Միջադեպ «Լիդիան Արմենիա»-ի պահնորդների եւ ջերմուկցիների միջեւ. Ոստիկանությունում նյութեր են նախապատրաստվում

Այս գիշեր միջադեպ է տեղի ունեցել Ամուլսար տանող ճանապարհի մոտ հսկողություն սահմանած ջերմուկցիների եւ «Լիդիան Արմենիա» ՓԲԸ-ի համար պահնորդական ծառայություն իրականացնող ընկերության աշխատակիցների միջեւ: Ինչպես ֆեյսբուքի իր էջի ուղիղ եթերի միջոցով հաղորդում է Ջերմուկի բնակիչ Շիրակ Բունիաթյանը, պահնորդները գիշերը հարձակվել են դեպի Ամուլսար տանող երկրորդ պահակակետում հերթափոխ իրականացնող ջերմուկցիների վրա։ «Դաժան ծեծի են ենթարկել։ Քարշ տալով մտցրել են ներս ու սկսել են ծեծել։ «Լիդիանը», վարձելով այս մարդկանց, տվել է հստակ առաջադրանք՝ համայնքի բնակիչների դեմ ուժ կիրառելու։ Մարդիկ հարձակվել են։ Ոստիկանապետն էլ ասաց, որ ունեն օպերատիվ նկարահանում ոստիկանների կողմից։ Նույնիսկ ոստիկանի են հարվածել»,- ասում է Շիրակ Բունիաթյանը։ 

Ավելի ուշ 37 վայրկյանանոց տեսանյութ է հրապարակել «Լիդիան Արմենիան»՝ նշելով, որ ջերմուկցիներն իրենց տարածք քարեր են նետել: Տարածած հաղորդագրության մեջ ընկերությունը նշում է, որ նախորդ օրը ճանապարհը հսկող խմբի անդամներին այցելել էին ԼՀԿ պատգամավորներ. «Հայտնի չէ, թե ինչ են խոստացել ապօրինություն իրականացնող խմբավորման անդամներին ԱԺ պատգամավորները, բայց հենց նույն գիշերն այս խմբավորումը հարձակում է գործել։ Ընդհանրապես, երկու տարի համայնքը վախի մթնոլորտում պահող խմբավորման սանձարձակ պահվածքը, մեր գնահատմամբ, ոչ միայն պատկան մարմինների հանդուրժողականության, այլ նաեւ այս ապօրինությունն այս կամ այն կերպ խրախուսող օրենսդիր մարմնի ներկայացուցիչների վարքագծի հետեւանք է։ Պատգամավորներից ոմանք արդեն երկու տարի հրապարակային խրախուսում են ապօրինությունը` դրանով անպատժելիության անուղղակի խոստում տալով հանցավոր խմբավորման անդամներին»:

Անորոշության այս երկու տարին սարի ճանապարհն ամառ-ձմեռ հսկող ջերմուկցիների տեսանկյունից է դիտարկել բնապահպան Լեւոն Գալստյանը: «Փորձ է արվում օրինական ճանապարհներով իրենց իրավունքները պաշտպանող Ջերմուկ քաղաքի բնակիչներին ներկայացնել՝ իբր քար շպրտողներ: Ժողովուրդ ջան, բոլորս էլ մարդ ենք, բոլորս էլ, կարող է, քար շպրտել ենք ինչ-որ ժամանակ: Բայց երբ 2.5 տարի խնդրին լուծում չի տրվում, եւ խնդիրը վերաբերում է մարդկանց փոքր հայրենիքի ճակատագրին, իսկ ջերմուկցիների համար Ջերմուկն ու այն շրջապատող սարերն իրենց փոքր հայրենիքն է, ապա նյարդերը կարող են եւ չդիմանալ: Բայց հարցն այդ չէ, այլ, թե ինչպես է փորձ արվում այս մարդկանց գործը սեւացնել: Հանքահենների բառերը կրկնելով՝ փորձում են մարդկանց վրա ցեխ շպրտել… Ջերմուկցիները պաշտպանում են իրենց քաղաքը, իրենց միջավայրի գոյությունը»,- նշել է Գալստյանը ֆեյսբուքյան ուղիղ եթերում:

ԼՀԿ պատգամավոր Անի Սամսոնյանն այսօր կասկածի տակ է դրել «Լիդիանի» պահնորդների՝ իրենց «հանդիպումը» նկարահանելու օրինականությունը։ «Լիդիան»-ը հակադարձել է, որ ԱԺ պատգամավորների հանդիպումը ջերմուկցիների հետ տեղի է ունեցել իրենց տարածքում եւ իրենք իրավասու էին այն տեսագրել ու տարածել:

Ոստիկանության հասարակայնության հետ կապի եւ լրատվության վարչությունից «Հայկական ժամանակ»-ին հաղորդեցին, որ այս գիշեր Ամուլսարի պահապանների եւ բնապահպանների միջեւ տեղի ունեցած միջադեպի վերաբերյալ ահազանգ է ստացվել, եւ հիմա Ջերմուկի բաժնում նյութեր են նախապատրաստվում: Այն հարցին, թե ջերմուկցիների խոսքով՝ միջադեպի ընթացքում եղել է տուժող ոստիկան, ինչպես է նա հիմա իրեն զգում, Ոստիկանությունից պատասխանեցին, որ տուժող ոստիկանի մասին այս պահին տեղեկություններ չունեն:

Նշենք, որ առկա է «Լիդիան Արմենիա»-ի հրապարակած տեսանյութը, որ մոնտաժված է, եւ դրանում ներառված են միայն ջերմուկցիների հետ ենթադրաբար ԼՀԿ-ի պատգամավորների հանդիպման, եւ երկու տղամարդու՝ քարեր նետելու կադրեր: Թե ինչ է նախորդել եւ հաջորդել այդ կադրերին, ըստ Լեւոն Գալստյանի, պիտի որ տեսագրված լինի տարածքում առկա այս տեսախցիկներով:

Հիշեցնենք, որ ջերմուկցիները պահանջում են Ամուլսարը՝ որպես բացահանք շահագործելու՝ ապօրինաբար տրամադրված լիցենզիայից զրկել «Լիդիան Արմենիա»-ին: Նրանք պնդում են, որ հանքի շահագործումը թե բնապահպանական եւ թե տնտեսական առումով աղետաբեր կլինի Ջերմուկ առողջարանային քաղաքի համար, քանի որ շահագործվող հանքի կողքին հանգստանալու, առավել եւս՝ բուժվելու այլեւս ոչ ոք չի գա: Բնապահպաններն էլ կասկած են հայտնում, որ շահագործման արդյունքում կուտակված դատարկ ապարները լիարժեք մեկուսացնելն անհնար է լինելու, եւ անձրեւաջրերը դրանցից լվանալու ու երկրի ընդերքի ջրերին են խառնելու թունավոր նյութեր, որոնք էլ հոսելով դեպի Սեւանա լիճ՝ թույնը հասցնելու են նաեւ այնտեղ: Թնջուկը մասնագիտորեն բացելու համար Հայաստանի կառավարությունը «Էլարդ» միջազգային փորձագիտական ընկերությանը պատվիրել էր փորձաքննություն անցկացնել եւ պատասխանել հարցերին՝ արդյոք հանքի շահագործումն անվտանգ կլինի օդի, հողի ու ջրի համար: «Էլարդ»-ի փորձագետները վարչապետ Նիկոլ Փաշինյանի հետ տեսաժողովի ժամանակ հայտնել էին, որ «Լիդիան Արմենիան» չի տրամադրել անհրաժեշտ տվյալները անվտանգության մասին հարցերին լիարժեք պատասխաններ տալու համար: Նոր փորձաքննություն չի պատվիրվել: «Լիդիան»-ը պնդում է, որ ջերմուկցիները պիտի դադարեն խոչընդոտել, որ իրենց աշխատակիցները մուտք գործեն տարածք՝ աշխատանքներ իրականացնելու համար: Ջերմուկցիները պնդում են, որ հսկելու են այնքան, մինչեւ իրենց փոքր հայրենիքի բնության հանդեպ անդառնալի վնասի վտանգ չտեսնեն: