Գյումրու ավագանին արտահերթ նիստ գումարեց. 10 մլն դրամ հատկացվեց կարկուտից տուժածներին օգնելու համար

Գյումրու ավագանին այսօրվա արտահերթ նիստը սկսեց մեկ րոպե լռությամբ՝ ի հիշատակ Տավուշի սահմանային գոտում զոհված հայ քաջորդիների:

Այն հրավիրվել էր հուլիսի 13-ին Գյումրիում ստեղծված արտակարգ իրավիճակով պայմանավորված: Հիշեցնենք՝ այդ օրն աննախադեպ երկարատև կարկուտն ու անձրևը ջրածածակ էին արել քաղաքի գրեթե բոլոր փողոցները, գոյացրել սառցե հաստ շերտ, որի տակ մեքենաներ էին մնացել:

Կարկուտը լցվել էր բնակարաններ, սելավը՝ շենքերի նկուղներ, ջուրը քշել-տարել էր փողոցում ու մայթերում գտնված ամեն ինչ: Հոսանքազրկվել էին Գյումրու գրեթե բոլոր թաղամասերը: «Այդ օրը մեկ ժամում այնքան տեղում է եղել, որքան պետք է լիներ ամբողջ հուլիսի ընթացքում: Տվյալը հիդրոմետից եմ վերցրել»,- ասաց քաղաքապետ Սամվել Բալասանյանը:

Ավագանին համաձայն եղավ, որ 10 մլն դրամը բաշխվի կարկուտից տուժած քաղաքացիներին: 5 մլն դրամը հատկացվեց մշակութային միջոցառումների համար նախատեսված ֆոնդից, 3 մլն-ը՝ սպորտային գործուղումների համար նախատեսված գումարներից: 2 մլն դրամն էլ՝ համայնքային բյուջեի չծախսված գումարներից:

Չծախսված գումարները, ըստ կառույցի գլխավոր ֆինանսիստ Լենա Ջիլավյանի, ներկայացուցչական ծախսերի համար բյուջեում առանձնացված հոդվածով է ամրագրված: Դա հիմականում պետք է ծախսվի ընդունելությունների, հյուրասիրությունների, նվիրատվությունների վրա:

«Բայց քանի որ դրանք քաղաքապետն իր անձնական ֆոնդից է անում, և այս չծախսված գումարի ֆոնդից կա տնտեսում, քաղաքապետը կարծեց, որ դրանից 2 մլն-ն առանձնացնենք օգնություններին: Նաև քաղաքապետի տնտեսած աշխատավարձն ենք օգտագործում, կօգտագործենք նաև գալիք աշխատավարձը»,- տեղեկացրեց Ջիլավյանը:

Ընդհանուր առմամբ քաղաքապետարանն այս օրերին ստացել և քննարկել է 120 դիմում՝ ստացված տնակատերերից և սեփական սեկտորի բնակարաններից:

84 ընտանիք է համապատասխանել օգնություն ստանալու չափանիշներին: Նրանցից բացի, 6 ընտանիքի արդեն տրվել է նորակառույց բնակարան սոցիալական թաղամասում:

Բազմաբնակարաններով համատիրությունները կզբաղվեն, աջակցություն կտրվի կարկուտից տուժած և այդ մասին քաղաքապետարանին տեղյակ պահած Շիրակի թեմի սոցիալ-կրթական կենտրոնին, «Մեղվիկ» համայնքային զարգացման հիմնադրամ ՀԿ-ին և Գրողների միության Գյումրու մասնաճյուղին: Յուրաքանչյուրին 100.000-ական դրամ կհատկացվի:

Սրանք արդեն ստացված, ուսումնասիրված դիմումներն են: Երեկ 65 նոր դիմում է կրկին ստացվել, որոնք դեռ պետք է քննարկվեն: Այս դիմումներում են նաև այն 3 մեքենաների տերերը, որոնք կարկուտի պահին մնացել էին կամրջի տակ՝ սառցաբեկորների մեջ, և ջրից դուրս են բերվել փրկարարների ուժերով: Դիմումներ կընդունվեն նաև շաբաթ-կիրակի օրերին:

Բոլոր դիմումները կուսումնասիրվեն տնայցերի և տեսանկարահանումների միջոցով: Դրանից հետո նոր կկայացվի դիմումին ընդառաջելու կամ մերժելու որոշում:

Սամվել Բալասանյանն ասաց՝ եթե զգան ինչ-որ գործողություն քաղաքն ի վիճակի չէ միայնակ անելու, կդիմեն Կառավարության օգնությանը: «Պարոն Պապիկյանն էլ է զանգել, հետաքրքրվել, նախագահի աշխատակազմից էին զանգել, նաև՝ տարբեր բարեգործներ: Եթե պետք եղավ, անպայման նրանց կդիմենք, որովհետև չենք կարող նույն իրավիճակում հայտնված մարդկանց մեկին օգնենք, մեկին չօգնենք»,- ասաց քաղաքապետը:

Կորոնավիրուսային վիճակով պայմանավորված՝ քաղաքապետարանը Կառավարությունից ստացել է 4 մլն դրամ դրամաշնորհ՝ մեկուսացված բնակիչներին սննդով ապահովելու համար: Քաղաքացիների ցուցակները ոչ թե քաղաքապետարանն է կազմել, այլ դրանք կառույցին են տվել բուժհաստատությունները:

«Մենք ընդամենը պարետի ցուցումով սնունդը տանում ենք, առանց շփվելու՝ դռան տակից կամ պատուհանից անձնագիրն ուզում ենք, նկարում, հետ ենք վերադարձնում: Մենք չունենք լիազորություն, որ նաև պարզենք, թե տվյալ մեկուսացված քաղաքացին խանութ գնում է, թե ոչ»,- տեղեկացրեց Լենա Ջիլավյանը:

Անդրադառնալով կորոնավիրուսով վարակված քաղաքացիների ելումուտի հնարավորությանը՝ Բալասանյանը հորդորեց, որ քաղաքացիները, եթե ունեն ինքնամեկուսացման ցուցում, դուրս չգան իրենց բնակարաններից, այլ զանգեն և տեղյակ պահեն, թե ինչի կարիք ունեն: «Ես ինքս ամեն ինչ կանեմ, որ որևէ բանի կարիք չունենան, մենակ թե մնան տանը, դուրս չգան, խանութ կամ մի այլ տեղ չգնան, չտարածեն վիրուսը, իրավիճակն ավելի չբարդացնեն, դուք էլ բոլորին հորոդորեք»,- ավագանուն դիմեց քաղաքապետը: