Հայերը, վրացիներն ու ադրբեջանցիները խաղաղության կոչերով են հանդես գալիս Վրաստանի Կառավարության շենքի դիմաց

Քիչ առաջ Վրաստանի կառավարության շենքի դիմաց էին հավաքվել վրացի, հայ, եւ ադրբեջանցի երիտասարդներ ու խաղաղության կոչերով էին հանդես գալիս՝ դիմելով Ղարաբաղյան հակամարտության կողմերին:

Նրանց պարզած պաստառների վրա գրված էր հայերեն, վրացերեն եւ ադրբեջաներեն լեզուներով. «ոչ պատերազմին», «չեմ ուզում պատերազմ», «պատերազմը հանցագործություն է», «Կովկասն իմ տունն է», «Խաղաղությունը շովինիզմին, էթնո ազգայնականությանն ու ռազմատենչությանը ոչ ասելն է»։ Ցույցի մասնակիցների հիմնական ուղերձները սրանք են:

Ավելի ուշ նրանք նաեւ հայտարարություններով հանդես եկան:

«Մեզ համար շատ կարեւոր է խաղաղություն պահպանել Կովկասի ժողովուրդների միջեւ: Մենք դեմ ենք պատերազմին ցանկացած տարածաշրջանում, դեմ ենք նրան, ինչ տեղի է ունենում այսօր Ղարաբաղում: Վրաստանը համարում է, որ այս կոնֆլիկտը ունի բոլոր հնարավորությունները երկխոսությամբ լուծվելու: Մեր այստեղ հավաքվելու հիմնական նպատակն է, որ կողմերը նստեն քննարկման սեղանի շուրջ: Անթույլատրելի է, որ փոքր երեխաներ, անմեղ մարդիկ ու զինվորներ են մահանում Ղարաբաղում»,- ասաց վրացի ակտիվիստներից Անին:

Վերջինս նաեւ հույս հայտնեց, որ այն քաղաքական գործիչները, որոնք շահագրգռված են խնդրի կարգավորմամբ, վերջապես կսկսեն գիտակցել, թե ինչ է կատարվում սահմանի երկու կողմերում:

Նշենք նաեւ, որ այս ցուցարաների թվում են այն մարդիկ, որոնք վրաստանյան մի շարք հասարակական կազմակերպությունների անդամներ են եւ օնլայն ստորագրահավաք են իրականացնում, որպեսզի խաղաղության հաստատվի։ Նրանք դիմում են Լեռնային Ղարաբաղի հակամարտության մասնակից կառավարություններին եւ միջազգային դերակատարներին: Կոչ են անում կոնֆլիկտի հասցեատերերին վարել խաղաղ եւ մարդասիրական քաղաքականություն:

«Մանիֆեստ» կոչվող փաստաթուղթը ստորագրել  են 17 կազմակերպություններ, այդ թվում՝ «Մարդու իրավունքների կրթության եւ մոնիթորինգի կենտրոնը», «Կովկասի տունը», «Մարդու իրավունքների կենտրոնը», «Ներգրավման եւ զարգացման կենտրոնը», «Բաց հասարակության հիմնադրամը», «Հավասարության շարժումը», «Սափարի միությունը», «Վրաստանում կանանց հիմնադրամը», «Վրաստանի երիտասարդ իրավաբանների ասոցիացիան» եւ այլն:

Նրանց հայտարարությունների մեջ մասնավորապես ասվում է. «Արդեն մի քանի օր է, ինչ մենք ականատես ենք լինում վերջին տարիներին Լեռնային Ղարաբաղում՝ Ադրբեջանի և Հայաստանի միջև ամենաբարդ զինված առճակատման մեկնարկին և հակամարտության գոտում ռազմական իրավիճակի ծայրահեղ սրմանը: Այսօր երկու պետություններում էլ ռազմական դրություն է հայտարարված, և ընթանում է բնակչության զանգվածային ռազմական մոբիլիզացիա: Երկու պետություններն էլ հայտնում են զոհերի մասին, այդ թվում՝ խաղաղ բնակիչների շրջանում: Չնայած միջազգային կազմակերպությունների և այլ դերակատարների քննադատական հայտարարություններին, ռազմական կոնֆլիկտը քաղաքական բանակցությունների դաշտ տեղափոխելու նշաններ եւ պատրաստակամություն, ցավոք, մինչ այժմ չենք տեսել»:

Ստորեւ ներկայացնում ենք նրանց կոչի հիմնական կետերը.

Վրաստանի կառավարությանը՝

Խստորեն պահպանել չեզոքություն ստեղծված հակամարտությունում եւ հնարավորության սահմաններում ձեռնարկել հումանիտար եւ այլ միջոցներ երկու երկրներում էլ տուժած քաղաքացիական բնակչությանը աջակցելու համար,

Ավելի լավ հասկանալ իր դերը տարածաշրջանում խաղաղության աջակցության գործընթացի մեջ և ակտիվ քայլեր ձեռնարկել կողմերի միջև բանակցությունների գործընթացի մեկնարկը հեշտացնելու համար,

Անցկացնել համապատասխան քաղաքական և մշակութային միջոցառումներ՝ Վրաստանում ռազմական և քաղաքական լարվածության հետ կապված զգացմունքների ու տրամադրությունների տարածումը կանխելու նպատակով:

Ադրբեջանի եւ Հայաստանի կառավարություններին՝

Անհապաղ քայլեր ձեռնարկել ռազմական առճակատումը դադարեցնելու ուղղությամբ և աշխատել խաղաղ քաղաքական բանակցությունների միջոցով կարգավորել հակամարտությունն ու լարվածությունը:

Ռուսաստանի եւ Թուրքիայի կառավարություններին՝

Չմասնակցել ստեղծված ռազմական առճակատմանը և իրենց միջամտությամբ չխորացնել ստեղծված ռազմական և քաղաքական բախումն ու տարածաշրջանում ստեղծված լարվածությունը։

Միջազգային կազմակերպություններին, այդ թվում՝ ՄԱԿ-ին, ԵԱՀԿ-ին, ՆԱՏՕ-ին, Եվրոպայի Խորհրդին ու Եվրամիութանը՝

Ձեռնարկել ավելի արդյունավետ եւ անմիջական միջոցներ հրադադարի ռեժիմի դադարեցման համար եւ մշակել ավելի արդյունավետ ռազմավարություններ՝ Լեռնային Ղարաբաղի հակամարտության խաղաղ եւ քաղաքական լուծմանը նպաստելու համար:

Վրաստանում գործող լրատվամիջոցներին՝

Զինված հակամարտության հետ կապված իրադարձությունները հնարավորինս չեզոք լուսաբանել եւ հաշվի առնել Վրաստանում տեղական էթնիկ փոքրամասնությունների գործոնը: