«Թուղթը վերածենք զենքի»․ նոր նախաձեռնությամբ Երեւանում թուղթ են հավաքում

«Թղթե շերեփով հարիսա չենք ուտի։ Թուղթը վերածենք զենքի»․ Երեւանում օրերս մեկնարկած նախաձեռնության կարգախոսն է:

Սահմանին պատերազմ է, թիկունքից աջակցելու համար էլ բանակին պետք է օգնել՝ բոլոր ռեսուրսներն օգտագործելով, անգամ՝ թուղթը զենք դարձնելով: Կապն իրականում անհասկանալի չէ, ինչպես կարող է առաջին հայացքից թվալ: Նոր նախաձեռնության անդամները թուղթ են հավաքում, հանձնում համապատասխան կազմակերպությանն ու հավաքված գումարը ուղարկելու են «Հայաստան» համահայկական հիմնադրամի «Մենք ենք, մեր սահմանները. բոլորս Արցախի համար» խորագրով դրամահավաքին:

«Թուղթը վերածենք զենքի» նախաձեռնության անդամների կողմից ամեն տեսակ թուղթ, բացի ստվարաթղթից, մակուլատուրա հավաքվում է արդեն 4 օր նույն վայրում՝ Երեւանի Միսաք Մանուշյանի անվան պուրակում (Մաշտոցի պուրակ)։ Երեկվա դրությամբ հավաքվածը 2 տոննայից ավելի է։

Նախաձեռնության ղեկավար Արթուր Օհանյանի կարծիքով՝ բոլորս էլ տանն ունենք թղթեր, որ ոչ մի բանի չեն ծառայում, բայց բոլորը հավաքելով՝ կարող ենք մեծ գործ անել: «Այս նախաձեռնությունից գոյացած գումարը չնչին կլինի այդ թվի հետ համեմատ (նկատի ունի «Հայաստան համահայկական հիմնադրամում հավաքված գումարը) բայց, ամեն դեպքում, այն, ինչ կարողանանք անել, շատ մեծ օգուտ կլինի մեր բանակին»,- ասաց նա:

Ակցիային միացել են մասնավոր, վարկային, բանկային կազմակերպություններ, թանգարաններ ու պետական կառույցներ, օրինակ՝ պետական գույքի կառավարման կոմիտեն: ՀՀ կրթության, գիտության, մշակույթի եւ սպորտի նախարարությունը եւս մասնակցում է:

Անհատները, քաղաքացիները, ըստ Օհանյանի, եւս ոգեւորվածությամբ են միանում գործընթացին, մի մասը, օրինակ, շրջապատում հավաքում ու միանգամից մեծ քանակ է բերում: Մարդիկ էլ կան կարծում են՝ իրենց քիչ բերածն օգուտ տալ չի կարող: Արթուր Օհանյանն այլ կարծիք ունի:

«Մարդիկ կան, ասում են՝ մի, երկու կիլոն որ բերեն, բան չի փոխելու, բայց հավատացեք, որ այդ մեկ, երկու կիլոգրամներով է, որ մենք կարողացել ենք այդ երկու տոննայի շեմը հատել»,- նշեց նա:

Չնայած նախապես որոշված էր 3 օրով կազմակերպել այս ակցիան, սակայն թուղթը կհավաքեն անժամկետ, քանի որ արձագանքը մեծ է եղել, ձնագունդն էլ սկսել է գլորվել։ Կհավաքեն որքան հնարավոր է շատ: Երեկվա դրությամբ վաճառքից արդեն 160.000 դրամ կա:

Մարզերի բնակիչներին այս ակցիան եւս հետաքրքրել է, այժմ էլ փորձում են այնպես անել, որ մարզերին կարողանան ներգրավել։

Հավաքումն այսօր սկսվել էր ժամը 12:00-ից, այն կտեւի մինչեւ 20:00 նույն վայրում: Մինչեւ դա Մաշտոցի պուրակում անցուդարձ անողները տեսնում են դրոշն ու կարգախոսը, հետաքրքրվում ու հեռանում, բայց քիչ անց վերադառնում՝ արդեն թուղթը ձեռքներին:

Հ․Գ․«Թուղթը վերածենք զենքի» նախաձեռնության հեղինակներն, իհարկե, հույս ունեն եւ ցանկանում են, որ իրենց հանգանակած գումարներն ուղղվեն զենք ձեռք բերելուն, սակայն Հայաստան համահայկական հիմնադրամը զենք գնելու գործառույթ չի իրականացնում եւ իր միջոցները չեն ուղղվում զենք ձեռք բերելուն։ «Թուղթը վերածենք զենքի» նախաձեռնության անդամների ջանքերի գնով կուտակվող, ապա եւ հիմնադրամին փոխանցվելիք գումարները, թերեւս, կուղղվեն հումանիտար օգնություն ապահովելուն։ Այն, ի դեպ, Հայաստան համահայկական հիմնադրամն արդեն սկսել է։