Երեւանի ավագանին հաստատել է 2 անգամ արդեն հաստատած որոշումը. 2019 թվից այն կյանքի չի կոչվում

Երեւանի ավագանու մարտի 16-ի նիստում արդեն 3-րդ անգամ քննարկվում էր միեւնույն նախագիծը, այն «Երեւանի կենդանաբանական այգի» համայնքային ոչ առեւտրային կազմակերպության կառավարման խորհուրդ ստեղծելու եւ կանոնադրության մեջ կարգավորումներ ու փոփոխություններ կատարելու մասին էր:

Նախագիծը, որն ընդունվեց, ներկայացրել էր ավագանու «Իմ քայլը» խմբակցության անդամ Արման Անտոնյանը:

«Հայկական ժամանակի» հետ զրույցում Արման Անտոնյանը պարզաբանեց հաստատված նախագիծը կրկին օրակարգ բերելու, տեւական ժամանակ այն կյանքի չկոչելու պատճառները: 

Բանն այն է, որ Երեւանի կենդանաբանական այգու կառավարման մոդելի՝ կանոնադրության համապատասխան փոփոխության նախագիծը քննարկվել ու հաստատվել էր դեռեւս 2019 թվականի փետրվարի 9-ի Երեւանի ավագանու նիստում: Այն ժամանակ, սակայն ավագանու որոշ անդամներ պարզաբանել էին, թե որոշակի հստակեցումների կարիք կա՝ առաջարկել էին փոփոխություններ անել, աշխատել նախագծի վրա: Արման Անտոնյանի խոսքով, սակայն շուրջ 1.5 տարվա ընթացքում որեւէ գործընթաց այդ ուղղությամբ չէր էլ մեկնարկել: 

«Կենդանաբանական այգու կառավարման խորհրդի ձեւավորման խոչընդոտներն ու Երեւանի ավագանու որոշումներն անտեսելը դրսեւորվում էին անմիջականորեն տվայլ ոլորտը համակարգող Երեւանի նախկին փոխքաղաքապետի կողմից (խոսքը՝ Տիգրան Վիրաբյանի մասին է՝ հեղ.): Դա ակնհայտ էր նաեւ այն ժամանակ Երեւանի ավագանու նիստերին»,-մանրամասնելով որոշումը կյանքի չկոչելու պատճառները ասաց նա:

Նկատենք՝ գրեթե 1.5 տարի անց որոշակի փոփոխություններ անելուց հետո, 2020 թվականի սեպտեմբերի 8-ին, Արման Անտոնյանն արդեն հաստատված որոշումը կրկին ներկայացրել էր Երեւանի ավագանու քննարկամը: Ըստ ավագանու անդամի՝ 2020-ին ներառվել էին նաեւ նոր կարգավորումներ, որոնք 2019-ի այնքան էլ հստակ չէին: Ի վերջո, 2020 թվականին փոփոխությունները վերջնական հավանության էին արժանացել, հաստատցել, սակայն կրկին կյանքի չկոչվել: Ավագանու որոշումը ոչ մի կերպ իրականություն չէր դառնում՝ չէր տրվում կառավարման խորհրդի ձեւավորման գործընթացի մեկնարկը, այնինչ, համաձայն կանոնադրության, խորհուրդը պետք է ձեւավորված լիներ նախագծի հաստատումից հետո 30 աշխատանքային օրերի ընթացքում:

«Քանի որ կանոնադրության մեջ գրված էր, որ նախագծի հաստատելուց հետո, 30 օրվա ընթացքում պիտի ձեւավորվի կառավարման խորհուրդ ու այդ ժամկետներն էլ փաստացի խախտվել էին, որոշում կայացվեց այն հերթական անգամ քննարկաման դնել ու նորից հաստատել»,-ասաց նա: Այսինքն Երեւանի ավագանին հաստատել է որոշումը, սակայն որեւէ գորրծընթաց չսկսելով սպառել օրենքով նախատեսված ժամկետներն ու կրկին նույն հարցն օրակարգ բերել:

Անտոնյանի փոխանցմամբ՝ ներկայիս փոխքաղաքապետի նախաձեռնությամբ է որոշում կայացվել այնուամենայնիվ ձեւավորել Երեւանի կենդանաբանական այգու կառավարման խորհուրդ:

Նախագծի հեղինակից հետարքրքվեցինք, թե եթե նախագիծը 2019 թվականից հաստատվել էր ու 2020-ին էլ արդեն ներառվել էին հստակ կարգավորումներ, ինչո՞ւ նորից օրակարգ բերվեց այն: «ՀՈԱԿ-ների մասին համապատասխան օրենքում փոփոխություններով պայմանավորված, որոշում կայացվեց դարձյալ որոշ կետեր հստակեցնել»,-ասաց նա, իսկ թե ինչ կետեր չմանրամասնեց:

Այժմ, արդեն 3-րդ անգամ հաստատելուց հետո որոշման համաձայն քաղաքապետարանում (մարտի 16-ից հետո) 30 օրերի ընթացքում պետք է ստեղծեն նախատեսված Կառավարման խորհուրդը: Անտոնյանը հայտնեց, որ գործընթացն արդեն մեկնարկել է ու Երեւանի քաղաքապետարանը շուտով հանդես կգա խորհրդի ձեւավորման հայտարարությամբ եւ հրավերներ կուղարկի կանոնադրությանը համապատասխան գերատեսչությունների ղեկավարներին՝ իրենց ներկայացուցիչ-թեկնածուներին առաջադրելու նպատակով:

Խորհրդի կազմը հաստատում է Երեւանի քաղաքապետը, այն համարվում է ձեւավորված, եթե հաստատվել է կանոնադրության համապատասխան կետի համաձայն առաջադրված առնվազն 7 անդամի թեկնածությունը:

Կառավարման խորհուրդը պետք է ձեւավորվի հետեւյալ սկզբունքով ու համամասնությամբ.

1.Կառավարման խորհրդի անդամների քսան տոկոսն առաջադրվում է Կազմակերպության աշխատանքային կոլեկտիվի ընդհանուր ժողովի կողմից:

2. Խորհրդում պետք է լինի Երեւանի քաղաքապետի կողմից առաջադրված 1 թեկնածու, որը չի կարող լինել համայնքային պաշտոն զբաղեցնող անձ, Երեւանի քաղաքապետարանի եւ վարչական շրջանի ղեկավարի աշխատակազմերի աշխատակից:

3. Երեւանի ավագանու խմբակցությունների կողմից առաջադրված մեկական ավագանու անդամ թեկնածու:

4. Մասնագիտացված գիտական եւ կրթական կազմակերպությունների՝ ՀՀ ԳԱԱ Կենդանաբանության եւ հիդրոէկոլոգիայի գիտական կենտրոնի, Երեւանի պետական համալսարանի, Հայաստանի ազգային ագրարային համալսարանի, Խ.Աբովյանի անվան հայկական պետական մանկավարժական համալսարանի կողմից առաջադրված մեկական թեկնածու:

5. Մասնագիտացված միջազգային հասարակական կազմակերպությունների հայաստանյան ներկայացուցչությունների կողմից առաջադրված մեկական թեկնածու:

6. Ոլորտի լիազոր պետական մարմնի ու Բնապահպանության եւ ընդերքի տեսչական մարմնի կողմից առաջադրված մեկական թեկնածու:

Կառավարման խորհրդի գործունեության ժամկետը 5 տարի է: Հիմնական նպատակն է լինելու՝ մշակել Կենդանաբանական այգու զարգացման ռազմավարություն, դրա գործունեության հիմնական ուղղությունների մասին Երեւանի քաղաքապետին ներկայացնել մասնագիտական առաջարկություններ, եւ վերահսկել Այգու տնօրենի գործունեությունը: