Վիրավորվածների 30 տոկոսը 24 ժամվա ընթացքում վերադառնում են շարք․ Արծրուն Հովհաննիսյան

Այսօր առավոտից Ադրբեջանի զինված ուժերը նորից վերսկսել են հարձակվողական գործողությունները՝ ինչպես հյուսիսում, այնպես էլ՝ հարավում։ Հարավային ուղղությամբ ավելի մեծ ուժերով եւ ավելի սաստիկ հարձակում են նախաձեռնել։

Այս մասին քիչ առաջ Գորիսում տեղի ունեցած մամուլի ասուլիսի ժամանակ ասաց ՊՆ ներկայացուցիչ Արծրուն Հովհաննիսյանը։

Նա հայտնեց, որ հայկական զինված ուժերը պատասխան կրակով ոչնչացրել են զգալի թվով կենդանի ուժ, զրահատեխնիկա եւ այլ միջոցներ՝ հակառակորդին հետ շպրտելով ելման բնագծերը։ Նման մանր փորձեր, Հովհաննիսյանի փոխանցմամբ, եղել են նաեւ այլ ուղղություններով։ «Այս պահի դրությամբ համառ մարտեր են ընթանում հատկապես հարավային ուղղությամբ։ Այսօր եւ անցնող ողջ գիշերը, որին ես ականատես եմ եղել, ադրբեջանական զինված ուժերը հրթիռակոծել են Արցախի տարբեր բնակավայրերը, մասնավոարապես՝ Շուշին, Ստեփանակերտը»,- ասաց ՊՆ ներկայացուցիչը։

Հովհաննիսյանը նաեւ շեշտեց, որ այսօր հրթիռակոծության հետեւանքով վիրավորվել են նաեւ լրագրողներ։ Նրանցից մեկի վիճակը, նրա խոսքով, գնահատվում է ծանր։ Այսօր երկու անգամ, ինչը միանշանակ ապացուցում է գործողության դիտավորությունը, Ադրբեջանի զինված ուժերը հրթիռային հարվածներ են հասցրել Շուշի քաղաքի Սուրբ Ղազանչեցոց եկեղեցուն։ Հովհաննիսյանի փոխանցմամբ՝ այս գործողությունների արդյունքում եկեղեցին զգալի տուժել է։ Հովհաննիսյանը նշեց, որ դա եղել է առաջնագծում հաջողության հասնելու անկարողության ազդակ, նաեւ՝ եղել է մտածված հարված։ «Ընդհանուր առմամբ՝ նման քայլերը ռազմաճակատի հենց առաջին օրից եղել են անհաջողությունների ֆոնին, մյուս կողմից էլ՝ մենք դարեր շարունակ տեսել ենք, որ մեր սրբավայրերը միշտ թիրախավորվել են»,- ընդգծեց ՊՆ ներկայացուցիչը։

Նա ներկայացրեց ադրբեջանական ագրեսորների հարվածների ամփոփումը՝ միայն Արցախի քաղաքացիական բնակչության նկատմամբ։ «Ընդհանուր առմամբ՝ կա 93 վիրավոր, որից միայն 20-ն են թեթեւ կամ միջին ծանրության, մյուսները՝ ծանր են։ Կա 20 զոհված՝ չհաշված ՀՀ-ում գրանցված 1 զոհը։ Հիմնովին կամ մասնակի ավերվել է 4600 անշարժ գույք, 430 մասնավոր շարժական գույք է շարքից դուրս եկել, 750 տարբեր տեսակի ենթակառուցվածքներ՝ հանրային եւ առեւտրային օբյեկտներ»,- ասաց ՊՆ ներկայացուցիչը՝ շեշտելով, որ այս տվյալներում դեռեւս ամփոփված չեն երեկ գիշերվա եւ այսօրվա ցուցանիշները։

Նա նաեւ ընդգծեց, որ այս պահին ընթանում են համառ մարտեր, եւ կողմերի կոնկրետ որեւէ ուղղությամբ որեւէ մարտավարական հաջողության կամ անհաջողության կամ ձեռքբերումների մասին այս պահին նշել չի կարող։

Լրագրողներից մեկը, անդրադառնալով վարչապետի այսօրվա հայտարարությանը, թե մեր զորքերում ստահոդ տեղեկություններ տարածող անձինք կան, հարցրեց, թե որքանո՞վ է նրանց հաջողվել իրականացնել իրենց նենգ նպատակները։ Հովհաննիսյանը նախ շեշտեց, որ դրանք տեղեկություններ են, որոնց ինքը չի տիրապետում։ Սակայն եւ ընդգծեց, որ կարող են այս պահին եւս լինել նման մարդիկ մեր զինված ուժերում։ «Մեր քաջության ու սխրանքների մեջ դրանք կարող են չերեւալ, բայց Հատուկ ծառայությունները հենց նրա համար են, որ կարողանան գտնել նման դավաճանական գործունեություն ծավալած մարդկանց»,- հավելեց Հովհաննիսյանը։ Նա նաեւ ցավով շեշտեց, որ պատերազմների ժամանակ հերոսությունների կողքին երբեմն լինում են դավաճանություններ։ Սա պատերազմ է, եւ Հովհաննիսյանի համոզմամբ, դավաճանությունը պատերազմում անխուսափելի է։ Կարեւորը, որ ռազմավարական կառավարման համակարգը կարողանում է տիրապետել իրավիճակին, վերհանել, գտնել դեպքերը։

Լրագրողներից մեկը նաեւ մեջբերեց, որ արդեն տեւական ժամանակ է մենք հրապարակում ենք ադրբեջանական կողմի սպառազինության կորուստների մասին եւ հարցրեց, թե քանի՞ տոկոսն ենք մոտավորապես մենք արդեն առգրավել կամ ոչնչացրել։ Հովհաննիսյանը նշեց, որ ստույգ տոկոսով չի կարող ասել, քանի որ դա ռազմական գաղտնիք է, բայց եւ շեշտեց, որ ոչ մի բանակի սպառազինություն այսպիսի ինտենսիվ մարտական գործողությունների մեջ կիրառելիս անսպառ չէ։ «Ինչքան էլ զուգահեռաբար մատակարարումն ապահովես, չես կարող այս կորուստները վերականգնել նույն տեմպերով»,- ասաց Հովհաննիսյանը եւ հավելեց, որ առաջին 5 օրերի ընթացքում կորուստների տեմպերը չափազանց բարձր էին, հիմա անկում է, քանի որ այդ տեխնիկան այլեւս չկա, որպեսզի նույն ինտենսիվությամբ կիրառեն։

Հիմա ավելի շատ կիրառվում է հրետանի, որի կուտակված միջողները, Հովհաննիսյանի խոսքով, ավելի շատ են, քան, օրինակ, տանկինը կամ հետեւակի մարտական մեքենան։ «Բայց այն, որ նրանք փորձում են լրացնել եւ համառորեն շարունակել իրենց ցեղասպան ու մարդասպան գործունեությունը, ակնհայտ է։ Ինչքան կտեւի, ինչպես կտեւի, դժվարանում եմ պատասխանել։ Շատ բարդ կանխատեսելի երեւույթ է»,- ասաց Հովհաննիսյանը։

Հարցին, թե այդ սպառազինության ո՞ր մասն է Թուրքիայինը, որը՝ Ադրբեջանինը, Հովհաննիսյանը պատասխանեց, որ մեծ մասը, ամեն դեպքում, Ադրբեջանինն է՝ խորհրդային, ռուսական արտադրության, որից օգտվում ենք նաեւ մենք։ Բարձր տեխնոլոգիական տոկոսը պատկանում է իսրայելական սպառազինությանը, եւ այդ նույն ոլորտում կա նաեւ թուրքական մասնաբաժինը։ Թուրքական մասնաբաժին, ՊՆ ներկայացուցչի փոխանցմամբ, կա նաեւ սովորական սպառազինությունների մեջ՝ հրետանային միջոցներ, արկեր, հրաձգային զենքեր։

Մյուս հարցին, թե այս պահին քանի՞ վիրավոր զինծառայող ունենք, Հովհաննիսյանը դժվարացավ ստույգ պատասխանել։ Այնուամենայնիվ, նա շեշտեց, որ մեզ մոտ՝ մեր բժշկական ծառայության բարձր որակավորման շնորհիվ՝ վիրավորների մոտ 30 տոկոսը 24 ժամվա ընթացքում ստանում են բուժօգնություն եւ վերադառնում շարք։ Այստեղ նա ընդգծեց նաեւ փաստը, որ կողմերը հրետանային միջոցներ կիրառում են շատ խիտ՝ օրական տասնյակ հազարավոր արկեր։