներին վտանգի գոտուց հեռացնելու համար այս օրերին կազմակերպել ճամբարներ՝ անվտանգ վայրերում՝ օգտագործելով կամավորների ուժերը: «Հայկական ժամանակ»-ի այս հարցերին ի պատասխան՝ Տավուշի մարզպետարանի տեղեկատվության եւ հասարակայնության հետ կապերի բաժնի պետի ժամանակավոր պաշտոնակատար Վալեր Օրդյանը հաղորդեց, որ մարզպետարանը կամավորներից նման առաջարկներ չի ստացել՝ խնդրելով մանրամասները ճշտել մարզպետից: Նրանից, սակայն, պատասխաններ ստանալ չհաջողվեց:

Աշխատանքի եւ սոցիալական հարցերի նախարարության մամուլի խոսնակ Սոնա Մարտիրոսյանը հաղորդեց, որ ոչ կամավորներից, ոչ էլ Տավուշի մարզի ծնողներից նամակ-դիմում-առաջարկներ չեն ստացել՝ ճամբար կազմակերպելու, երեխաներին տեղափոխելու առումով: «Բացի դրանից, պատկերացնում եք, չէ՞, թե համավարակի պայմաններում ի՛նչ է նշանակում կազմակերպել ճամբար. դա նշանակում է բոլոր կամավոր կամ ոչ կամավոր աշխատողների առողջ լինելու մասին երաշխիք պիտի ունենանք: Մենք պիտի վստահ լինենք, որ այդ մարդիկ առողջ են, պիտի գտնենք երեխաների ճամբարի համար հարմար տարածք, որ նաեւ ախտահանվի. դա միայն մեր նախարարությունով արվող բան չէ: Նաեւ, հարց է, թե ծնողները պատրա՞ստ են իրենց երեխաներին թողնել ճամբար գնան այս դրության մեջ»:

Դիտարկմանը, որ համավարակն էլ, պատերազմն էլ արտակարգ իրավիճակներ են, եւ ստիպում են դիմել արտակարգ միջոցառումների, իսկ ամառային ճամբարներ մշտապես էլ երեխաները գնում են՝ նա արձագանքեց՝ հիշեցնելով, որ համավարակի պայմաններում արգելված են բոլոր հանրային միջոցառումները, իսկ ճամբարը եւս հանրային միջոցառում է: «Պարետի ցուցումն է, որ չլինեն մարդկային կուտակումներ: Եթե պարետատունը որոշի, որ կարողանում ենք գտնել երեխաների համար համաճարակային առումով անվտանգ տարածք, ախտահանված, որտեղ հնարավոր կլինի ապահովել նրանց եւ ցերեկային, եւ գիշերային խնամքը, բնականաբար, մենք մեր բոլոր ռեսուրսներով պատրաստ ենք դա իրականացնել, բայց այս պահի դրությամբ ոչ նման առաջարկ ունենք, ոչ՝ ցուցում»:

Այն հարցին, թե ինչպես են նախատեսում վերահսկել այն կամավորական խմբերի աշխատանքը, որոնք գուցե միանգամայն բարի նպատակներով փորձեն կազմակերպել ճամբար, սակայն չունենան մասնագիտական կարողություններ բարդ իրավիճակում հայտնված երեխաների հետ աշխատանքի համար՝ Սոնա Մարտիրոսյանը պատասխանեց. «Հենց դրա համար էլ կոչ է արվում խուսափել բոլոր տեսակի կամավորական գործողություններից, դրամահավաքներից, երեխաների հետ նման տիպի աշխատանքը կամավորական սկզբունքներով գրեթե անհնարին է»:

Անդրադառնալով այն անհատների հայտարարություններին, որ պատրաստակամություն են հայտնում հյուրընկալել տավուշցի երեխաներին՝ Սոնա Մարտիրոսյանն ասաց. «Ովքեր մի անգամ գոնե եղել են Տավուշում, գիտեն, որ այնտեղի բնակիչները իրենց երեխաներին չեն թողնի: Բացի դրանից, անչափահասի խնամքի ստանձնումը հնարավոր է բացառապես այն պարագայում, երբ կա այդ անչափահասի օրինական խնամակալի համաձայնությունը: Եթե ծնողը համաձայնում է, ապա դա քաղաքացիների պայմանավորվածության հարցն է. իսկ արդյոք տավուշցի ծնողներն այս պարագայում կվստահեն անծանոթներին իրենց երեխաների խնամքը»:

Անհրաժեշտության դեպքում կարո՞ղ է պետությունը կամավոր ընտանիքի եւ տավուշցիների միջեւ լինել երաշխավոր օղակի դերը ստանձնել. հարցին ի պատասխան՝ նա ասաց. «Ես միանշանակ վստահ եմ, որ մեր բանակը կկարողանա ապահովել խաղաղ բնակչության անվտանգությունը սահմանամերձ տարածքներում, բայց, Աստված մի արասցե, եթե երեխաների խնամքի կազմակերպման անհրաժեշտություն լինի, ապա մեր նախարարության բոլոր ռեսուրսները, բոլոր հաստատությունները եւ երեխայի շուրջօրյա խնամքի մեր բոլոր կարողությունները, բնականաբար, պատրաստ ենք ուղղել այդ նպատակին: Բայց վստահ ենք, որ այդ խնդիրը չի առաջանա»:

ՀԳ. Թեմային ֆեյսբուքյան էջում անդրադարձել է Ազգային ժողովի իմ քայլը խմբակցության պատգամավոր Գայանե Աբրահամյանը՝ նշելով. «Սիրելի ընկերներ, գիտեմ շատ անհանգիստ եք երեխաների համար, տեղեկացնեմ, որ ամեն ինչ արվում է, հրապարակային ոչինչ չենք գրում, բայց աշխատում ենք, հանգիստ եղեք։ Ես ամեն անգամ ապշում ու հիանում եմ համախմբվելու եւ իրար աջակցելու մեր անսպառ կարողությամբ, այս օրերին առանց հուզվելու սա արձանագրել հնարավոր չէ։ ԱՆՊԱՐՏ ԵՆՔ մեր միասնականությամբ, խնդրում եմ նաեւ այս օրերին չմոռանալ համավարակի եւ կանոնները պահելու մասին, մեզ ԱՌՈՂՋ ԵՒ ՈՒԺԵՂ թիկունք է պետք»: Նա նաեւ հավելել է, որ այս պահին երեխաներին տեղավորելու խնդիր չկա: