Տարածվել են նաեւ սեզոնային սուր շնչառական վիրուսները․ մասնագետը հիշեցնում է՝ անհրաժեշտ է պատվաստվել գրիպի դեմ

«Երբ պատերազմ է, բոլորիս ուշադրությունը դեպի ռազմաճակատն է, սակայն սեզոնային գրիպն ու սուր շնչառական այլ վարակները պատերազմին չեն նայում։ Վիրուսները չեն նայում սահմաններին, հարուստ ու աղքատի։ Գրոհում են, եւ իրավիճակն ավելի է բարդանում»։

Սրանք ՀՀ առողջապահության նախարարության Հիվանդությունների վերահսկման եւ կանխարգելման ազգային կենտրոնի տնօրենի տեղակալ Գայանե Սահակյանի խոսքերն են։ Հայաստանում կորոնավիրուսային հիվանդության ֆոնին ակտիվացել են սեզոնային շնչառական վիրուսային հիվանդությունները։ Պատերազմի ժամանակ բժիշկների գործն ավելի է բարդացել․ վիրուսներն ավելի են ծանրաբեռնում։

«Մարդ կարող է կորցնել առողջությունը եւ կարող է առողջապահական համակարգի համար լուրջ բեռ լինել։ Այսօր ամբողջ առողջապահական համակարգը գրեթե ծանրաբեռնված է՝ մի կողմից վիրուսների գրոհի հետեւանքով, մյուս կողմից՝ վիրավոր զինվորներին օգնություն ցուցաբերելու տեսանկյունից»,- նշեց Սահակյանը։

Բայց եթե կորոնավիրուսը կանխարգելող միջոց դեռ չկա, պատվաստումներ չեն արվում, ապա, ըստ մեր զրուցակցի, սեզոնային գրիպի դեպքում կա արդյունավետ պատվաստանյութ։ Նոյեմբերի սկզբից այն արդեն առկա է բոլոր պոլիկլինիկաներում, ամբուլատորիաներում։ Պատվաստանյութը նախատեսված է ոչ թե ամբողջ բնակչության, այլ ռիսկի խմբում գտնվողների համար։ Նրանց մեջ են մինչեւ 5 տարեկան երեխաները, հղիները, քրոնիկ հիվանդություն ունեցողները, 65 տարեկան եւ բարձր անձինք, փակ կազմակերպությունների (ծերերի, երեխաների խնամքի կենտրոններ եւ այլն) անձնակազմը, սաները, ձմեռային զորակոչին ենթակա զինվորները։ Հիշեցնենք, որ պատվաստումն անվճար է։

Թեեւ սեզոնային գրիպն արդեն տարածվել է, մարդիկ չեն շտապում պատվաստվելու։ Դրա անհրաժեշտության մասին առողջապահության նախարարությունը տեղեկացնում է նաեւ բջջային հեռախոսներին ուղարկվող հաղորդագրությունների միջոցով․ «Գրիպի դեմ պատվաստումը կարեւոր է հատկապես համավարակի ընթացքում։ Կանխարգելենք ռիսկի խմբերի շրջանում հնարավոր բարդությունները եւ անբարեհաջող ելքերը։ Դիմեք պոլիկլինիկա։ Թեժ գիծ՝ 010550602»։

«Ներկրեցինք պատվաստանյութի սկզբնական չափաբաժինը՝ 50․000 հատ, հանրապետության բոլոր պոլիկլինիկական կազմակերպություններն ապահովված են։ Այսօրվա դրությամբ պատվաստումները չեն ընթանում շատ ակտիվ։ Ռիսկի խմբում գտնվողներից միայն 3 տոկոսն է ստացել պատվաստումը ամբողջ հանրապետությունում»,- նշեց Սահակյանը։

Ընդգծենք, որ նախկինում կարճ ժամանակահատվածում բավականին շատ մարդիկ էին դիմում պատվաստման համար։ Հրաժարվելու պատճառը, ըստ մասնագետի, գուցե պայմանավորված է կորոնավիրուսային իրավիճակով, ռազմական դրությամբ։ Մինչդեռ ռիսկի խմբի մարդիկ առավել պետք է շահագրգռված լինեն պատվաստվելու՝ իրենց առողջության համար։

«Պատերազմը մնում է պատերազմ, ռազմական իրավիճակը մնում է ռազմական իրավիճակ, բոլորս պետք է մեր ամբողջ ինքնագիտակցությունն ուղղենք մեր առողջության պահպանմանը, նաեւ հանրային առողջապահությանը, հետո առողջապահական բեռին, բոլոր հիվանդանոցների ծանրաբեռնվածությանը»,- նշեց Գայանե Սահակյանը՝ նկատելով, որ հիվանդացողն անհրաժեշռություն է ունենալու դիմել բժշկի օգնությանը։ Բայց պոլիկլինիկայի բժիշկը կարող է շատ զբաղված լինել ու ժամանակ չունենալ, որպեսզի օգնի։ Ազատ հիվանդանոցներ ու մահճակալներ էլ դժվար թե գտնվեն այսօր։  Մեր զրուցակիցը հիշեցրեց արդեն հայտնի խոսքը՝ ավելի լավ է կանխարգելել հիվանդությունը, քան հետո միջոցներ փնտրել՝ բուժելու համար։

Մասնագետի կանխատեսմամբ, իրավիճակը սուր-շնչառական վիրուսների հետ կապված հետագայում ավելի կսրվի։ Ինչպես փորձն է ցույց տալիս, այս առումով Հայաստանում առավել սրված շրջանը լինում է դեկտեմբերից մինչեւ հունվարի վերջ։ Ռիսկի խմբի անձինք, ըստ նրա, դեռեւս ժամանակ ունեն մտորելու եւ պատվաստվելու, հակառակ դեպքում՝ նրանց համար նախատեսված չափաբաժինները կառաջարկեն առողջ ազգաբնակչությանը։

Գայանե Սահակյանը եւս մեկ անգամ կրկնեց․ այսօր առողջապահական համակարգն ի զորու չէ լիարժեք եւ ժամանակին ապահովել բժշկական օգնություն եւ սպասարկում։