Վարորդի եկամուտը քչացել է, չի աշխատի, ծնողներն էլ խառը դրության մեջ են. 3 գյուղի աշակերտներ դպրոց հասնելու խնդիր ունեն

Նոր ուսումնական տարին Շիրակի մարզի  Սարապատ խոշորացված համայնքի Վարդաղբյուր, Սալուտ, Հարթաշեն բնակավայրերի դպրոցականների համար խնդիրներով է սկսվել:

Այդ երեք բնակավայրերում միայն տարրական դպրոց է գործում: Բարձր դասարանցիներն արդեն 17-18 տարի Մուսայելյանի դպրոց են հաճախում: Փոխադրամիջոցի համար տարիներ շարունակ աշակերների թվի հաշվարկով վճարել է Շիրակի մարզպետարանը՝  Կրթության, գիտության, մշակույթի եւ սպորտի նախարարության հետ ունեցած պայմանագրային պայմանավորվածությամբ:

«Վարդաղբյուրից մտել են Սալուտ, Սալուտի երեխեքին էլ վերցրել գնացել են Մուսայելյան։ Հետո տեղափոխել են Հարթաշենի երեխեքին։ Գծի ընդհանուր երկարությունը 3 կմ է Վարդաղբյուրից մինչև Սալուտ: Իրենց բերել իջեցրել են, գնացել են 1 կմ էլ Հարթաշենի երեխեքին են բերել Մուսայելյան:Հետո էլ դասերից հետո նույն ձևով երեխեքին ետ են տարել տները: Բայց էս տարի խնդիր է առաջացել: Մարզպետարանը էլ չբդի վճարե էդ գումարը, ամեն աշակերտի հասանելիքը ծնողին կուտան, ծնողն էլ մեքենա բդի գտնի, իրա երեխուն ճամփե դպրոց, իսկ էդ նախկին գազելների շոֆերներն էլ չեն համաձայնե էդ պայմաններով քշեն, ու էլ չեն սպասարկե»,- ՀԺ-ի հետ զրույցում տեղեկացրեց Սարապատի համայնքապետ  Արտուշ Մանուկյանը։

Ի՞նչ տարբերություն, մարզպետարանն է վճարում, թե ծնողը, քանի որ գումարը կրկին տրվելու է աշակերտի թվով: ՀԺ-ի հարցին համայնքապետը պատասխանեց՝ մեծ տարբերություն:

«Հմի նոր կարգով յուրաքանչյուր սովորող երթևեկողի համար մարզպետարանը օրական 200 դրամ հատկացում է կատարում, բնակիչն ինքը բդի կարողանա ելք գտնի ու էդ եղանակով երեխաներին տեղափոխեն։ Հիմա նախկին վարորդները էդ չափի գումարով չեն համաձայնում աշխատեն։ Սաղ խնդիրն էդ է: Գազելները ոչ թե գծից են դուրս եկել, այլ չեն աշխատի, քանի որ իրանց եկամուտը քչցել է։ Առաջ իրանց օրականը կկազմեր 7000 դրամ, հմի դառել է 3500, իրանք էլ չենք ուզում էլ աշխատին»,- ասաց համայնքապետը:

Ըստ Շիրակի մարզպետարանից ստացված տեղեկատվության, նախկինում դպրոցը երեխաների տեղափոխման համար ունեցել է բյուջե, այդ գումարը տրամադրել է պետությունը: Դպրոցն էլ գտել է տնտեսվարողին, կնքել պայմանագիրը: Հիմա արդեն յուրաքանչյուր աշակերտի հաշվով 200 դրամ պետությունը ծնողին գումար է հատկացնելու, ծնողն էլ գտնելու է վարորդին, որն իր երեխային կհասցնի դպրոց: Խնդիրը հենց այստեղ է, ծնողները նման գումարով ծառայություն մատուցող վարորդ չեն կարողանում գտնել:

Որքա՞ն գումար է նախկինում տրվել դպրոցներին: «Յուրաքանչյուրին իր աշակերտների թվին համապատասխան»,- տեղեկացրին մարզպետարանից: Գումարի հստակ չափ չգիտեն, սակայն նշում են՝ նոր կարգով հատկացվող ֆինանսավորումից էական տարբերություն չկա:

Շիրակի մարզպետ Տիգրան Պետրոսյանը ՀԺ-ի հետ զրույցում ասաց՝ կարգի փոփոխությունն իրականում կարող է նաև նորմալ հնարավորություն լինել շատ ծնողների համար.

«Հեռավոր գյուղերի պարագայում իրականում ընտանիքներն են տնօրինում էդ գումարն ու իրենց երեխաների տեղափոխումն իրականացնում են: Նման ընտանիքների դեպքում մոտեցումը նորմալ է, բայց ընտանիք կա, որ չի կարողանում այդ հարցը կարգավորել, և ուզում է, որ հին մեխանիզմը վերադառնա։ Բայց հիմա որ արդեն բանակցում են նախկինում փոխադրումն իրականացրած անձանց հետ, էս նոր կագով շահավետության առումով նրանց հարմար չէ, և իրենք հրաժարվում են իրականացնել նախկին աշխատանքը»։

Ստեղծված իրավիճակից դուրս գալու ելք առաջարկել է Սարապատի համայնքապետը, մարզպետը շարունակում է քննարկումները ԿԳՄՍ նախարարության հետ, նախարարությունն էլ իր հերթին ՀԺ-ի հարցմանն ի պատասխան տեղեկացնում է, թե խնդրից տեղյակ են, այս պահին քննարկվում են լուծման հնարավորությունները:

Սարապատի համայնքապետը մեզ հետ զրույցում ասաց առաջարկել է 3 բնակավայրերի վարչական ղեկավարներին իրենց միջոցներով և նախկին հաշվարկով իրականացնել աշակերտների տեղափոխումը: Առաջարկն ընդունվել է որպես հանձնարարություն, և այս պահին Սալուտի, Հարթաշենի ու Վարդաղբյուրի երեխաներն առանց խնդիրների կարողանում են հասնել Մուսայելյանի դպրոց: Համայնքապետը, սակայն, նշում է, երկար չեն կարողանա այս տարբերակով աշխատել:

«Ամեն ամսվա վերջին կտան ցուցակը, թե յուրաաքանչյուր երեխա քանի օր է հաճախել դասի, դրանով էլ ներկա ամեն օրվա համար կվճարեն 200-ական դրամ։ Հաշվետվությունը կուղարկվի մարզպետարան, մարզպետարանը հաջորդ ամսի ֆինանսավորման հետ կիջեցնե նաև այդ գումարը։ Ես հմի չեմ պատկերացնե, ինչ կերպ կեղնի, մենք էս պահին հին ձևով կաշխատինք, երեխեքը պարտադիր դպրոց բդի հասնին, ուրիշ տարբերակ չկա»,- ասաց համայնքապետը:

Կարգը ոչ նոր է փոխվել, ոչ էլ մեկ-երկու ամիս առաջ: «Հանրակրթական դպրոցների մանկավարժներին եվ դպրոցահասակ երեխաներին տրանսպորտային ծառայությունների դիմաց փոխհատուցման կարգը եվ հանրակրթական դպրոցների կողմից ներկայացվող նախորդ ամսվա փաստացի հաճախումների մասին հաշվետվության ձեւը հաստատելու մասին» ՀՀ ԿԳՄՍ նախարարի հրամանում փոփոխություններ ու լրացումներ են կատարվել  2020 թվականի փետրվարի 21-ին:

Արդյո՞ք հնարավոր չէր խնդիրն այդ պահին կամ դրան հաջորդած 7 ամիսների ընթացքում քննարկել, և այսօր չկանգնել փաստի առաջ: ՀԺ-ի այս հարցին պատասխանելով՝ Շիրակի մարզպետն ասաց՝  այդ ժամանակ խնդիրն ակնհայտ չէր:

«Կարգի փոփոխությունը գարնանն է եղել, բայց քանի որ դասեր չկային, ակնհայտ չէր, որ կար խնդիր: Իհարկե, կային տարբեր անորոշություններ: Հիմա քննարկում ենք: Մեր քննարկումները շարունակում ենք, որպեսզի ընդունելի մոտեցումներ գտնենք բոլոր կողմերի համար»,- վստահեցրեց Տիգրան Պետրոսյանը։

Տպել
576 դիտում

Լավրովի նշած «վերահսկման մեխանիզմները» անհրաժեշտ, բայց ոչ բավարար պայման են հրադադարի համար

Մահ ու պայքար՝ Լեռնային Ղարաբաղում. սարսափելի պատերազմի ռազմաճակատից. The New York Times-ի անդրադարձը

Այսօր ՊԲ հակաօդային պաշտպանության ստորաբաժանումները խոցել են 5 անօդաչու թռչող սարք (տեսանյութ)

Պատերազմը չի ավարտվել, դաժան ու սաստիկ պատերազմ է եւ մեր բոլորի ներդրումը չափազանց կարեւոր է. ՊՆ ներկայացուցիչ

Թուրքիայում ապրող հայաստանցիները հայրենիք վերադառնալու ճանապարհներ են փնտրում. նրանք տագնապած են

Արծրուն Հովհաննիսյանը՝ հակառակորդի դիակները հուղարկավորելու մասին

Արցախում զոհվել է «Թևանիկ» ֆիլմի գլխավոր հերոսներից Հովհաննես Խոդերյանը

Ամեն կերպ պետք է օգնել, որ մեր երեխաները դառնան ոչ թե նահատակված, այլ կենդանի հերոսներ. Ալբերտ Հովաննիսյանի հայր

Հյուսիսում թշնամին այսօր կենդանի ուժի զգալի կորուստներ է ունեցել, իսկ հարավում շարունակվել են ծանր մարտերը. Պողոսյան

Այս պահին մարտերի ուժգնությունը որոշակիորեն թուլացել է. Արծրուն Հովհաննիսյան

ԱՄՆ պետքարտուղար Պոմպեոն Վաշինգտոնում առանձին հանդիպումներ կունենա Հայաստանի եւ Ադրբեջանի ԱԳ նախարարների հետ

Մեր տղաները իմիտացիա են անում, իբր նահանջել են, հետևից սողեսող մոտենում են թշնամու տանկին, հարվածում. Հովհաննիսյան

Ադրբեջանի ագրեսիվ գործողությունների հետևանքով վիրավորված Ռոբերտն ու Նարեկը դուրս են գրվել վերակենդանացման բաժանմունքից

Ալեքսանդր Կարապետյանը երրորդ գոլն է խփել Ռուսաստանի առաջնությունում և այն նվիրել հայրենիքի պաշտպաններին

Բախվել են ավտոմեքենաներ․ տուժածները տեղափոխվել է են «Աստղիկ» բժշկական կենտրոն

Վարչապետը հանդիպում է ունեցել արտախորհրդարանական քաղաքական ուժերի ներկայացուցիչների հետ

Կորոնավիրուսը կարող է լսողության կորստի պատճառ դառնալ. կորոնավարակակիրներին սպասարկող բուժկենտրոններն ավելացել են 5-ով

Հայտնաբերվել է արգելված հրապարակումների 108 դեպք. 82-ը՝ լրատվական գործունեություն չիրականացնող անձանց կողմից

Մեր բոլոր միջազգային գործընկերներին կոչ եմ անում պատերազմը դադարեցնելու հստակ հայտարարություն անել. նախագահ

Կոռուպցիայի կանխարգելման հանձնաժողովի մրցութային խորհրդի անդամ է նշանակվել «Իմ քայլի» պատգամավոր Հերիքնազ Տիգրանյանը