Իրանական մարդատար օդանավը ենթարկվել է ամերիկյան կործանիչների հարձակման (տեսանյութ)

Իրանական «Mahan Air» ավիաընկերության քաղաքացիական օդանավը ենթարկվել է կործանիչի հարձակման: Al Mayadeen լրատվականի փոխանցմամբ՝ ինքնաթիռը չնախատեսված արտակարգ վայրէջք է կատարել Բեյրութում, կան մի քանի տուժած ուղեւորներ:

Ամերիկյան F-15 2 կործանիչները Սիրիայի օդային տարածքում հարձակում են գործել Թեհրան-Բեյրութ չվերթն իրականացնող օդանավի ուղղությամբ: Ինքնաթիռում եղել է 156 ուղեւոր։ Լրատվականի տվյալներով՝ ինքնաթիռը թիրախավորվել է չվերթի գոտուց 55 կմ հեռավորության վրա գտնվող կետում՝ Իրաքի հետ սահմանի Ալ-Թանֆ սահմանային անցակետի մոտակայքում:

Մարդատար օդանավի օդաչուն, արագ կողմնորոշվելով, հասցրել է կտրուկ իջեցնել թռիչքի բարձրությունը՝ կործանիչների հետ բախումներից խուսափելու համար: Քաղաքացիները տուժել են հենց թռիչքի բարձրության կտրուկ անկման ու արագ վայրէջքի պատճառով: 

Իրանական ինքնաթիռի՝ ամերիկյան կործանիչների կողմից հարձակման ենթարկվելու փաստը հավաստում է նաեւ իրանական ISNA գործակալությունը, որի հետ զրույցում «Mahan Air» ավիաընկերության ներկայացուցիչը հայտնել է, որ միջադեպի մանրամասները պարզվում են:

IRIB հեռուստառադիոընկերության տվյալներով էլ՝ քաղաքացիական ինքնաթիռի վրա հարձակում է եղել իսրայելական կործանիչներով:

Իրանի արտաքին գործերի նախարարության պաշտոնական ներկայացուցիչ Աբբաս Մուսավին, մեկնաբանելով պատահարը, հայտարարել է, որ պաշտոնական Թեհրանը ձեռնարկելու է համապատասխան միջոցներ միջադեպի բոլոր մանրամասներն ուսումնասիրելուց ու պարզելուց հետո: Մուսավին նաեւ հայտնել է, որ միջադեպից անմիջապես հետո ՆԱԿ-ում Իրանի մշտական ներկայացուցիչ Մաջիդ Թախտ-Ռավանչը դեպքի մասին տեղեկանալուն պես կապ է հաստատել ՄԱԿ-ի գլխավոր քարտուղար Անտոնիու Գուտերեշի հետ: Թախտ-Ռավանչը նշել է, որ Իրանը ամերիկյան կողմի վրա է թողնում պատասխանատվությունը ինքնաթիռների հետ կապված ցանկացած միջադեպ: Նույնը փոխանցվել է նաեւ Թեհրանում Շվեյցարիայի դեսպանին, որը ներկայացնում է ԱՄՆ-ի շահերն Իրանում:

Լիբանանյան Կարմիր խաչի ղեկավար Ջորջ Քաթանան էլ հայտնել է, որ միջադեպի հետեւանքով տուժածներ իրականում չկան, Tasnim գործակալությունը հայտնել է, որ Բեյրութում վայրէջք կատարելուց հետո օդանավն արդեն վերադարձել է Թեհրան: 

Իրանական լրատվամիջոցներից բացի, միջադեպին անդրադարձել է նաեւ ABC news-ը: Լրատվականը գրում է, որ Իրանի օդային տարածքում թռիչք է իրականացրել ոչ թե 2, այլ 1 F-15 ամերիկյան կործանիչ: Ըստ կայքի հրապարակման՝ կործանիչը իրանական օդանավից ավելի քան 1000 մետր հեռավորություն է պահել՝ ինքնաթիռի տեսողական նույնականացում իրականացնելու համար: Այս մասին հայտնել են ամերիկացի զինվորականները: Տեսողական նույնականացումը ավարտվել է անվտանգ, սակայն մինչ այդ «Mahan Air»-ի օդաչուները կտրուկ անկում են իրականացրել ու կոշտ վայրէջք:

«ԱՄՆ F-15 ինքնաթիռը կանոնավոր օդային առաքելություն իրականացնելու համար CJTF-OIR- ի հարևանությամբ՝ Սիրիայի Թանֆ կայազորում, իրականացրել է «Mahan Air»-ի ուղեւորատար ինքնաթիռի ստանդարտ տեսողական զննում այս ինքնաթիռից մոտավորապես 1 կմ հեռավորության վրա գտնվող անվտանգ օդային տարածքում»,- ասել է ԱՄՆ Կենտրոնական հրամանատարության խոսնակ կապիտան Բիլ Ուրբանը:

«Տեսողական ստուգումը տեղի է ունեցել՝ Աթ Թանֆի կայազորում գտնվող կոալիցիայի անձնակազմի անվտանգությունն ապահովելու համար»,- ասել է Ուրբանը՝ նկատի ունենալով ԱՄՆ ռազմակայանը Սիրիայի հարավում՝ Հորդանանի հետ սահմանի երկայնքով, որտեղ տեղակայված են ամերիկյան փոքր թվով զորքեր:

«Երբ F-15-ի օդաչուն ինքնաթիռը ճանաչեց որպես «Mahan Air» ուղեւորատար ինքնաթիռ, F-15-ը ապահով կերպով բացել է ինքնաթիռի հեռավորությունը»,- ավելացրել է նա՝ հավելելով, որ մասնագիտական դիտարկումն իրականացվել է միջազգային չափանիշներին համապատասխան: Ամերիկյան կողմը հայտնել է, որ կործանիչների կողմից շրջապատվելու ժամանակ ինքնաթիռը, հնարավոր բախումից վախենալով, կտրուկ մանեւրներ է կատարել, ինչի հետևանքով 3 ուղեւոր, ինչպես նաև սպասարկող անձնակազմի անդամներ են տուժել:

ֆեյսբուքյան օգտատերերից Սագո Արեյանը հրապարակել է տեսանյութ օդանավի ներսից, որում երեւում է կոշտ վայրէջքն ու ուղեւորների խուճապը: