«Աչքերում ո՛չ վախ կար, ո՛չ ընկճվածություն». 70 օր անց հայրենիք վերադարձած Ռուսլանի հարազատները տեսակցել են նրան

Յոթանասունօրյա անհայտությունից հետո գտնված եւ հայրենիք վերադարձված վեց զինծառայողներից մեկի՝ Ռուսլան Թումանյանի հարազատներն այցելել են Արցախի հանրապետական բժշկական կենտրոն՝ նրան տեսակցելու։ Ռուսլանի եղբայրը՝ Վարուժան Մարգարյանը, որ երեկ է վերադարձել Արցախից, «Հայկական ժամանակ»-ի հետ զրույցում պատմում է՝ եղբոր աչքերում ո՛չ վախ կար, ո՛չ ընկճվածություն, ո՛չ հուսահատություն․ «Տրամադրությունը շատ լավ էր, ամեն ինչ լավ էր, վիճակն էլ է լավ, միայն ոտքերն են մի քիչ ցրտահարվել, բայց դա էլ այնքան ժպիտով է ընդունում, շատ բան դեռ չենք հասցրել խոսել, բայց ինչ-որ բան որ պատմում է, էլի ժպիտով է պատմում, ոգեւորված»։

Ռուսլան Թումանյանը տասնութ տարեկան է, բանակ է զորակոչվել այս տարի՝ հուլիսի 31-ին։ Ջաբրայիլում է ծառայել, բայց պատերազմի օրերին նրան տեղափոխել են այլ վայր։ Ամբողջ ընթացքում հազիվ չորս անգամ է տուն զանգել․ ամենակարեւոր զանգը տատի տարեդարձը շնորհավորելու համար է եղել, ամենավերջինը՝ հոկտեմբերի 8-ին։ Դրանից հետո ընտանիքը շուրջ յոթանասուն օր նրանից լուր չի ունեցել, բայց հավատը չի կորցրել ոչ մի օր․ «Բոլորս հույս ունեցել ենք ու հավատացել ենք, որ պետք է վերադառնա, քեռիս միշտ ասում էր՝ գիտեմ, որ իմ տղան ինչ-որ տեղ թաքնված է, հաստատ հետ է գալու, ոչ մի վայրկյան չի եղել, որ ուրիշ բան մտածի, ես էլ տարբեր ինֆորմացիաներ եմ ստացել, բայց մեկ է, շատ ուժեղ հավատով հավատացել եմ, որ գալու է»,- ասում է Վարուժանն՝ անկեղծանալով՝ դեկտեմբերի 20-ին հենց, մինչեւ բարի լուրը կստանային, իր ընկերոջ հետ խոսելիս անգամ ասել է, որ իր մոտ ինչ-որ հանգստություն է, գիտի, որ եղբայրը շուտով գալու է։

Վեց զինծառայողների հայտնաբերվելու մասին ծանոթներից են լսել դեռ կեսօրին, բայց թե ովքեր են եղել նրանց մեջ, չեն իմացել։ Երեկոյան արդեն բարեկամներն իրենցից շուտ են համացանցում լուրը կարդացել․ «Մենք չենք տեսել, մեր բարեկամներից զանգեցին, ասացին, որ ցուցակն են գցել, մեկը Ռուսլանն է, ու այդպես սկսվեցին զանգերը․․․ Խոսքով չեմ կարող ասել, թե ինչ եղավ հետո, արդեն բախում էր՝ ծիծաղի, լացի, բոլորիս մոտ այդպիսի վիճակ էր»։

Եղբոր մոտ շտապելիս Վարուժան Մարգարյանը հարցրել է, թե նա ինչ է ուզում, Ռուսլանն էլ KFC-ի խորտիկներ է «պատվիրել», բայց ոչ միայն իր համար․ «Ախորժակ էր պահել, բայց ասաց՝ գիտես, չէ՞՝ վեց հոգու համար պիտի բերես»։ Անցած դժվարին օրերին տղաները բրնձով, պահածոներով են սնվել, լքված տներ գտել, գիշերել այնտեղ․ «Տղաներից մեկը պատմում էր, որ բրինձ են գտել, տասը օրվա պաշար են պատրաստել, նրանց իրենց հնարամտությունն է փրկել, խելքը, մտքի ուժը, կամքի ուժը, միավորվել է այդ ամենը, իրենք վեցն են եւ վեցն էլ մի ամբողջություն լինեն կարծես, մեկը մյուսին լրացրել է»,- ասում է Վարուժանը։ Նրա խոսքով՝ մինչ պատերազմը Ռուսլանը շփում է ունեցել միայն Արսենի հետ․  ծառայակից ընկերներ են եղել, մյուսները պարզապես նույն գումարտակից են եղել։

Այդ օրերի մանրամասների մասին Վարուժանը եղբոր հետ դեռ շատ չի զրուցել, գիտի միայն՝ անհավանական արկածների միջով են անցել․ «Միայն այն, որ այդքան օր մնացել են թշնամու վերահսկողության տակ գտնվող տարածքում, արդեն անհավանական է, դրանից անհավանական ի՞նչ կարող է լինել»։ Շատ հարցեր չի տալիս, ասում է՝ դեռ պետք է եղբայրը հանգստանա, ապաքինվի․ «Մերոնք խոսում էին իր հետ, բայց ես փորձում էի ուրիշ թեմաներով «ցրել», այդ օրերի հետ կապված հարց չտալ, ուզում եմ՝ հանգստանա, նոր նստեմ, հանգիստ խոսեմ հետը»։

Նախքան ծառայությունը Ռուսլանն ընդունվել է Բրյուսովի անվան լեզվաբանական համալսարան, բայց ինչպես Վարուժանն է ասում՝ մտադրությունը հիմա փոխվել է, ուրիշ տեղ է ուզում սովորել։ Թե որտեղ, եղբայրը չի բացահայտում, ասում է՝ Ռուսլանն ինքը այդ մասին կխոսի։

Վարուժան Մարգարյանը տեղի ուենցածը հրաշք է համարում, երազում, որ մնացած տղաներն էլ նույնությամբ վերադառնան․ «Ես վստահ եմ, որ էլի տղաներ կլինեն, որ ողջ են, ինչ-որ տեղ թաքնված, մանավանդ՝ այս հրաշքից հետո»։ Նրա խոսքով՝ այս օրինակը  պետք է ոգեւորի այն մարդկանց, ովքեր դեռ սպասում են իրենց զավակներին․ «Ոչ ոքի մտքով չի անցել, որ կարող է նման բան լինել, բայց իրոք, հրաշքներ լինում են, եւ եթե մի անգամ եղել է, ուրեմն անհավանական բան չէ, ուրեմն՝ էլի կարող է լինել»,- ասում է նա։

Հիշեցնենք՝ դեկտեմբերի 20-ին Արցախի նախագահ Արայիկ Հարությունյանը հայտնեց, որ թշնամու վերահսկողության տակ անցած տարածքներում իրականացվող որոնողական աշխատանքների արդյունքում ԱՀ արտակարգ իրավիճակների ծառայության, Արցախում խաղաղապահ առաքելություն իրականացնող ռուսական զորակազմի եւ Կարմիր խաչի միջազգային կոմիտեի ջանքերով հայտնաբերվել եւ հայրենիք են վերադարձվել ավելի քան յոթանասուն օր անհայտության մեջ հերոսաբար մաքառած  ժամկետային վեց զինծառայողներ։ Նրանք հոսպիտալացվել են Արցախի հանրապետական բժշկական կենտրոնում։  Բ/Կ-ից չցանկացան տեղեկություն տրամադրել նրանց առողջական վիճակի մասին՝ հորդորելով կապ հաստատել Արցախի առողջապահության նախարարություն, որին ուղղված զանգերն էլ, սակայն, մնացին անպատասխան։

Վարուժան Մարգարյանը մեզ տեղեկացրեց, որ եղբորը ամենայն հավանականությամբ այսօր տեղափոխելու են Երեւան՝ բուժումը այստեղ շարունակելու։