ԱԱԾ-ում երկու տարի շարունակ տեղեկատվության հոսք է եղել․ Սեդա Սաֆարյան

Մարտի 1-ի գործով տուժողի ներկայացուցիչ, փաստաբան Սեդա Սաֆարյանի ունեցած տեղեկություններով՝ օպերատիվ տվյալների իրացման գործընթացքում երկու տարի շարունակ ԱԱԾ-ում տեղեկատվության հոսք է եղել, ինչը շատ բացասական է անդրադարձել Հատուկ քննչական ծառայության աշխատանքի վրա, որը զբաղվում է Մարտի 1-ի մայր գործի նախաքննությամբ։

Այսօր հրավիրված ասուլիսի ժամանակ Սեդա Սաֆարյանն ասաց, որ փորձ է արվել պետական մակարդակով դա ուղղել, բայց որեւէ անձի փոփոխությունը դեռ կադրային փոփոխություն չէ․ ըստ նրա՝ այն օղակները, որ պետք է դրանով զբաղվեն, չեն ցանկանում զբաղվել, եւ բոլորին հայտնի է, թե ինչու․

«Եթե Վանեցյանն այսօր զբաղվում է քաղաքական ինտրիգներով, պատկերացնո՞ւմ եք այս երկու տարվա ընթացքում ՀՔԾ-ի հետ համագործակցելու նրա մեեխանիզմը եւ ցանկության բացակայությունը, դրա արդյունքում տեղեկատվական արտահոսք եղել է, եւ կան սպանություններ, որոնք ներկա պահին բացահայտված չեն»։ Սեդա Սաֆարյանի կարծիքով՝ դրանց ուղղությամբ դեռ աշխատանքներ կտարվեն․ «Եթե փաստաբանին կամ մեկ ուրիշ՝ երրորդ անձի ասում են, որ այսինչն է սպանել, մենք կարողանում ենք դա իմանալ, ապա ես կարծում եմ, որ նորմալ օպերատիվ աշխատողներ ունենալու պարագայում հաստատապես դա բացահայտված կլիներ․ կա շրջանակ, որտեղ առկա է սպանություն կատարող անձը, սուբյեկտը, անգամ եթե մի քիչ ավելի նեղացնեն, ինքնությունը կարող են ակնհայտ պարզել»,- ասաց նա։

Սաֆարյանի խոսքով՝ դատաիրավական ռեֆորմը, առավել եւս՝ այս գործով պայմանավորված, չիրականացվեց, ինչի արդյունքում տուժեցին իրենք․ «Ինքը Ռոբերտ Քոչարյանն անգիր գիտի, թե որ խմբավորումներն են սպանությունների հեղինակները, ովքեր են կատարել, վստահ եմ՝ գիտի, թե ինչ դիպուկահարներ են օգտագործել, այնպես չէ, որ անգործության մատնվելու իր տեսակետը՝ իբր ինքը տեղյակ չէ, իր օգտին է խոսում»։

Մեկ ու կես տարվա դատավարությունը, ըստ Սաֆարյանի, իրենց եւ հանրությանն ապացուցեց, որ դատարանի դահլիճում տեղի չի ունենում դատավարություն, նրա խոսքով՝ տպավորություն է, որ մարդիկ լսարան են մտել ու ուզում են իրենց դասախոսությունները կարդալ։

Տուժողի ներկայացուցիչը նշեց, որ իրենք տարանջատվել են նաեւ մեղադրող կողմից․ «Խնդիր ունենք նաեւ մեղադրող կողմի հետ․ եթե դուք բերեիք հանցավոր համաձայնության քրեական գործ, Ռոբերտ Քոչարյանը ո՛չ ՍԴ կդիմեր, ո՛չ ՌԴ կդիմեր, ո՛չ էլ՝ լրատվամիջոցի, ոչ մի տեղ չէր դիմի, ուղղակի խելոք կնստեր, իր կողքին նստած քիլլերի հետ կամ հանցավոր խմբավորման մեկ այլ անդամի, իսկ հիմա տպավորություն է, որ Քոչարյանն ու մյուսները գիտեն, թե գործառութային անձեռնմխելիությամբ օժտված մարդիկ են եղել եւ ինչ ուզեին, կարող էին անել»։ Ըստ Սաֆարյանի՝ եթե օպերատիվ աշխատանքը լավ տարվեր, եւ խմբի կազմը ավելի ամբողջական գար դատարան, նյարդային վիճակում չէին հայտնվի ո՛չ իրենք, ո՛չ դատարանը․ «Մեր անհամաձայնությունը մեղադրական եզրակացության հետ ավելի կարեւոր է մեղադրողի համար, քան դատարանի․ դատարանը կասի՝ էսպես են բերել, այս մեղադրանքի սահմաններում եմ քննում, իսկ մեղադրողը պետք է այդ ձեւակերպումներով մեղադրանքը հետ տաներ եւ կարգավորեր, այս պայմաններում մենք դժգոհություն ունենք նաեւ մեղադրողներից, որովհետեւ շատ հարցերում մեզ չեն միանում»։

Սեդա Սաֆարյանի խոսքով՝ իրատեսական չէ հեռահար նպատակներ ունենալ, թե արդար դատաքննության սկզբունքը դատարանի այդ կազմով կպահպանվի նաեւ տուժողների համար․ ըստ նրա՝ դատարանը ոչ թե պետք է ժամեր, երբեմն օրեր շարունակ քննի մի միջնորդություն, ապա դրա քննությունը հետաձգելու որոշում կայացնի, այլ ի սկզբանե հետաձգի այդ միջնորդության քննությունը․ «Մարտի 1-ի թեմայից ընդհանրապես շեղվել են, այն փաստական հանգամանքները, որ տեղ են գտել մեղադրական եզրակացության մեջ, այսօր քննարկվելիք նյութի հետ առնչություն չունեն, եւ իրենք շատ վախեցած են, որ այդ փաստերը կհրապարակվեն, եւ ո՛չ Քոչարյանը, ո՛չ պաշտպանները այլեւս չեն ասի՝ մեղադրանքը ջուր է»։