Իսրայելը զանգվածային հարձակում է սկսել Գազայում. ահագնանում են տարածաշրջանում սաստիկ սովի մասին լուրերը

Պաղեստինյան ՀԱՄԱՍ խմբավորումը հայտարարել է, որ իր ներկայացուցիչները սկսել են բանակցությունների նոր փուլ, որի նպատակն է վերջ դնել Գազայում պատերազմին:

Միևնույն ժամանակ իսրայելցի զինվորականները հայտարարել են լայնածավալ հարձակման մեկնարկի մասին՝ նպատակ ունենալով հաղթել ՀԱՄԱՍ-ին և ազատել գոտում մնացած պատանդներին։

Ինչի՞ շուրջ են բանակցում արկերի հարվածներին զուգահեռ

ՀԱՄԱՍ-ի խորհրդական Թահեր ալ-Նունուն BBC-ին ասել է, որ բանակցությունները սկսվել են Կատարի մայրաքաղաք Դոհայում, և կողմերից ոչ մեկը նախապայմաններ չի առաջադրել. բոլոր հարցերն առանց բացառության քննարկվում են։

Իսրայելի պաշտպանության նախարար Իսրայել Կացը հաստատել է, որ կողմերի ներկայացուցիչները վերադառնում են Կատար՝ անուղղակի բանակցությունների՝ պատանդների ազատ արձակման շուրջ պայմանավորվածություն ձեռք բերելու համար։ Կացը որոշումն անվանել է «շեղում այն անզիջողական դիրքորոշումից, որը նրանք ընդունել էին մինչև այս պահը»:

Իսրայելի պաշտպանության բանակը հայտարարել է «Գեդեոնի մարտակառքեր» օպերացիայի մասին և նշել, որ զինվորականներին հանձնարարված է գրավել գոտու բոլոր ռազմավարական տարածքները:

ՀԱՄԱՍ-ի կողմից վերահսկվող քաղաքացիական պաշտպանության և առողջապահության նախարարության պաշտոնյաները հայտնել են, որ Գազայում իսրայելական հարձակումները հինգշաբթի օրվանից շուրջ 250 մարդու կյանք են խլել:

Իսրայելը շրջափակման մեջ էր առել Գազայի հատվածը մարտին՝ երկամսյա հրադադարի խախտումից հետո։ ԱՄՆ նախագահ Դոնալդ Թրամփը ուրբաթ օրը հայտարարել է, որ Գազայի հատվածում շատ մարդիկ սովամահ են լինում։

Իսրայելցի զինվորականները գործողությունը անվանում են «Գեդեոնի մարտակառքեր» միայն «X»-ի իրենց պաշտոնական միկրոբլոգում եբրայերեն և չեն օգտագործում կոդային անվանումն անգլերեն որևէ այլ հարթակում:

Զինվորականները հայտնել են, որ չեն ավարտի գործողությունը, մինչև ՀԱՄԱՍ-ը դադարի վտանգ ներկայացնել, և բոլոր պատանդները վերադառնան տուն: Հայտարարվել է նաև, որ 24 ժամում իսրայելական բանակը «խոցել է ավելի քան 150 ահաբեկչական թիրախ Գազայի հատվածում»։

Իսրայելն ուժեղացրել է ռմբակոծությունները և ավելացրել է զրահամեքենաները սահմանի երկայնքով՝ չնայած հրադադարի շուրջ բանակցությունները վերսկսելու և պաշարումը վերացնելու միջազգային ճնշման աճին: Գործողության սկիզբը, ըստ երևույթին, ցույց է տալիս, որ խաղաղ կարգավորման բոլոր ջանքերը ձախողվել են:

Ի՞նչ կտա Իսրայելին այս հարձակումը, և ինչո՞ւ սպասեցին շաբաթվա վերջին

Ըստ Times of Israel-ի՝ «Գեդեոնի մարտակառքեր» գործողությունը հաջողելու դեպքում այն Իսրայելի պաշտպանության բանակին թույլ կտա գրավել Գազան, վերաբնակեցնել խաղաղ բնակիչներին գոտու հարավային հատվածում, հարձակվել ՀԱՄԱՍ-ի վրա և թույլ չտալ, որ նա վերահսկողության տակ վերցնի հումանիտար օգնության մատակարարումները:

Իսրայելի վարչապետ Բենիամին Նեթանյահուն մայիսի սկզբին ասել է, որ Իսրայելը պատրաստվում է «ինտենսիվ ներխուժում անել Գազա»՝ գրավելու և պահելու տարածքը։ Այս համատեքստում Իսրայելի կառավարությունը խոստացել է, որ գործողությունը չի սկսվի այնքան ժամանակ, քանի դեռ Թրամփը չի ավարտել իր մերձավորարևելյան շրջագայությունը։ ԱՄՆ նախագահը տարածաշրջանը լքել է ուրբաթ օրը։

ՄԱԿ-ի Մարդու իրավունքների հարցերով գերագույն հանձնակատար Ֆոլքեր Թյուրքը նախազգուշացրել է, որ Իսրայելի կողմից նախաձեռնված վերջին սրացումը կարող է դիտվել որպես միջազգային իրավունքի խախտում։

«Ռումբերի այս տարափը, որը մարդկանց ստիպում է հեռանալ բռնի հարձակումների, ամբողջ թաղամասերի համակարգված ոչնչացման և մարդասիրական օգնության մերժման սպառնալիքի ներքո, ցույց է տալիս, որ Գազայում ժողովրդագրական փոփոխությունների ցանկություն կա, որը հակասում է միջազգային իրավունքին և հավասարազոր է էթնիկ զտումների»,- ասաց նա:

ԱՄՆ պետքարտուղար Մարկո Ռուբիոն հայտարարել է, որ ԱՄՆ-ն անհանգստացած է ստեղծված իրավիճակով։

Գազայի հատվածը գնդակոծվում է՝ չնայած խիստ սովի մասին ահագնացող լուրերի

BBC-ն գրում է, որ բրիտանացի վիրաբույժ Վիկտորիա Ռոուզը, որն աշխատում է Խան Յունիսի Նասեր հիվանդանոցում, BBC Radio 4-ի Today ծրագրին ասել է, որ իր թիմը վիրավորների «հոսքից» ուժասպառ է եղել, իսկ հիվանդները զգալիորեն հյուծվել են: Ըստ նրա խոսքերի՝ տեղափոխվող երեխաները սարսափելի նիհար են, ատամները կորցրած, խիստ հյուծված:

«Նրանցից շատերը բավականին լուրջ այրվածքներ ունեն, և նման ծանր թերսնման դեպքում նրանք շատ ավելի ենթակա են վարակներ ընդունելու և ապաքինվելու շատ ավելի քիչ հնարավորություններ ունեն»,- ասել է բրիտանացի բժիշկը:

ՄԱԿ-ը գնահատում է, որ Գազայի բնակչությունը գտնվում է սովի կրիտիկական վտանգի տակ։

Իսրայելի կառավարությունը բազմիցս հերքել է Գազայում սննդի պակասի մասին պնդումները, սակայն ահագնացող լուրերն ու ականատեսների պնդումներն այլ բան են վկայում:

Իսրայելը ռազմական արշավ է սկսել ՀԱՄԱՍ-ի դեմ՝ ի պատասխան խմբավորման 2023 թվականի հոկտեմբերի 7-ի հարձակմանը, որի ժամանակ սպանվել էր մոտ 1200 մարդ, իսկ 251-ը՝ առևանգվել։ ՀԱՄԱՍ-ը դեռ շարունակում է 57 պատանդ պահել: