Ստեփանակերտը 90 տոկոսով մաքրված է պայթած ու չպայթած ռումբերից եւ դրանց մնացորդներից

Ադրբեջանի եւ Թուրքիայի սանձազերծած պատերազմը Արցախում թեպետ ավարտվել է, հետեւանքները դեռ պահպանվում են: Մինչ օրս սակրավորները հայտնաբերել են ավելի քան 1000 չպայթած ռումբ: Իրականացվող աշխատանքների, ինչպես նաեւ Ստեփանակերտում տիրող իրավիճակի շուրջ զրուցել ենք Արցախի արտակարգ իրավիճակների պետական ծառայության տեղեկատվության եւ հասարակայնության հետ կապերի բաժնի պետ Հունան Թադեւոսյանի հետ:

- Պարոն Թադեւոսյան, ինչպիսի՞ իրավիճակ է այժմ Ստեփանակերտում:

- Ստեփանակերտցիները, որոնք պատերազմական գործողությունների ընթացքում տեղափոխվել էին Հայաստան, արդեն վերադառնում են իրենց օջախները: Այսօրվա դրությամբ վերադարձած քաղաքացիների թիվն անցնում է մի քանի հազարը, քաղաքում շարժ նկատվում է, հատկապես արեւային եղանակին ստեփանակերտցիները դուրս են գալիս փողոց՝ զբոսնելու: Մարտակերտցիներն իրենց տներն են վերադառնում, ստեփանակերտցիները՝ իրենց: Հիմնական խնդիրը այն շրջանների բնակիչների մասով է, որոնց բնակավայրերը այլեւս մերը չեն, մարդիկ անընդհատ վարձով բնակարաններ են փնտրում:

- Ահազանգեր են ստացվում բնակարաններ չգտնելու մասով, ինչպե՞ս է կազմակերպվում այս հարցը:

- Այո՛, սրան զուգահեռ, առանձին ճակատում՝ Արցախի ֆեսյբուքյան տիրույթում, շարունակում են բողոքներ ստացվել բնակարանների մասով: Շատերը բնակարան են կորցրել պատերազմի ընթացքում, բայց ցանկանում են վերադառնալ Արցախ: Այս առումով պետությունը առաջարկել է վարձով բնակարաններ գտնել, որի վարձը կփոխհատուցվի պետության կողմից: Այս պահին Ստեփանակերտում եւ բոլոր բնակավայրերում, որտեղ պատերազմական գործողություններ են տեղի ունեցել, ավերածությունների ու վնասների գույքագրում է կատարվում: Կարճ ժամանակում դրանք անպայման պետք է վերացվեն, պատերազմի հետքը պետք է իսպառ վերացվի, սա է այսօրվա առաջնային օրակարգը: Դրսում մնացած ընտանիքներ, միանշանակ, չունենք: Մենք թեկուզ ժամանակավոր, բայց տեղավորում ենք հանրակացարաններում, ազատ բնակարաններում, այլ տեղերում, մինչեւ որ հարցը կլուծվի:

Արցախի արտակարգ իրավիճակների պետական ծառայության փրկարար ծառայողների, քաղաքաշինության նախարարության, ՌԴ ԱԻՆ-ի աշխատակիցները Ստեփանակերտի քաղաքապետարանի աշխատակիցների հետ համատեղ ստեղծել են միջգերատեսչական հանձնաժողով, ձեւավորվել է աշխատանքային խումբ, որն էլ կատարում է գույքագրում ու չափագրում:

- Ի՞նչ փուլում են գտնվում Արցախում պայթած ու չփայթած ականների հայտնաբերման ու վնասազերծման աշխատանքները:

- Այս պահին հետպատերազմական Արցախում սակրավորներն են առաջնագծում, քանի որ թշնամական կողմը թիրախավորել էր քաղաքացիական բնակչությանն ու բնակելի թաղամասերը, այնտեղ մինչ օրս առկա են կասետային ռումբեր: Տեսանելի վայրերում այդ աշխատանքները ամբողջությամբ ավարտված են, դրանք հայտնաբերվել ու վնասազերծվել են: Կարող ենք ասել, որ Ստեփանակերտը 90 տոկոսով մաքրված է պայթած ու չպայթած ռումբերից ու դրանց մնացորդներից, իսկ մյուս բնակավայրերում աշխատանքները ընթացքի մեջ են: Ներկայումս ՌԴ ԱԻՆ-ի հետ է ձեռք բերվել պայմանավորվածություն, որ ռուս փրկարարներն ու սակրավորները եւս ներգրավվեն այդ աշխատանքներում:

- Վիրավորների եւ զոհված զինծառայողների մարմինների դուրս բերման աշխատանքներն ի՞նչ փուլում են:

- Աշխատանքները շարունակվում են: Փրկարար ծառայողները, ոստիկանները, ինչպես նաեւ Ադրբեջանի կողմից զինծառայողները Շուշիի տարածքում արդեն որոնողական աշխատանքները մինիմալի են հասցրել Կարմիր խաչի անմիջական մասնակցությամբ:

- Դեռեւս միայն Շուշիի մատույցներո՞ւմ են իրականացվում որոնողական աշխատանքները:

- Շուշիի տարածքից արդեն տեղափոխվել ենք մյուս բնակավայրեր: Այս պահին աշխատանքներն իրականացվում են Ասկերանի վերին ենթաշրջանում եւ Ֆիզուլիի տարածքներում: Կարմիր խաչի գրասենյակն արդեն տվել է համաձայնությունը այդ տարածքներում աշխատանքները սկսելու: Թե քանի վիրավոր ու քանի մարմին է դուրս բերվել, չեմ կարող ասել. թվերը Քննչական կոմիտեն է հավաքում:

- Մայրաքաղաք Ստեփանակերտում ինչպիսի՞ն է այսօր իրավիճակը կոմունիկացիաների առումով:

- Ամբողջը կամաց-կամաց վերականգնվում է: Նախորդ շաբաթ ինտերնետ կապի բացակայություն կար, նաեւ՝ բջջային կապի: Դրանք արդեն վերականգնվել են: Չպետք է մոռանալ, որ պատերազմի առաջին օրերից հենց թիրախավորվել էին կապի, էլեկտրամատակարարման, ջրամատակարարման ու գազամատակարարման համակարգերը: Այդ ուղղությամբ աշխատանքները շարունակվում են: Ներկայումս Ստեփանակերտի փողոցներն արդեն լուսավորված են, գազամատակարարումն է բացակայում է միայն մի քանի փողոցում:

- Պատերազմի առաջին իսկ օրվանից, ինչպես նաեւ հրադադարից հետո էլ արցախցի փրկարարները շարունակում են 24-ժամյա ռեժիմով աշխատել: Այդ մասով ի՞նչ կասեք:

- Այո՛, արցախցի փրկարարները բառի ամենաուղիղ իմաստով հերոսական աշխատանք են տարել: ԱԻ պետական ծառայությունը շարունակում է ուժեղացված ծառայությունը՝ ծառայության պետ, գեներալ-մայոր Կարեն Սարգսյանի գլխավորությամբ: Ամեն հրթիռակոծությունից հետո հրդեհ էր բռնկվում, փլուզումներ արձանագրվում: Արագ արձագանքման խմբերը հազարավոր կյանքեր են փրկել, սակրավորները սեպտեմբերի 27-ից իրենց աշխատանքն են կատարել՝ մաքրելով քաղաքը չպայթած ռումբերից: Բոլոր բնակավայրերում սակրավորները աշխատում են: Մինչ օրս 1000-ից ավելի չպայթած ռումբեր են հայտնաբերվել ու վնասազերծվել, բայց դա երկար գործընթաց է, քանի որ մարդիկ նոր են վերադառնում եւ կարող են, օրինակ, տնամերձերում հայտնաբերել գունավոր ժապավեններով պայթուցիկ: Մենք հիմա ահազանգերով ենք առաջնորդվում:

- Բնակիչների անվտանգության մասով ի՞նչ կարող եք ասել:

- Անվտանգությունն այս պահին ապահովում է ՌԴ խաղաղապահ զորակազմը, ճանապարհներն այս պահին բաց են՝ ե՛ւ Վարդենիս-Քարվաճառ, ե՛ւ Շուշի-Բերձոր միջանցքով: Նախնական տվյալներով՝ նոյեմբերի 25-ից Վարդենիս-Քարվաճառ ճանապարհը կդադարի գործել, կմնա Շուշիով Ստեփանակերտ տանող ճանապարհը. ե՛ւ անվտանգ է, ե՛ւ հուսալի, քանի որ ամենը հսկելու են ռուսական խաղապահները, կլինեն նաեւ ոստիկանական կարգախմբերով անցակետեր: