Եթե քաղաքացին ձյուն մաքրող մեքենան չի տեսնում, դա չի նշանակում, թե այդ աշխատանքները չեն արվում. Հակոբ Կարապետյան

Այսօր վաղ առավոտից մայրաքաղաքում տեղացած ձյունը երթեւեկության խափանման պատճառ դարձավ, ու նորից առաջացրեց աշխատանքի շտապող քաղաքացիների դժգոհությունը: Ճանապարհների մեծ մասը, հատկապես՝ բարձրադիր հատվածները, անանցանելի էին: Որոշ քաղաքային երթուղիներ եւս չէին գործում:

Կանգառներում ավտոբուսի սպասող մարդկանց մտահոգությունը ավելի շատ կապված էր ոչ թե աշխատանքից ուշանալու հետ, այլ նրա, որ այդպես էլ հնարավոր չի դառնում ըստ պատշաճի եւ ժամանակին կազմակերպել ձնամաքրման աշխատանքները եւ երթեւեկելի ճանապարհների մաքրման գործընթացը:

Նոր Նորքի 9-րդ զանգվածի կանգառում երկու ժամից ավելի քաղաքացիները դժգոհելով սպասում էին, որ գոնե որեւէ ավտոբուս գա, կարողանան հասնել Կենտրոն, այնտեղից էլ մի քանի երթուղային տաքսի փոխելով՝ հասնել աշխատանքի: Բայց երկու ժամվա ընթացքում միայն 8 համարի երթուղայինը եկավ. դա էլ ամեն կանգառում չէր կայանում, եւ խմբված մարդիկ այդպես էլ մնում էին սպասելով կանգնած:

Հասկանալով, որ անիմաստ եւ անօգուտ է ժամերով կանգնելը՝ մի քանիսը փորձեցին տաքսի գտնել, որը եւս դժվար գործ էր. տաքսիների վարորդները աներեւակայելի գումարներ էին պահանջում կամ էլ համաձայնում էին, բայց մի քիչ երթեւեկելուց հետո հրաժարվում երթեւեկել, քանի որ անընդհատ տեղապտույտի մեջ էին հայտնվում: 

Օրվա ընթացքում հայտնի դարձան նաեւ բազմաթիվ, այդ թվում՝ շղթայական վթարների մասին: Ուշագրավ է, որ վթարներից մեկն էլ տեղի էր ունեցել ձնամաքրման աշխատանքներ իրականացնող մեքենայի մասնակցությամբ: Վաղարշյան - Կոմիտաս խաչմերուկում իրար են բախվել ձյուն մաքրող եւ մարդատար մեքենան: Տուժածներ չկան:

Քաղաքացիներից մեկի խոսքով՝ միշտ էլ մայրաքաղաքի ծայրամասերը այսպիսի դեպքերում մնում են ամենաանտեսվածը:

«Քաղաքի կենտրոնում աչքակապություն են անում, կենտրոնական հատվածում մաքրում են, բայց այնտեղ նաեւ ջերմաստիճանն է բարձր, ձյունն էլ արագ հալվում է, իսկ ծայրամասերում ճանապարհը չմաքրելու դեպքում միանգամից սառույցի է վերածվում, էստեղ միշտ էլ անտեսում են»,- դժգոհում է Նոր Նորքի 9-րդ զանգվածի բնակիչը:

«Մինչեւ չես զանգում, չես բողոքում՝ ոչ մի բան էլ չեն անում: Ինչքան կարելի է հանդուրժել»,- բողոքում էր մեկ այլ քաղաքացի:

Խոսակցությունը, ինչպես սովորաբար լինում է նման դեպքերում, վերածվեց վեճի. մեղավորների փնտրտուքի մեջ «հասան» ե՛ւ քաղաքապետարան, ե՛ւ թաղապետարան, որոնց գործառույթի մեջ է մտնում քաղաքի ճանապարհների անխաթար երթեւեկության պահպանությունը եւ ձնամաքրման աշխատանքների կազմակերպումը:

Դեռ մի քանի օր առաջ «Հիդրոօդերեւութաբանության եւ մոնիթորինգի կենտրոնը» զգուշացրել էր, որ փետրվարի 18-20-ին մայրաքաղաքում սպասվում է թաց ձյուն: Ստացվում է, որ զգուշացումները քաղաքային համապատասխան ծառայությունները աննկատ էին թողել: Ծայրամասերում ավազը սկսեցին շաղ տալ միայն ժամը 9 անց կեսից հետո, երբ երթեւեկությունն արդեն կաթվածահար էր, եւ արձանագրվել էին բազում վթարներ:

Մալաթիա-Սեբաստիա վարչական շրջանի Սեբաստիա փողոցից մինչեւ Նոր Նորքի 9-րդ զանգված գնացող 26 համարի երթուղու վարորդը մեզ հետ զրույցում նշեց, որ ինքը անխափան շարժվել է ժամը 07:30-ին, հասել է վերջնակետ, սակայն հետ չի կարողացել գնալ մոտ 3 ժամ ճանապարհների սառցակալած լինելու պատճառով:

Վարորդը նշեց նաեւ, որ երբ նորից սկսել է վարել մեքենան, ճանապարհները հիմնականում մաքրված են եղել, սակայն տեղ-տեղ խցանումներ են եղել, եւ մեկ ժամի փոխարեն վերջնակետ հասել է 1 ժամ 45 րոպեում:

ԱԻՆ հիդրօդերեւութաբանության եւ մոնիտորինգի կենտրոնի տնօրենի տեղակալ Գագիկ Սուրենյանը մեզ հետ զրույցում նշեց, որ ձյան ծածկույթը Երեւանի բարձրադիր հատվածներում եղել է 5֊7 սմ, իսկ ցածրադիր հատվածներում՝ 2 3 սմ։ Ինտենսիվ ձյունը սկսվել է ժամը 07:30-ին եւ պահպանվել 2 ժամ, որից հետո տեղումների ինտենսիվությունը կտրուկ թուլացել է:

Նրա խոսքով՝ մեր զրույցի պահին էլ Երևանի բարձրադիր գոտում շատ թույլ ձյուն է տեղում, որը գրեթե ձնածածկույթ չի ձեւավորում։

Քաղաքապետարանի մամուլի խոսնակ Հակոբ Կարապետյանն էլ մեզ հետ զրույցում հավաստում է, որ ձնամաքրման աշխատանքները կատարվել են բնականոն ռեժիմով:

«Բնականաբար, ձյան տեղումների մասին կոմունալ ծառայությունները տեղյակ են եղել եւ, ըստ իրենց չափորոշիչների, կատարել են աշխատանքները: Ժամը 7 անց կեսից առատ ձյուն է սկսել տեղալ, եղանակային պայմաններից ելնելով՝ տեղ-տեղ սառցակալած ճանապարհներ են եղել, որը խցանումների, երթեւեկության բարդությունների, այդ թվում՝ նաեւ հանրային տրանսպորտի աշխատանքի բարդություններ է առաջացրել: Իմ տեղեկություններով՝ խնդիրներ եղել են հիմնականում բարձրադիր հատվածներում: Բայց, ըստ պատշաճի, 07:30-ից 08:00-ի սահմանում կոմունալ ծառայության մեքենաները սկսել են աշխատել խոշոր, գլխավոր փողոցներից, այնպես, ինչպես կարգն է: Թե երբ են հասել ծայրամաս, ես տեղեկություն չունեմ, բայց եթե քաղաքացին դուրս է գալիս փողոց եւ այդ պահին ձյուն մաքրող մեքենա չի տեսնում, դա, իհարկե, չի նշանակում, որ ձնամաքրման աշխատանքներ տեղի չեն ունենում, դա նշանակում է, որ մեքենան դեռ իրենց փողոց չի հասել»,- նշեց նա:

Քաղաքապետարանի մամուլի խոսնակի խոսքով՝ հիմա որեւէ խնդիր չկա, հանրային տրանսպորտը իր բնականոն հունով աշխատում է:

Մարիամ Գեւորգյան