«100-ից ավելի մարդու են կանչում հարցաքննության, երբ ոչ մի բովանդակություն չկա». Էնֆիաջյանը՝ ընտրակաշառքի գործի մասին

«Բարգավաճ Հայաստան» խմբակցության պատգամավոր, Ազգային ժողովի փոխխոսնակ Վահե Էնֆիաջյանն այսօր հայտարարեց, որ հոկտեմբերի 8-ի համապետական հանրահավաքը տեղի է ունենալու՝ անկախ նրանից, թե ինչ զարգացումներ կլինեն, որովհետեւ հավաքների, հանդիպումների խրոնիկան դասակարգելով՝ իրենք արձանագրում են, որ մարդկանց հոսքը գնալով ավելանում է:

Երեւանի ընդհանուր իրավասության դատարանի Կենտրոն եւ Նորք Մարաշ նստավայրի բակում, ուր Էնֆիաջյանը եկել է աջակցելու ԲՀԿ ղեկավար Գագիկ Ծառուկյանին, նա ծավալուն զրույց ունեցավ լրագրողների հետ՝ խոսելով իրենց ծրագրերի, ՀՀ-ում առկա խնդիրների եւ ընդդիմադիր մյուս կուսակցությունների հետ համագործակցության հնարավորությունների մասին:

Նախ անդրադառնալով Գագիկ Ծառուկյանի վերաբերյալ քրեական գործին՝ Վահե Էնֆիաջյանն ասաց, որ այն քաղաքական ենթատեքստ ունի: Նա դեռեւս ձեռնպահ մնաց կարծիք հայտնելուց, թե իշխանությունը փորձում է նախքան հանրահավաքը հասնել Ծառուկյանի կալանավորմանը, բայց պնդեց՝ եթե անարդար որոշում կայացվի, իրենց պայքարն ավելի մեծ թափով կշարունակվի. «Ամեն դեպքում, ես լիահույս եմ, որ դատարանը նման որոշում չի կայացնի»,- ասաց նա: Հարցին, թե պայքարի ի՞նչ տեսակ են ընտրելու, Վահե Էնֆիաջյանը պատասխանեց, որ օրենքով չարգելված բոլոր միջոցներն օգտագործելու են: Հարցին, թե ինչո՞վ է ԲՀԿ-ն խանգարում իշխանությանը, Էնֆիաջյանը պատասխանեց. «Ես կարծում եմ՝ այդ հարցը պետք է տաք իշխանության ներկայացուցիչներին, մեր՝ հունիսի 5-ի հայտնի քաղաքական նիստից հետո սկսվեց հայտարարությունների շարք, եւ, ըստ էության, քաղաքական խոսք չհնչեց, այլ սպառնալիքներ, վիրավորանքներ, ինչին հաջորդեց այս քրեական գործը, սա քաղաքական ենթատեքստ ունի, շատ մարդ շատ բան կարող է ասել, բայց կա իրականություն, որը ուշ թե շուտ ջրի երես է դուրս գալու եւ բոլորի համար պարզ է լինելու»,- ասաց նա:

Լրագրողներից մեկը հետաքրքրվեց՝ արդյո՞ք հանրահավաքի օր հայտարարելը կապված էր դատական գործընթացների զարգացումների հետ, պատգամավորը պատասխանեց. «Դուք ինքներդ եք ասում, որ տեւական ժամանակ մենք խոսել ենք այն մասին, որ ունենալու ենք հանրահավաք, եւ մի առանցքային հարց. մի՞թե այս ժամանակահատվածում Գագիկ Ծառուկյանը հավաքներ չի անցկացրել ՀՀ-ի տարբեր հատվածներում՝ մարզերում, մայրաքաղաքում, իհարկե, մենք օրն էլ ենք ասել, գիտեք ի՞նչ՝ եթե կուսակցական այդ ակտիվ հանդիպումները ամփոփենք, եղել են հանդիպման օրակարգային հարցեր, հանդիպման ժամանակ մարդկանց, որոնք մտահոգ են ստեղծված իրավիճակով, հարցեր են ուղղվել՝ էսինչ խնդիրները առկա՞ են, առկա չե՞ն»,- նշեց նա:

Մյուս հարցին՝ ԲՀԿ-ական այլ պատգամավորի իրավապահները «անհանգստացնո՞ւմ են», Վահե Էնֆիաջյանը պատասխանեց. «Ինձնից սկսած՝ որեւէ մեկը չի վախենում խոսելու, կոշտ գնահատականներ տալու հարցում, կաշկանդվածություն չենք ունեցել, չունենք ու չենք էլ ունենալու, ով ինչ կանի՝ ժամանակը ցույց կտա»: Էնֆիաջյանը պնդեց, որ ինքն իր կյանքում որեւէ բան չի արել, որի համար կարող է ամաչել կամ վախենալ:

Անդրադառնալով ԱԱԾ տնօրեն Արգիշտի Քյարամյանի հայտարարությանը, որ ընտրակաշառքի գործով մի քանի տասնյակ մեղադրյալներ կան՝ ԱԺ փոխխոսնակն ասաց. «Բազմաթիվ մարդիկ կան, որ լայն ճանաչում չունեն, բայց իրենց համայնքներում հեղինակություն են, հարգանք են վայելում, կուսակցության ներկայացուցիչներ են, նրանց կանչում են հարցաքննության եւ բաց են թողնում, որովհետեւ իրականության մեջ որեւէ նյութ չկա, կանչում են, ներկայանում են, որեւէ մեկը մտածելու բան չունի, ՀՀ-ում չեղած տեղը 100-ից ավելի մարդու են կանչում հարցաքննության, երբ ոչ մի բովանդակություն չկա, ես ի՞նչ գիտեմ՝ ինչ ցուցմունք են գրել, ըստ էության՝ ստեղծված իրավիճակի հետ կապված հարցեր են տվել»:

Լրագրողներից մեկը հիշեցրեց, որ ԲՀԿ-ականները խոսում են խտրական վերաբերմունքի մասին եւ հետաքրքրվեց՝ արդարացի՞ կլիներ, որ ընտրակաշառքի համար նաեւ ՀՀԿ-ի ներկայացուցիչները մեղադրյալի կարգավիճակում լինեին, ինչին պատգամավորը պատասխանեց. «Ես առհասարակ մի բան եմ ուզում ասել, որն իմ անձնական տեսակետն է, եւ կարծում եմ՝ յուրաքանչյուր բանական մարդ այդպես կմտածի. եթե որեւէ մեկը ընտրակաշառք կամ հակաօրինական այլ գործունեություն է ծավալել, բնականաբար, պետք է պատասխանատվության ենթարկվի»:

Խոսելով «Հայրենիք» եւ «Հայ հեղափոխական դաշնակցություն» կուսակցությունների հետ ունեցած իրենց կապի մասին՝ Վահե Էնֆիաջյանն ասաց, որ իրենց կապում է ոչ թե կուսակցական գաղափարական ընդհանրությունները, այլ ՀՀ-ում ստեղծված վիճակը եւ դրա լուծման ուղիները: Էնֆիաջյանը թվեց խնդրի մի քանի օրինակ, ինչպիսիք են կադրերի անփորձությունը, տարբեր ոլորտներում ձախողումները, վատթարացող տենդենցը: Դիտարկմանը, որ այդ քննադատությանը իշխանությունը հակադարձել է՝ ասելով՝ ավելի լավ է անփորձ լինել, քան կաշառքի գործերի մեջ, Էնֆիաջյանն ասաց. «Ես կարծում եմ, որ պետք է ո՛չ անփորձ լինեն, ո՛չ կաշառքի գործերի մեջ լինեն, եւ եկեք մի բան հասկանանք. սիրելի հայրենակիցներ, շատ սիրելի լրագրողներ, ինչի՞ համար են ասում՝ անփորձին պիտի փոխարինի կաշառակերը, ո՛չ, կաշառակեր չի լինելու, եւ անփորձն էլ չպիտի լինի, որովհետեւ որեւիցե մեկը փորձադաշտ չէ, փորձառությունը տարբեր աստիճաններ ունի, չի կարող պատգամավորի կամ նախարարի կենսագրությունը երեք տող լինել»: Ինչ վերաբերում է հանրահավաքին ՀՀԿ-ի մասնակցությանը, ըստ պատգամավորի՝ նման հարց իրենք չեն քննարկել:

Վահե Էնֆիաջյանի խոսքով՝ իրենց հանրահավաքին կհնչեն այն օրակարգային հարցերը, որոնք իրենց համար արդիական եւ ժողովրդի համար անհրաժեշտություն են: Հարցին՝ իշխանափոխության պահանջը կա՞ այդ օրակարգում, Էնֆիաջյանը պատասխանեց. «Մեզ մոտ օրակարգային փոփոխություն տեղի չի ունեցել, այս պահին մենք գտնվում ենք դատարանի առջեւ եւ արձանագրում ենք խնդրահարույց իրավիճակ, որը ոչ թե իրավական, այլ քաղաքական բովանդակություն ունեցող գործընթաց է»,- ասաց նա:

Հիշեցնենք, որ այսօր այստեղ քննվում է ԲՀԿ ղեկավար Գագիկ Ծառուկյանին կալանավորելու միջնորդությունը, որը դատարանին ներկայացրել է ՀՀ ազգային անվտանգության ծառայությունը: