15-ամյա տղային կալանավորելու միջնորդությունը հետ է վերցվել. ծեծկռտուքի գործով անչափահասներ են մեղադրվում

Մի խումբ երիտասարդների մասնակցությամբ փետրվարի 23-ին տեղի ունեցած ծեծկռտուքի համար երկու աչափահասներ հայտնվել են մեղադրյալի աթոռին: Նրանցից մեկին՝ 15-ամյա տղային, երեկ կալանավորելու միջնորդություն էր ներկայացվել դատարան, ինչը նրա պաշտպանի ահազանգից ու ներկայացված բողոքից հետո հետ է վերցվել:

Անչափահաս տղային նախօրեին մեղադրանք է առաջադրվել ՀՀ քրեական օրենսգրքի 112 հոդվածի 2-րդ մասի 6-րդ կետով (դիտավորությամբ առողջությանը ծանր վնաս պատճառելը, որը կատարվել է մի խումբ անձանց կողմից):

ՀՀ քնչական կոմիտեից երեկ մեր հարցին ի պատասխան հայտնեցին, որ ըստ ձեռք բերված փաստական տվյալների՝ փետրվարի 23-ին` ժամը 13:00-ի սահմաններում, անձնական հարցերի շուրջ վիճաբանություն է տեղի ունեցել մի խումբ երիտասարդների միջև, որի ընթացքում վիճաբանող անձինք միմյանց մարմնի տարբեր մասերին ոտքերով և ձեռքերով փոխադարձ հարվածներ են հասցրել, իսկ երիտասարդներից մեկն իր մոտ պահվող փայտյա մահակով, իսկ մյուսը՝ ձեռքին հարմարեցված առարկայով, դիտավորությամբ հարվածներ են հասցրել իրենց հետ վիճաբանող, 17-ամյա երիտասարդի գլխին՝ վերջինիս առողջությանը դիտավորությամբ պատճառելով գանգուղեղային տրավմայի, գլխուղեղի ծանր աստիճանի սալջարդի, ճակատոսկրի, աջ ակնակապճի, աջ քունքոսկրի գծային կոտրվածքների, երկկողմանի էպիդուրալ հեմատոմաների ձևով ծանր մարմնական վնասվածքներ:

Նախաքննությամբ ձեռք են բերվել  բավարար ապացույցներ այն մասին, որ 17–ամյա երիտասարդին նշված վնասվածքները պատճառվել են վիճաբանությանը մասնակից 16 և 15 անչափահաս տղաների կողմից: Միջնորդություն է ներկայացվել դատարան՝ 15-ամյա երիտասարդի նկատմամբ կալանավորումը որպես խափանման միջոց կիրառելու վերաբերյալ:

15-ամյա տղայի պաշտպան Երեմ Սարգսյանը ՀՀ գլխավոր դատախազին, Երևան քաղաքի դատախազին եւ Արաբկիրի դատախազին հրատապ բողոք էր ներկայացրել՝ խնդրելով հանձնարարել հետ վերցնել անչափահասի նկատմամբ կալանավորումը որպես խափանման միջոց կիրառելու վերաբերյալ միջնորդությունը և նրա նկատմամբ որպես խափանման միջոց կիրառել հսկողությանը հանձնելը։ Պաշտպանի բողոքը բավարարվել էր եւ կալանքի միջնորդությունը, որը պետք է քննվեր այսօր, հետ է վերցվել:

Երեմ Սարգսյանը մեր զրույցում ասաց, որ կալանքի միջնորդությանը կից ներկայացվել էին նյութեր, որոնք պետք է հիմնավորեին կալանքի միջնորդության հիմնավոր լինելը. «բայց ուսումնասիրելով պարզվեց, որ դրանում ապացույցներ չկան առ այն, որ իմ պաշտպանյալը որեւէ մեկին գոնե մեկ անգամ հարվածել է: Ասում էին, որ վիճաբանության ժամանակ հարվածներով ծանր մարմնական վաս է պատճառվել, բայց գոնե մեկ ապացույց չկա»,- ասաց պաշտպանը՝ նման իրավիճակում աննախադեպ եւ խիստ խնդրահարույց համարելով 15-ամյա երեխային կալանավորելու միջնորդությունը: Այս համատեքստում Սարգսյանը հիշեցրեց դատախազության հրապարակումը, որում նշվում է, որ․«ՀՀ դատախազությունը նաև որդեգրել է առանձին ուղղություններով անչափահասների առնչությամբ քրեական քաղաքականությունը վերանայելու ուղեգիծ: Մասնավորապես, դատախազության կողմից խստացվել է անչափահասի նկատմամբ կալանավորումը որպես խափանման միջոց ընտրելու մասին միջնորդություն ներկայացնելու քրեադատավարական պրակտիկան: Ըստ այդմ՝ դատախազներին հանձնարարվել է անչափահաս մեղադրյալների նկատմամբ խափանման միջոց կիրառելու հարցը լուծելիս առաջնահերթ քննարկել «հսկողության հանձնել» խափանման միջոցը կիրառելու հարցը: Համաձայն նոր քաղաքականության՝ առաջին անգամ միջին ծանրության և ծանր հանցագործություն կատարած անչափահասների նկատմամբ կալանավորումը որպես խափանման միջոց կարող է ընտրվել բացառապես այն դեպքերում, երբ քրեական գործով ձեռք բերված փաստական տվյալները փաստում են մեղադրյալի կողմից ազատության մեջ մնալու հետ կապված խափանման միջոցների պայմանները խախտելու մասին: Պաշտպանը նշեց՝ իր պաշտպանյալը որեւէ պայման չի խախտել, չի թաքնվել վարույթն իրականացնող մարմնից, չի խոչընդոտել գործի քննությանը:

«Փաստը մնում է փաստ, որ այս դեպքով այդ հանձնարարությունը չէր աշխատում մինչեւ այսօր եւ միջնորդություն էր ներկայացվել դատարան: Իհարկե ի վերջո պետք է շնորհակալություն հայտնեմ եւ արձանագրեմ, որ երեկ գիշերը բողոքներ էի հասցեագրել գլխավոր դատախազին, Երեւան քաղաքի դատախազին եւ Արաբկիրի դատախազին՝ ավելի մանրամասն հիմնավարելով նաեւ միջազգային իրավական փաստաթղթերը վկայակոչելով: Այսօր դատարանից տեղեկացրին, որ միջնորդությունը դատախազը հետ է վերցրել, այսինքն՝ ըստ էության այլեւս չի դիմի եւ կարծում եմ այլ խափանման միջոց կկիրառվի, որը կապված չի անազատության մեջ պահելու հետ»: Դատապարտելով բռնության նման դեպքերը, պաշտպանն ասաց՝ բնականաբար իրավապահ մարմինները պետք է հետեւողական լինեն, բայց նաեւ պետք է ուշադիր լինել այլ հանգամանքի վրա. «Այնպես չլինի անձին, անաչափահասին կալանավորեն հետո պարզվի, որ չեն կարողացել ապացույցներ գտնել: Այս առումով այստեղ շատ զգույշ պետք է լինել»:

Մեր հարցին ի պատասխան Երեմ Սարգսյանն ասաց որ իր պաշտպանյալը չի ընդունում իրեն առաջադրված մեղադրանքը: Ճշտող հարցին՝ չի մասնակցել ծեծկռտուքին, թե չի հարվածել, պաշտպանը պատասխանեց. «Մեկնաբանություններ այդ մասով չի տվել, որովհետեւ այն ինչ տեղի էր ունենում մեզ համար ակնհայտ էր, որ ընդհանուր իրավական պրոցեսներից դուրս էր եւ քանի որ մոտեցումն այդպիսնն էր ես խորհուրդ եմ տվել, որպեսզի իմ պաշտպանյալն օգտվի լռելու իրավունքից, մինչեւ հասկանանք թե իրավական պրոցեսները երբ են սկսվում»: Երեմ Սարգսյանը նաեւ ասաց, որ գործով դեռ դատաբշկական փորձաքննության արդյունքները չկան, ինչը եւս խնդիր է. «Այսինքն միակ սուբյեկտը, որ իրավասու է որեշել ծանր մարմնական վնաս է հասցվել, թե՝ ոչ, դա դատաբժշկական փորձագետն է եւ դա օրենքով հստակ է արձանագրված, բայց այդ եզրակացությունն էլ չկար հտեւաբար այդ հարցով եւս լուրջ խնդիրներ կային»: