Մեդալների ակնկալիքով. ծանրամարտի Հայաստանի հավաքականի կազմն ու հնարավորությունները Եվրոպայի առաջնությունում

Ծանրամարտի Հայաստանի տղամարդկանց և կանանց հավաքականները ապրիլի 3-11-ը կմասնակցեն Մոսկվայում կայանալիք Եվրոպայի առաջնությանը։ Ապրիլի մեկին հայտարարվեց Հայաստանի հավաքականի վերջնական կազմը․ նախնական կազմից դուրս մնաց միայն 81 կգ քաշային Կարեն Մարգարյանը։ Տղամարդկանց հավաքականն առավելագույնը 10 ծանրորդ կարող էր ունենալ կազմում, այդ պատճառով Մարգարյանի անունը դուրս մնաց ցուցակից։

«Հայկական ժամանակը» ներկայացնում է Հայաստանի հավաքականների կազմը, երկամարտի նախնական հայտերն ու հայ մարզիկների գլխավոր մրցակիցներին։

Կանայք

Իզաբելա Յայլյան, 55 կգ քաշային կարգ, նախնական հայտը՝ 205 կգ

Յայլյանը ուկրաինուհի Կամիլա Կոնոտոպի և ռուս Սվետլանա Երշովայի հետ միասին ամենաբարձր նախնական հայտն ունի։ Հենց այս մարզուհիները թրքուհի Սյումեյե Քենթլիի հետ միասին կպայքարեն մեդալների համար։ Յայլյանի շանսերը շատ չեն, բայց հայ մարզուհին կփորձի իրեն լավագույն կողմերով դրսևորել, որպեսզի նաև օլիմպիական վարկանիշային միավորներ վաստակի։ Առայժմ Յայլյանը խոշոր մրացաշարերի ժամանակ չի կարողանում հանդես գալ ուժերի առավելագույնի չափով, բայց Եվրոպայի առաջնությունում կարող է ամեն ինչ փոխվել։

Լիանա Գյուրջյան, 81կգ քաշային կարգ, նախնական հայտը՝ 225կգ

Գյուրջյանի հայտը, համեմատած մրցակցուհիների, այդքան էլ բարձր չէ։ Այս քաշային կարգում մեդալների համար կպայքարեն Ուկրաինայի, Թուրքիայի, Լեհաստանի ներկայացուցիչները։ Գյուրջյանը մասնակիցներից մեջ ամենաերիտասարդներից է, նա ընդամենը 19 տարեկան է, և մեծ հաղթանակները դեռ առջևում են։ Հաջող մոտեցումների դեպքում կարող է նաև խառնվել մեդալների համար պայքարին։

Տաթև Հակոբյան, 87 կգ քաշային կարգ, նախնական հայտը՝ 235 կգ

Տաթևը ռեալ հավակնորդ է մրցաձևերից մեկում մեդալի համար պայքարելու։ Նրա նախնական հայտը չորրորդն է, զիջում է միայն Ռուսաստանի երկու և Մոլդովայի մեկ ներկայացուցչի։ Առայժմ Հակոբյանի մոտ չի ստացվում երկամարտում լավ արդյունք գրանցել, բայց զգացվում է, որ դա նրա կարողությունների սահմաններում է։

Արփինե Դալալյան, 87+ կգ քաշային կարգ, նախնական հայտը՝ 230 կգ

Երիտասարդ մարզուհուն դժվար կլինի խառնվել մեդալների համար պայքարին, եթե մրցակիցներից որևէ մեկը լուրջ սխալ թույլ չտա։ Դալալյանի նպատակը պետք է լինի պատվիրված քաշերը բարձրացնել ու սպասել մյուսների ելույթներին։

Տղամարդիկ

Ռաֆիկ Հարությունյան, 81կգ քաշային կարգ, նախնական հայտը՝ 350 կգ

20-ամյա Հարությունյանի համար սա երկրորդ խոշոր մրցաշարն է, նա առայժմ հաստատվում է մեծահասակների ասպարեզում։ Այս քաշային կարգում մի շարք ուժեղ մարզիկներ են մասնակցում՝ Բուլղարիայից, Իտալիայից, Ռուսաստանից, Լատվիայից, Ալբանիայից։ Հարությունյանի նախնական հայտը 9-րդն է, դրական արդյունք կլինի, եթե երիտասարդ մարզիկը կարողանա մտնել լավագույն հնգյակ։

Կարեն Ավագյան, Անդրանիկ Կարապետյան, 89 կգ քաշային կարգ, նախնական հայտը 375 կգ

Այստեղ մեդալային շանսերը մեծ են։ Հայ ծանրորդների հայտը ամենաբարձրն է։ Քաշն օլիմպիական չէ, մրցակցությունն էլ մեծ չէ։ Կարապետյանն ու Ավագյանը ռուս Ռոման Չեպիկի, վրացի Ռևազ Դավիթաձեի, բելառուս Սերգեյ Գարանինի հետ միասին կպայքարեն Եվրոպայի չեմպիոնի կոչման համար։

Դավիթ Հովհաննիսյան, Հակոբ Մկրտչյան, 94 կգ քաշային կարգ, նախնական հայտերը՝ Հովհաննիսյան՝ 375 կգ, Մկրտչյան՝ 370 կգ

Եվրոպայի չեմպիոն Հակոբ Մկրտչյանը տեղափոխվել է օլիմպիական քաշային կարգ, այստեղ դեռ չի կարողանում մեդալների համար պայքարել։ Բայց գյումրեցի ծանրորդն ավելացնում է, և նրանից սպասելիքներ, անկասկած, կան։ Նույնը նաև Հովհաննիսյանից։ Այս քաշային կարգում ամենաբարձր հայտը ներկայացրել են Վրաստանը ներկայացնող Անտոն Պլեսնոյը և բելառուս Պյոտր Ասայոնակը (385 կգ):

Արսեն Մարտիրոսյան, Սամվել Գասպարյան, 102 կգ քաշային կարգ, նախնական հայտը՝ 390 կգ

Հայ ծանրորդների նախնական հայտերն ամենաբարձրն են։ Այս քաշը ևս օլիմպիական չէ, մրցակցությունն էլ ամենաբարձրը չէ։ Մարտիրոսյանի և Գասպարյանի հայտերն ամենաբարձրն են։ Գասպարյանը մասնակիցներից մեջ ամենատիտղոսակիրն է և Եվրոպայի չեմպիոնի գլխավոր հավակնորդը։

Սիմոն Մարտիրոսյան, 109կգ քաշային կարգ, նախնական հայտը՝ 420կգ

Աշխարհի ու Եվրոպայի չեմպիոնից սպասելիքը մեկն է՝ ոսկե մեդալ։ Սիմոնի հիմնական մրցակիցը հենց ինքն է, ուրիշ մրցակիցներ չկան: Հետաքրքիր կլիներ հետևել նաև բելառուս Արյամնովի ելույթին․ 2008թ․-ի օլիմպիական չեմպիոնը վերջին շրջանում ավելացնում էր և փորձում գոնե մի փոքր մոտենալ Սիմոնի ցուցանիշներին։ Սակայն Արյամնովի ազգանունը վերջին պահին անհետացել է մասնակիցների ցուցակից։

Գոռ Մինասյան, Վարազդատ Լալայան, 109+կգ քաշային կարգ, նախնական հայտը՝ 450կգ

Օլիմպիական խաղերի փոխչեմպիոն Մինասյանն ու 21-ամյա Լալայանը, ամենայն հավանականությամբ, կպայքարեն արծաթե մեդալի համար, քանի որ գերմարդ Լաշա Տալախաձեին հաղթելն առայժմ անհնար է թվում։ Մյուս կողմից, դժվար է ասել, թե վրացի ծանրորդն ինչ վիճակում է պանդեմիայից հետո։ Ամեն դեպքում, Տալախաձեն բացահայտ ֆավորիտ է, նրա նախնական հայտն ամենաբարձրն է՝ 460 կգ։ Իսկ Լալայանը իրական շանսեր ունի մեծահասակների ասպարեզում իր առաջին խոշոր մրցաշարը մեդալով ավարտելու համար։ Վարազդատը շատ արագ է առաջադիմում, նման տեմպերով բացառված չէ, որ հաջորդ օլիմպիական շրջափուլում հենց նա դառնա Տալախաձեի գլխավոր մրցակիցը։