Երեւանի ո՞ր 100 շենքերի վրա են տեղադրվելու արեւային ֆոտովոլտային համակարգեր. Նորք Մարաշը ծրագրում ներառված չէ

Երեւանը կօգտագործի արեւի էներգիան: Քաղաքապետարանի ու Եվրոպական Միության (ԵՄ) համաֆինանսավորմամբ իրականացվող ծրագիրն արդեն մեկնարկել է:

«ԵՄ-ն Երեւանի համար. արեւային համայնք» ծրագրի շրջանակներում բազմաբնակարան շենքերի տանիքներին տեղադրվում են արեւային ֆոտովոլտային (ՖՎ) կայաններ: Նպատակը՝ ընդհանուր օգտագործման տարածքներում էլեկտրական էներգիայի սպառումը շուրջ 70 տոկոսով նվազեցնելն է:

Ծրագրով նախատեսված է Երեւանի 100 բազմաբնակարան շենքերի տանիքներին տեղադրել արեւային ֆոտովոլտային համակարգեր, որոնց միջոցով արտադրված էներգիայով սնուցվելու են շենքերի վերելակներն ու ընդհանուր օգտագործման տարածքների լուսավորման համակարգերը՝ շքամուտքեր, հարկային եւ միջհարկային հարթակներ, աստիճանավանդակներ: Ավելի քան 6000 ընտանիքներ կդառնանան այս ծրագրի շահառուներ:

Երեւանի քաղաքապետարանի լրատվական վարչությունից տեղեկացնում են, ծրագիրը տարածվում է Երեւանի 12 վարչական շրջաններից 11-ի վրա, բացառություն է Նորք Մարաշ վարչական շրջանը, որտեղ չկան բարձրահարկ եւ չափորոշիչներին համապատասխանող շենքեր: Նկատենք՝ մասնագետները նախապես մշակել են շենքերի ընտրության չափորոշիչները, դրանք պետք է ունենան 9-14 հարկայնություն, հարթ տանիքներ, որտեղ չկան այլ կոնստրուկցիաներ, անհրաժեշտ է նաեւ բնակիչ-սեփականատերերի 2/3-ի համաձայնությունը:

«Այս պահին ընթանում են 1-ին փուլի աշխատանքները՝ արեւային ֆոտավոլտային կայանների եւ լուսավորության համակարգեր են տեղադրվում թվով 48 շենքերում»,-մանրամասնել են քաղաքապետարանից:

Երեւանի քաղաքապետարանից նաեւ հայտնում են, որ չկան սահմանափակումներ կամ առավելություններ ըստ հասցեների: Եթե առկա է անհրաժեշտ մակերես, վահանակները 300 անկյան աստիճան թեքությամբ եւ լիարժեք դեպի հարավ տեղադրելու հնարավորությունը, ինչպես նաեւ բացակայում են կայանի աշխատանքը խոչընդոտող գործոններ, օրինակ՝ ստվեր, փոշի եւ հավելյալ ջերմություն, ապա հնարավոր է տվյալ վայրում տեղադրել եւ շահագործել արեւային համակարգ: «Երեւանում տարվա կտրվածքով արեւային օրերը բավական շատ են ու, այս առումով, պետք է պարզապես ճիշտ տեղն ընտրել»,-նկատում են լրատվականից:

Ծրագրի արդյունքում բազմաբնակարան շենքերում բանկվող բնակիչները տնտեսելու են ընդհանուր օգտագործման տարածքներում լուսավորության եւ վերելակների շահագործման համար էլեկտրաէնեգիայի վճարումների 50%-ը: Այսինքն եթե այժմ, օրինակ, վերելակի հոսանքի ծախսի համար բնակիչները վճարում են ամիսը 1000 ՀՀ դրամ, ապա արևային համակարգերի շահագործումից հետո կվճարեն 500 դրամ, որն էլ կփոխանցվի տվյալ շենքի նպատակային հաշվին: Բացի այդ, ՀԷՑ-ին նույնպես արեւային էներգիա կվաճառվի:

«Ամեն շենք ունենալու է իր նպատակային հաշվեհամարը բանկերում, որտեղ հավաքագրվելու է բնակիչների վճարած այդ 50 տոկոս գումարը, ինչպես նաեւ ՀԷՑ ՓԲԸ-ին վաճառված էլեկտրաէներգիայի գումարը: Այդ գումարները կուտակվելուց հետո օրինակ կարող են փոխվել մուտքերի դռները, պատուհանները»,- հայտնում են քաղաքապետարանից:

Նախատեսվում է նաեւ ծրագրում ներառված շենքերում բնակվող սոցիալապես անապահով ընտանիքներին տրամադրել էներգախնայող լուսատուներ՝ լուսադիոդային լամպեր՝ տան էներգասպառումը նվազեցնելու եւ ընտանեկան բյուջեն խնայելու համար:

Ըստ մասնագետների՝ այս ծրագիրը ենթադրում է տարեկան 300 տոննա CO2 գազի արտանետման նվազում:

Ստորեւ ներկայացնում ենք այն հասցեները, որտեղ տեղադրվելու են արեւային ֆոտովոլտային (ՖՎ) կայաններ.

Առաջին փուլում արեւային ֆոտովոլտային (ՖՎ) կայաններ կտեղադրվեն՝ Դավթաշեն վարչական շրջանի 1-ին թաղամասի N4 շենքում, 1-ին թաղամասի N9 շենքում, 3-րդ թաղամասի N7 շենքում, 4-րդ թաղամասի N4ա շենքում, 4-րդ թաղամասի N41 շենքում, 2-րդ թաղամասի N10 շենքում, 2-րդ թաղամասի N39 շենքում եւ 4-րդ թաղամասի N17 շենքում:

Արաբկիր վարչական շրջանի Արաբկիր N19-րդ փողոցի 4-րդ, Տիգրանյան 19/1, Արամ Խաչատրյան 26/1, Մամիկոնյանց 36/1 հասցեներում:

Աջափնյակ վարչական շրջանի՝ Լենինգրադյան 48/2, Շինարարներ 15/2, Բաշինջաղյան 161 Հալաբյան 9/1 Էստոնական 12/1 Մարգարյան 39 հասցեներում: Աճառյան N18, Ավան Առինջ 1-ին միկ. N2/5 շենքում, Դուրյան թաղամասի N28 շենքում, Իսահակյան թաղ. 2/2 շենքում, Իսահակյան թաղ. 3/2 շենքում, Անդրանիկի 78, Օհանովի 36 հասցեում:

Երկրորդ փուլում՝ արեւային կայաններ կտեղադրվեն՝ Դավթաշենի 2-րդ թաղամասի 4ա շենքում, 2-րդ թաղամասի 40 շենքում, 2-րդ թաղամասի 46 շենքում, 3-րդ թաղամասի 15 շենքում, 3-րդ թաղամասի 16 շենքում, 4-րդ թաղամասի 10 շենքում, 4-րդ թաղամասի 11 շենքում, 4-րդ թաղամասի 37 շենքում, 4-րդ թաղամասի 44 շենքում, 4-րդ թաղամասի 45 շենքում: Արաբկիր 21-րդ փողոց N1 շենքում եւ Մամիկոնյանց փողոց 36/1 հասցեում: Ավան Առինջ 2 միկ. 3/3 շենքում, Դանիել Վարուժան թաղամաս 8 շենքում, Դանիել Վարուժան թաղամաս N9 շենքում, Դանիել Վարուժան թաղամաս N10 շենքում, Դուրյան թաղ. N36 շենքում, Դուրյան աղ. N47 շենքում, Աջափնյակ վարչական շրջանի Հովհաննես Շիրազ N 26 շենքում, Շինարարներ N15/1 շենքում: