Ընդդիմությունը Գախարիայի հրաժարականը մեծ հաղթանակ է համարում. Վրաստանում քաղաքական նոր զարգացումներ են

նկարում՝ ձախից առաջինը՝ Նիկա Մելիան, վերին անկյունում՝ Գիորգի Գախարիան, ներքևում՝ Իրակլի Ղարիբաշվիլին

Այսօր հայտնի դարձավ, որ Վրաստանի վարչապետ Գիորգի Գախարիան հրաժարական է տվել: Imedi հեռուստաընկերության եթերում այս մասին հայտարարել էր ինքը վարչապետը՝ նշելով, որ պատճառն իր կուսակցության հետ տարակարծությունն է, երբ չեն կարողացել համաձայնության գալ ընդդիմության առաջնորդ Նիկա Մելիային կալանավորելու իշխանությունների փորձի պատճառով:

«Երեկ դատարանը որոշեց պարոն Մելիայի նկատմամբ որպես խափանման միջոց ազատազրկում սահմանել: Նա այն անձն է, որը երբևէ առանձնապես չի հարգել վրացական օրենսդրությունը, և նա, ով հունիսի 20-ին կոչ արեց մեր քաղաքացիներին ներխուժել խորհրդարան, և հանդիսանում է խորհրդարանի վրա հարձակման կազմակերպիչ: Բայց անկախ ամեն ինչից, իմ հաստատուն դիրքորոշումն այն է, որ անընդունելի է մեկ անձի նկատմամբ արդարադատություն իրականացնելը, նույնիսկ եթե դա օրինական է, եթե դա վտանգ է ստեղծում համայնքի միասնականության համար, վտանգում մեր քաղաքացիների կյանքը կամ ստեղծում քաղաքական իրավիճակի սրացման հնարավորություն»,- ասել է Գախարիան:

«Ելնելով այն փաստից, որ, ցավոք, ես չկարողացա իմ թիմի հետ համաձայնության գալ այս հարցում, ես որոշեցի հրաժարվել իմ պաշտոնից»,- ասել է նա: 

Գախարիան շեշտել է, որ կարծում է՝ իր հրաժարականը «կօգնի նվազեցնել բևեռացման մակարդակը երկրի քաղաքական կյանքում», քանի որ վստահ է՝  բևեռացումը և առճակատումը «երկրի ապագայի, նրա զարգացման և ցանկացած ճգնաժամ հաղթահարելու ունակության ամենամեծ վտանգն  են»:

Գախարիան վարչապետ է ընտրվել 2019-ի սեպտեմբերի 8-ին` իր դեմ բողոքի ակցիաների ֆոնին։ Մինչ այդ, նա 2 տարի ղեկավարում էր երկրի ներքին գործերի նախարարությունը:

Օրվա ընթացքում իշխող «Վրացական երազանք» կուսակցության նախագահ Իրակլի Կոբախիձեն հայտարարեց վարչապետի նոր թեկնածուի մասին՝ չմոռանալով նշել, որ Գախարիայի հրաժարականի որոշումն ընդունելը ցավալի է եղել կուսակցության համար: Նոր թեկնածուն Իրակլի Ղարիբաշվիլին է, որը Վրաստանի վարչապետի պաշտոնը զբաղեցրել է նաև 2013-2015 թվականներին, այժմ էլ երկրի պաշտպանության նախարարն է: Արձագանքելով կուսակցության կողմից իր թեկնածության առաջարկին, Ղարիբաշվիլին հայտարարել է, որ շնորհակալ է քաղաքական թիմից վստահության համար ու խոստացել է երկրում հաստատել կարգուկանոն:

Ղարիբաշվիլին «Վրացական երազանք» կուսակցության հիմնադիրներից է, 2012 -ին ակտիվ պայքարով նա մտել է խորհրդարան՝ որպես պատգամավոր, այնուհետ զբաղեցրել ՆԳ նախարարի պաշտոնը: 2013 թ․ Բիձինա Իվանիշվիլիի՝ վարչապետի պաշտոնից հրաժարական տալուց հետո, նշանակվել է վարչապետ, հեռացել 2 տարի անց ու վերադարձել 2019-ին՝ Պաշտպանության նախարարի պաշտոնում: Հայտնի է, որ Ղարիբաշվիլին ու Սահակաշվիլին ատում են միմյանց ու ոխերիմ թշնամիներ են:

Ֆեյսբուքյան իր էջում Գախարիայի հրաժարականին անդրադարձել է Վրաստանի նախկին նախագահ, երկրից վտարված ու այժմ ընդդիմության հեռակա համակրգողներից Միխայիլ Սահակաշվիլին: Հրաժարականը նա որակել է որպես «ընդդիմության, Նիկա Մելիայի ու վրաց ժողովրդի մեծ հաղթանակ»՝ հավելելով, որ Գախարիան հեռանում է՝ չցանկանալով իր պատասխանատվություն կրել Իվանիշվիլիի դրդած արյունահեղության համար:

Հինգշաբթի օրը ոստիկանությունը փորձեց բերման ենթարկել Վրաստանի նախկին նախագահ Միխայիլ Սահակաշվիլիի հիմնադրած Միացյալ ազգային շարժման (ՄԱԿ) ընդդիմադիր կուսակցության ղեկավարին: Մելիան արդեն երրորդ օրն է՝ գտնվում կուսակցության գրասենյակում, որտեղ ներկա են նաև ընդդիմության այլ կուսակցությունների առաջնորդներ և աջակիցներ: Նրանք գիշերել են շենքում: Այսօր առավոտյան ոստիկանական խումբը փորձել է մտնել կուսակցության գրասենյակ` Նիկա Մելիային դատարանի որոշումը փոխանցելու համար, սակայն գրասենյակում հավաքված աջակիցները թույլ չեն տվել մուտք գործել շենք: Իրավապահները շենք դուրս գալուց հետո լքել են տարածքը, ընդդիմության և ուժայինների միջև առճակատում տեղի չի ունեցել:

Չորեքշաբթի օրը Թբիլիսիի քաղաքային դատարանը որոշում կայացրեց Մելիային կալանքի տակ պահելու մասին: Դատավարությունն ընթանում էր շուրջ 6 ժամ, որին չէր մասնակցում մեղադրյալ Նիկա Մելիան: Ըստ դատախազության՝ նա հրաժարվել է 40 հազար լարի (ավելի քան 12 հազար դոլար) գումարի գրավը վճարել 2019 թվականի հունիսին խորհրդարանի շենք ներխուժելու փորձի գործով: Մելիան գործը համարում է քաղաքական դրդապատճառներով հորինված, շինծու և չի պատրաստվում կատարել դատարանի որոշումը:

2020-ի դեկտեմբերին Միացյալ ազգային շարժումը գլխավորած Մելիայի դեմ քրեական գործը հարուցվել է 2019-ի հունիսին: Նա մեղադրվում է Վրաստանի քրեական օրենսգրքի 225-րդ հոդվածի 1-ին և 2-րդ մասերով` խմբակային բռնություն կազմակերպելու և մասնակցելու համար: Ավելի հստակ, 2019-ի հունիսի 20-ին և 21-ին տեղի ունեցած անկարգությունները կազմակերպելու և մասնակցելու մեջ է նա մեղադրվում, անկարգություններն ավարտվել էին խորհրդարանի շենք ներխուժելու փորձով: 2019-ի հունիսին դատարանը նրան գրավի դիմաց ազատ արձակեց՝ սահմանելով 30 հազար լարի տուգանք և կարգադրեց տեղանքի վայրի տեղորոշման ապարանջան կրել, բայց 2020-ի նոյեմբերին խորհրդարանական ընտրությունների արդյունքների դեմ ցույցի ժամանակ նա ցուցադրաբար հանեց ապարանջանը և նետեց այն: Դրանից հետո դատախազությունը միջնորդեց դատարանին ավելացնել գրավի չափը, ինչը  վճարելուց Մելիան հրաժարվեց ՝ պնդելով, որ իր նկատմամբ քաղաքական հետապնդում է իրականացվում: Եթե քաղաքական գործիչը մեղավոր ճանաչվի, նրան սպառնում է վեց տարվա ազատազրկում: