Օլիմպիական ուղեգրերի հետևից. ինչ ակնկալել Հայաստանի ըմբշամարտի հավաքականներից վարկանիշային մրցաշարում

Ազատ ոճի և հունահռոմեական ոճի ըմբաշամարտերի Հայաստանի հավաքականները մարտի 18-21-ը կմասնակցեն Տոկիոյի օլիմպիական խաղերի եվրոպական վարկանիշային մրցաշարին, որը պետք է տեղի ունենա Հունգարիայի մայրաքաղաք Բուդապեշտում։ Մրցաշարը պետք է անցկացվեր մեկ տարի առաջ, սակայն հասկանալի պատճառներով հետաձգվեց։

Մեկ տարի առաջ Հայաստանի երկու հավաքականների մարզիչները արդեն պատրաստել էին թիմին և հրապարակել կազմը մրցաշարին մասնակցելու համար, բայց կորոնավիրուսը խախտեց բոլոր ծրագրերը։ Մեկ տարվա ընթացքում բավականին փոփոխություններ տեղի ունեցան, և այժմ մարզիչները նորից հրապարակել են հավաքականների փոփոխված կազմերը վարկանիշային մրցաշարի համար։

«Հայկական ժամանակը» ներկայացնում է ազատ ոճի և հունահռոմեական ոճի ըմբշամարտի Հայաստանի հավաքականի ըմբիշներին և նրանց հնարավորությունները՝ օլիմպիական ուղոգիր նվաճելու։ Նշենք, որ ուղեգիր են ձեռք բերում յուրաքանչյուր քաշային կարգում եզրափակիչ դուրս եկած ըմբիշները։ 

Ազատ ոճ

57 կգ քաշային կարգում, սպասվածի պես, հանդես կգա Եվրոպայի 2019թ․-ի չեմպիոն, աշխարհի գավաթի խաղարկության արծաթե մեդալակիր Արսեն Հարությունյանը։ 21-ամյա մարզիկը հայ ըմբիշներից ամենալավ շանսերն ունի օլիմպիական ուղեգիր ձեռք բերելու։ Քաշային կարգի առաջատարներ Ռուսաստանը, Վրաստանը արդեն ուղեգիր ունեն։ Մրցակիցների թվում կան մի շարք փորձատու ըմբիշներ՝ Ադրբեջանը ներկայացնող Էդիշերաշվիլին, Վլադիսլավ Անդրեևը՝ Բելառուսից, Լևան Մետրեվելի Վարտանովը՝ Իսպանիայից, Վանգելովը՝ Բուլղարիայից: Կարող է լուրջ մրցակից լինել նաև Բելա Բուժիաշվիլին՝ Վրաստանից։ Նրանց թվում կան աշխարհի ու Եվրոպայի առաջնությունների մրցանակակիրներ։ Սակայն այս ըմբիշների մեջ Արսենը ֆավորիտ է երևում, և իր ուժերի սահմաններում է հաղթել բոլորին և եզրափակչի ուղեգիր ձեռք բերել։ Կարևորը՝ կենտրոնացած լինել բոլոր գոտեմարտերի ընթացքում և չթերագնահատել ոչ մի մրցակցի։

65 կգ քաշային կարգում ուշադիր հետևելու ենք աշխարհի գավաթակիր Վազգեն Թևանյանի ելույթին։ Երիտասարդ ըմբիշը, իհարկե, օլիմպիական ուղեգիր նվաճելու ֆավորիտներից է, բայց Բուդապեշտ են գալու նաև ուղեգրեր չունեցող օլիմպիական խաղերի, աշխարհի ու Եվրոպայի առաջնությունների բազմակի մրցանակակիրներ Հաջի Ալիևը (Ադրբեջան) և Վլադիմիր Խինչեգաշվիլին (Վրաստան)։ Չափազանց լուրջ մրցակից է նաև Մագոմեդմուրադ Գաջիևը, որը ներկայացնում է Լեհաստանը։ Հենց այս երեք ըմբիշները, ինչպես նաև Թևանյանը հանդիսանում են օլիմպիական ուղեգիր նվաճելու ֆավորիտները, բայց դեռ կան նաև Թուրքիան, Բուլղարիան, Ֆրանսիան և Հունաստանը ներկայացնող ըմբիշները, որոնք նույնպես հավակնություններով են գալու Հունգարիա։ Շատ բան կախված կլինի վիճակահանությունից, բայց ուղեգիր նվաճելու համար Թևանյանը հաստատ պետք է հաղթի առնվազն 1-2 չափազանց ուժեղ մրցակիցների։

Մյուս երկու՝ 74 և 86 կգ քաշային կարգերում սպասելիքները մեր ըմբիշներից մեծ չեն։ Թե՛ Հրայր Ալիխանյանը, թե՛ Հովհաննես Մխիթարյանը հեռանկարային ըմբիշներ են, բայց քաշային կարգի առաջատարների հետ գոտեմարտերում դեռ չեն կարողանում դրսևորել իրենց ողջ կարողությունները։ Ալիխանյանի քաշային կարգում ուղեգիր նվաճելու հիմնական ֆավորիտները Ադրբեջանի, Վրաստանի, Թուրքիայի, Սլովակիայի և Սան Մարինոյի ներկայացուցիչներն են։ 86 կգ քաշային կարգում կան Լեհաստանի, Սլովակիայի, Ադրբեջանի, Իսպանիայի, Բելառուսի, Հունգարիայի, Վրաստանի բազմափորձ ըմբիշները։

97 և 125 կգ քաշային կարգերում Հայաստանը ներկայացուցիչ չունի։ Նախորդ տարի այդ քաշային կարգերում Բուդապեշտ պետք է մեկնեին լեգիոներները՝ Հաջիմուրադ Գացալովն ու Լևան Բերիանիձեն, բայց նրանք մեկ տարի է արդեն հավաքականի հետ չեն մարզվում։

Հունահռոմեական ոճ

Այս ոճում ևս Հայաստանը 4 ներկայացուցիչ ունի, բայց դա այն պատճառով, որ երկու քաշային կարգերում՝ 77-ում և 97-ում Հայաստանն արդեն ուղեգիր ունի։

Եվրոպայի 2020թ․-ի չեմպիոն Գևորգ Ղարիբյանը կփորձի ուղեգիր նվաճել 60 կգ քաշային կարգում։ Մրցակիցների թվում շատ անվանի ըմբիշներ կան՝ Մամմադով (Ադրբեջան), Դաուրով (Բելառուս), Ձիմիստարիշվիլի (Վրաստան), Տորբա (Հունգարիա), Բերգե (Նորվեգիա), Քամալ (Թուրքիա), որոնցից յուրաքանչյուրը կարող է պայքարել ուղեգրի համար։ Ղարիբյանը ևս ֆավորիտներից է, բայց հեշտ չի լինելու։ Մասնակիցների թվում է նաև անկախ Հայաստանի առաջին օլիմպիական չեմպիոն Արմեն Նազարյանի որդին՝ Էդմոնդ Նազարյանը՝ 55 կգ քաշային կարգում Եվրոպայի 2020թ․-ի չեմպիոնը, որը ներկայացնում է Բուլղարիան։ Էդմոնդն իր ուժերը փորձեց այս քաշային կարգում՝ Ուկրաինայի միջազգային մրցաշարում, տարավ մեկ հաղթանակ, մեկ պարտություն կրեց, բայց երիտասարդ ըմբիշը օր-օրի ավելացնում է, և կարող է անակնալի հեղինակ դառնալ։

67 կգ քաշային կարգում Սլավիկ Գալստյանը մրցակցելու է Իսլամբեկ Դադովի (Ադբեջան), Յուքսել Աթաքանի (Թուրքիա), Բալինտ Կորպաշու (Հունգարիա), Ռամազ Զոիձեի (Վրաստան), Մորտեն Թորեսենի (Նորվեգիա) հետ։ Սակայն ուղեգիր ձեռք բերելու ամենաիրական ֆավորիտը մեկ այլ հայ ըմբիշ է, որը չի ներկայացնում Հայաստանը։ Գևորգ Սահակյանը՝ Լեհաստանից վերջին տարիներին դարձել է քաշային կարգի առաջատարներից և արժանի է օլիմպիական ուղեգրի։ Ինչ վերաբերում է Գալստյանին, ապա նրան միշտ մի փոքր չի հերիքում մեծ հաղթանակների համար, բայց ինչու չփորձել նման հաղթանակ գրանցել հենց այս անգամ։

87 կգ քաշային կարգում Արթուր Շահինյանը վերջին տարիներին լավագույն մարզավիճակում չի լինում, բայց նրան այլընտրանք չկա։ Շահինյանը փորձելու է ուղեգիր նվաճել օլիմպիական չեմպիոն Դավիդ Չակվետաձեի (Ռուսաստան), Զուրաբի Դաթունաշվիլու (Վրաստան), Լաշա Լոբաձեի (Վրաստան), Մետեհան Բաշարի (Թուրքիա), Իսլամ Աբասովի (Ադրբեջան) հետ մրցակցությունում։ Շանսերը շատ չեն, բայց լավ վիճակահանության դեպքում գյումրեցի ըմբիշը կարող է պայքարել։

Եվ վերջապես 130 կգ քաշային կարգում Հայաստանը կներկայացնի Դավիթ Օվասափյանը։ Երիտասարդ ըմբիշը աստիճանաբար հաստատվում է մեծահասակների ասպարեզում, բայց այս մրցաշարում նրանից ուղեգիր ակնկալել դժվար է։ Հիմնական ֆավորիտները ռուս Սերգեյ Սեմյոնովը, ուկրաինացի Միկոլա Կուչմին ու Ադրբեջանը ներկայացնող Բեկա Կանդելակին են։

Ավելացնենք, որ ազատոճայինները պայքարի մեջ կմտնեն մարտի 18-ին, իսկ հունահռոմեական ոճի ըմբիշները՝ մարտի 20-ին։